ന്യൂഡൽഹി:ഹാദിയയെ ഇന്ന് സുപ്രീം കോടതിയിൽ ഹാജരാക്കും.ഇന് വൈകുന്നേരം മൂന്നുമണിക്ക് ഹാദിയയെ ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ചിനുമുന്നിലാണ് ഹാജരാക്കുക.കനത്ത സുരക്ഷയിലായിരിക്കും ഹാദിയയെ കോടതിയിൽ ഹാജരാക്കുക. ഷെഫിൻ ജഹാനും ഡെൽഹിയിലെത്തിയിട്ടുണ്ട്. കേരളത്തിൽ നിന്നും ഡൽഹിയിലേക്ക് വരുന്ന വഴി വിമാനത്താവളത്തിൽ വെച്ച് താൻ ഇസ്ലാമാണെന്നും തനിക്ക് ഭർത്താവിന്റെ ഒപ്പമാണ് പോകേണ്ടതെന്നും ഹാദിയ മാധ്യമങ്ങൾക്ക് മുന്നിൽ ഉറക്കെ വിളിച്ചുപറഞ്ഞിരുന്നു.എന്നാൽ ഹാദിയയുടെ ഇപ്പോഴത്തെ മനോനില ശരിയല്ലെന്ന് ഹാദിയയുടെ അച്ഛൻ അശോകന്റെ അഭിഭാഷകൻ ഇന്ന് കോടതിയിൽ വാദിക്കും.ഷെഫിൻ ജഹാനുമായുള്ള ഹാദിയയുടെ വിവാഹബന്ധം ഹൈക്കോടതി റദ്ധാക്കിയത് ഇതേകാരണത്തിന്റെ പേരിലാണെന്നും അഭിഭാഷകൻ കോടതിയിൽ വാദിച്ചേക്കും.ഹദിയയുടെ മൊഴി കണക്കിലെടുക്കരുതെന്ന് എൻഐഎയും സുപ്രീം കോടതിയിൽ വാദിക്കും.ആശയം അടിച്ചേല്പിക്കപ്പെട്ട ഒരു വ്യക്തിക്ക് സ്വതന്ത്രമായി ചിന്തിക്കാൻ കഴിയില്ലെന്നും എൻഐഎ കോടതിയിൽ അറിയിക്കും.ഉയർന്ന മനഃശാസ്ത്ര സമീപനങ്ങൾക്കും സിദ്ധാന്ത ഉപദേശങ്ങൾക്കും ഹാദിയ വിധേയയായിട്ടുണ്ടെന്നാണ് എൻഐഎ റിപ്പോർട്ടിൽ ആരോപിക്കുന്നത്.ഹാദിയയുടെ വാദം കേൾക്കുന്നത് അടച്ചിട്ട കോടതിമുറിക്കുള്ളിലാക്കണമെന്നു ആവശ്യപ്പെട്ട് പിതാവ് അശോകൻ സമർപ്പിച്ച ഹർജി കോടതി ഇന്ന് വീണ്ടും പരിഗണിക്കും.