കൊച്ചി:നടി ആക്രമിക്കപ്പെട്ട കേസിൽ ജാമ്യത്തിലിറങ്ങിയ നടൻ ദിലീപ് കോടതിയുടെ അനുമതിയോടു കൂടി ദുബായിലേക്ക് യാത്ര തിരിച്ചു.തന്റെ ഉടമസ്ഥതയിലുള്ള ദേ പുട്ട് എന്ന വ്യാപാരസ്ഥാപനത്തിന്റെ ഉൽഘാടനത്തിനായാണ് ദിലീപ് ദുബായിലേക്ക് യാത്ര തിരിച്ചിരിക്കുന്നത്.അമ്മ മാത്രമാണ് ദിലീപിനൊപ്പം പോയത്.നേരത്തെ മകൾ മീനാക്ഷിയും ഭാര്യ കാവ്യാ മാധവനും ദിലീപിനൊപ്പം ഉണ്ടാകുമെന്നു പറഞ്ഞിരുന്നുവെങ്കിലും ഇരുവരും പോയിട്ടില്ല.വിദേശത്തു പോകുന്നതിനായി ഇന്നലെ വൈകുന്നേരം അങ്കമാലി മജിസ്‌ട്രേറ്റ് കോടതിയിലെത്തി ദിലീപ് പാസ്പോർട്ട് കൈപ്പറ്റിയിരുന്നു.നാല് ദിവസം വിദേശത്തു തങ്ങുന്നതിനായി ആറു ദിവസത്തെ ഇളവാണ്‌ ഹൈക്കോടതി അനുവദിച്ചിരിക്കുന്നത്. അതേസമയം പാസ്പോർട്ട് കൈപ്പറ്റാനെത്തിയ ദിലീപ് കുറ്റപത്രത്തിലെ വിവരങ്ങൾ കോടതിയിൽ സമർപ്പിക്കുന്നതിന് മുൻപ് മാധ്യമങ്ങൾക്ക് കിട്ടിയതിനെതിരെ കോടതിയിൽ ഹർജി നൽകി.കുറ്റപത്രം റദ്ധാക്കണമെന്നും ദിലീപ് ആവശ്യപ്പെട്ടു.ഇക്കാര്യത്തിൽ ഡിസംബർ ഒന്നിന് റിപ്പോർട് സമർപ്പിക്കാൻ മജിസ്‌ട്രേറ്റ് അന്വേഷണ സംഘത്തോട് ആവശ്യപ്പെട്ടിട്ടുണ്ട്.