ന്യൂഡൽഹി:കുപ്പിവെള്ളത്തിന് എംആർപിയേക്കാൾ കൂടുതൽ വിലയീടാക്കിയാൽ ഇനി മുതൽ പിഴയും തടവുശിക്ഷയും വരെ നൽകാമെന്ന് കേന്ദ്രം സുപ്രീം കോടതിയിൽ. ഹോട്ടലുകൾ, റസ്റ്റോറന്റുകൾ,മൾട്ടിപ്ലക്സ് തീയേറ്ററുകൾ എന്നിവിടങ്ങളിൽ കുപ്പിവെള്ളത്തിനു എം ആർ പിയേക്കാൾ അധികവിലയാണ് ഈടാക്കുന്നത്.ഇത് ഉപഭോക്താക്കളുടെ അവകാശത്തിന് വിരുദ്ധവും നികുതി വെട്ടിപ്പും കൂടിയാണെന്ന് കേന്ദ്രം കോടതിയെ അറിയിച്ചു.ഫെഡറേഷൻ ഓഫ് ഹോട്ടൽ ആൻഡ് റെസ്റ്റോറന്റ് അസോസിയേഷൻ സമർപ്പിച്ച ഹർജിയിലാണ് കേന്ദ്ര ഉപഭോക്തൃകാര്യ മന്ത്രാലയം സുപ്രീം കോടതിയിൽ സത്യവാങ്മൂലം നൽകിയത്. കുപ്പിവെള്ളത്തിനു കൂടിയ വില ഈടാക്കുന്നതിനെതിരെ ഡൽഹി ഹൈക്കോടതി പുറപ്പെടുവിച്ച വിധിക്കെതിരെയാണ് ഹോട്ടലുടമകളുടെ സംഘടന സുപ്രീം കോടതിയെ സമീപിച്ചത്.അമിത വില ഈടാക്കിയാൽ 25,000 രൂപ വരെ ആദ്യം പിഴ ഈടാക്കാം.കുറ്റം ആവർത്തിച്ചാൽ ഇത് 50,000 ആകും.മൂന്നാമതും കുറ്റം അവർത്തിക്കുന്നവരിൽ നിന്ന് ഒരു ലക്ഷം രൂപ പിഴ ഈടാക്കുകയോ ഒരു വർഷം തടവ് ശിക്ഷയോ ഇത് രണ്ടും കൂടിയോ നൽകാമെന്നും വ്യവസ്ഥയുണ്ട്.