മട്ടന്നൂർ: പരിയാരം ഹസൻ മുക്കിൽ വീടിന്റെ ജനൽ ഗ്ലാസിൽ കറുത്ത സ്റ്റിക്കർ പതിച്ച നിലയിൽ കണ്ടെത്തിയത് ജനങ്ങളെ ഭീതിയിലാക്കി. ഹസൻ മുക്കിലെ ബൈത്തുൽ ആയിഷയിലെ ലത്തീഫിന്റെ വീടിന്റെ ജനൽ ഗ്ലാസിലാണ് സ്റ്റിക്കർ പതിച്ചത്. മൂന്നു ജനൽ ഗ്ലാസിലും ഒരേ തരത്തിലുള്ള കറുത്ത സ്റ്റിക്കർ ആണ് പതിച്ചത്.നാട്ടുകാർ വിവരം നൽകിയതിനെത്തുടർന്നു മട്ടന്നൂർ പോലീസ് സ്ഥലത്തെത്തി പരിശോധന നടത്തി.ഇന്നലെ രാവിലെ വീട്ടു സാധനങ്ങൾ വിൽക്കാൻ അപരിചിതരായ സ്ത്രീകൾ ഇവിടുത്തെ വീടുകളിൽ വന്നതായി വിട്ടുകാർ പറയുന്നു. വീടുകളിൽ ഭിക്ഷാടനത്തിനും മറ്റുമായിവരുന്ന അപരിചിതരെ കണ്ടാൽ ഉടൻ പോലീസ് സ്റ്റേഷനുമായി ബന്ധപ്പെടണമെന്നും പരിഭ്രാന്തി പരത്തക്കവിധത്തിലുള്ള സാഹചര്യമൊന്നും നിലവിലില്ലെന്നും മട്ടന്നൂർ സിഐ എ.വി. ജോൺ അറിയിച്ചു.