കണ്ണൂർ:വാരംകടവ് പുഴയിൽ കാണാതായ നിർമാണ തൊഴിലാളിയായ യുവാവിന്റെ മൃതദേഹം കണ്ടെത്തി. വാരം കൂറുമ്പക്കാവിനു സമീപം കൂറുമ്പ കോളനിയിൽ സുരേന്ദ്രൻ -സാവിത്രി ദമ്പതികളുടെ മകൻ സുകേഷി (28)ന്‍റെ മൃതദേഹമാണ് ഇന്നലെ രാവിലെ 11 ഓടെ കടവിന് സമീപത്തു നിന്നും കണ്ടെത്തിയത്. തിങ്കളാഴ്ച വൈകുന്നേരം കൂട്ടുകാരോടൊപ്പം കടവിലെത്തിയ യുവാവ് പുഴയിൽ വീണ ചെരുപ്പ് എടുക്കാൻ ശ്രമിച്ചപ്പോൾ ഒഴുക്കിൽപ്പെട്ടു കാണാതാവുകയായിരുന്നു.നാട്ടുകാരും ഫയർഫോഴ്സും ചേർന്ന് തെരച്ചിൽ നടത്തിയെങ്കിലുംരാത്രി വൈകിയും കണ്ടെത്താനായില്ല. ഇന്നലെ രാവിലെ തെരച്ചിൽ പുനരാരംഭിച്ചതിനെ തുടർന്നാണ് താഴ്ചയിൽ കുടുങ്ങിയ നിലയിൽ മൃതദേഹം കണ്ടെത്തിയത്.ചക്കരക്കൽ പോലീസ് ഇൻക്വസ്‌റ്റ് നടത്തിയ മൃതദേഹം ജില്ല ആശുപത്രിയിൽ നിന്നും പോസ്റ്റ്‌ മോർട്ടത്തിനു ശേഷം സംസ്‌കരിച്ചു. സഹോദരി:ഹർഷ.