തിരുവനന്തപുരം:മീസിൽസ്-റൂബെല്ല വാക്‌സിനേഷൻ ഈ മാസം 25 വരെ നീട്ടി.പത്തനംതിട്ട, ഇടുക്കി,ആലപ്പുഴ എന്നീ ജില്ലകൾ ഒഴികെയുള്ള ജില്ലകളിലാണ് പദ്ധതി ഒരാഴ്ചത്തേക്ക് കൂടി നീട്ടിയത്.പത്തനംതിട്ട,ഇടുക്കി,ആലപ്പുഴ എന്നീ ജില്ലകളിൽ 96 ശതമാനം നേട്ടം കൈവരിച്ചിട്ടുണ്ട്. ഈ ജില്ലകളിൽ കുത്തിവെയ്‌പ്പെടുക്കാത്ത കുട്ടികളെ കണ്ടെത്തി മരുന്ന് നല്കാൻ നിർദേശം നൽകിയിട്ടുണ്ട്.ഈ മാസം മൂന്നിന് പദ്ധതി അവസാനിപ്പിക്കാനിരുന്നതാണെങ്കിലും ലക്‌ഷ്യം കൈവരിക്കാത്തതിനാൽ പതിനെട്ടു വരെ നീട്ടുകയായിരുന്നു.ഇതാണ് ഇപ്പോൾ ഇരുപത്തിയഞ്ചാം തീയതി വരെ നീട്ടിയിരിക്കുന്നത്.മലപ്പുറം ജില്ലയാണ് ഇതിൽ ഏറ്റവും പിറകിൽ നിൽക്കുന്നത്. ഇവിടെ 56.44 ശതമാനം മാത്രമേ കുത്തിവെയ്പ്പ് എടുത്തിട്ടുള്ളൂ.ഇവിടെ പ്രത്യേക കർമ്മ പദ്ധതി നടപ്പിലാക്കാനും നിർദേശമുണ്ട്.