കൂത്തുപറമ്പ്:പൊയിലൂരിൽ ബിജെപി-സിപിഎം സംഘർഷം.അക്രമത്തിൽ ബിജെപി ബൂത്ത് കമ്മിറ്റി സെക്രെട്ടറിയും ഓട്ടോ ഡ്രൈവറുമായ ചമതക്കാട്ടെ അനീഷിന്(36) മർദനമേറ്റു.ഇയാളെ പാനൂർ സാമൂഹികാരോഗ്യ കേന്ദ്രത്തിൽ പ്രവേശിപ്പിച്ചു.അക്രമത്തിനു പിന്നിൽ സിപിഎം ആണെന്ന് ബിജെപി ആരോപിച്ചു.ഇന്നലെ വൈകുന്നേരം 3.30 ഓടെ മേപ്പാട്ടാണ് അക്രമം നടന്നത്. വൈകുന്നേരം നാലരമണിയോട് കൂടി സിപിഎം തട്ടിൽപീടിക ബ്രാഞ്ച് കമ്മിറ്റി ഓഫീസ് കെട്ടിടത്തിന്റെ താഴത്തെ നിലയിലുള്ള കൈരളി സാംസ്ക്കാരിക കേന്ദ്രത്തിനു നേരെ അക്രമം നടന്നു.മുറിയിലുണ്ടായിരുന്ന കസേരകളും ഇരുമ്പലമാരയും അടിച്ചു തകർത്തു.ഓഫീസിനു സമീപമുണ്ടായിരുന്ന കൊടിമരവും തകർത്തു.അക്രമത്തിനു പിന്നിൽ ബിജെപി പ്രവർത്തകരാണെന്ന് സിപിഎം ആരോപിച്ചു.സംഘർഷ സാധ്യത കണക്കിലെടുത്തു പൊയിലൂർ മേഖലയിൽ പോലീസ് സുരക്ഷ ശക്തമാക്കി.ആക്രമണങ്ങളിൽ അഞ്ചു സിപിഎം പ്രവർത്തകർക്കെതിരെയും 10 ബിജെപി പ്രവർത്തകർക്കെതിരെയും കൊളവല്ലൂർ പോലീസ് കേസെടുത്തു.അനീഷിന് നേരെയുണ്ടായ അക്രമത്തിൽ പ്രതിഷേധിച്ച് ഇന്ന് വിളക്കോട്ടൂർ, പൊയിലൂർ പ്രദേശങ്ങളിൽ ഓട്ടോ പണിമുടക്കിന് ബിഎംഎസ് ആഹ്വാനം ചെയ്തു.