കണ്ണൂർ: അഞ്ചരക്കണ്ടി കണ്ണാടിവെളിച്ചത്ത് വ്യാജമണൽ നിർമാണ കേന്ദ്രം കണ്ടെത്തി.ആയിക്കര ഹാർബറിന്‍റെ ആഴംകൂട്ടൽ പ്രവൃത്തിക്കായി ഡ്രഡ്ജ് ചെയ്തു നീക്കുന്ന ചെളി ശേഖരിച്ച് കടൽമണലും പേരിനു പുഴമണലും ചേർത്ത് വിൽക്കുന്ന തട്ടിപ്പുസംഘത്തിന്‍റെ മിക്സിംഗ് യൂണിറ്റാണ് ചക്കരക്കൽ പോലീസ് അഞ്ചരക്കണ്ടിയിൽ കണ്ടെത്തിയത്.ഇവിടെ നിന്നും അനധികൃതമായി സൂക്ഷിച്ച 40 ലോഡോളം മണലും പോലീസ് പിടികൂടി.ചക്കരക്കൽ പ്രിൻസിപ്പൽ എസ്ഐ പി. ബിജുവിന്‍റെ നേതൃത്വത്തിൽ നടത്തിയ അന്വേഷണത്തിലാണ് വ്യാജ മണൽ നിർമാണകേന്ദ്രം കണ്ടെത്തിയത്.ഡ്രഡ്ജ് ചെയ്തു നീക്കുന്ന ചെളിയും മണലും 100 അടിക്ക് 2000 രൂപ നിരക്കിലാണ് തുറമുഖ അധികൃതർ വിൽക്കുന്നത്. പ്രധാനമായും സ്ഥലം നികത്തുന്നതിനും മറ്റുമാണ് ഇത് ഉപയോഗിക്കാറുള്ളത്. ഡ്രഡ്ജിംഗ് മണൽ വാങ്ങി സംഭരിക്കുന്ന മണൽമാഫിയ കർണാടകയിൽനിന്നുള്ള പുഴമണലും അനധികൃതമായി ശേഖരിക്കുന്ന കടൽമണലും ചേർത്ത് വൻ വിലയ്ക്ക് വിറ്റുവരികയാണ്. ഇത്തരം മണലിന് ഒരു ലോഡിന് 15,000 രൂപ വരെയാണ് ഈടാക്കുന്നത്.ഈ മണൽ ഉപയോഗിച്ച് വീടു നിർമിച്ചാൽ രണ്ടുവർഷത്തിനകംതന്നെ ചോർച്ച സംഭവിക്കുമെന്ന് എൻജിനിയർമാർ പറയുന്നു.കഴിഞ്ഞ ദിവസം മണൽ മാഫിയാ സംഘത്തിലെ ഒരു യുവാവ് അനധികൃതമായി മണൽ കടത്തുന്ന മറ്റൊരു ലോറി തടയുകയും ചക്കരക്കൽ എസ്ഐയാണെന്നു പരിചയപ്പെടുത്തി പണം ആവശ്യപ്പെടുകയും ചെയ്തിരുന്നു.എസ്ഐ ചമഞ്ഞ് ചിലർ പണപ്പിരിവു നടത്തുന്ന വിവരം അറിഞ്ഞതിനെ തുടർന്ന് ചക്കരക്കൽ പോലീസ് നടത്തിയ അന്വേഷണത്തിലാണ് വ്യാജ മണൽ വില്പന സംഘത്തെക്കുറിച്ച് വിവരം ലഭിച്ചത്.