ശബരിമല:മുഖ്യമന്ത്രി പിണറായി വിജയൻ ശബരിമല ക്ഷേത്രത്തിൽ ദർശനം നടത്തി.9 മണിയോടെ പമ്പയിൽ നിന്നും മലകയറാൻ തുടങ്ങിയ അദ്ദേഹം 10.30 ഓടെ സന്നിധാനത്തെത്തി.എവിടെയും ഒന്ന് നിൽക്കുക പോലും ചെയ്യാതെയായിരുന്നു മുഖ്യമന്ത്രി മല നടന്നു കയറിയത്.തെക്കേ വശത്തു കൂടി സോപാനത്ത് എത്തിയ മുഖ്യമന്ത്രി ക്ഷേത്ര ജീവനക്കാരെയും പൂജാരിമാരെയും അഭിവാദ്യം ചെയ്തു.ക്ഷേത്രത്തിനുള്ളിലേക്ക് ഒരു നിമിഷം നോക്കിയ അദ്ദേഹം മാളികപ്പുറത്തേക്ക് പോയി.അവിടെ നിന്നും മേൽശാന്തി മനു നമ്പൂതിരി നൽകിയ പ്രസാദം സ്വീകരിച്ചു.തീർത്ഥാടന അവലോകന യോഗം കഴിഞ്ഞാണ് മുഖ്യമന്ത്രി തിരുമുറ്റത്തേക്ക് പോയത്.ജീവനക്കാർക്കുള്ള വടക്കേ വഴിയിലൂടെ ക്ഷേത്രത്തിൽ എത്തിയ അദ്ദേഹം കൊടിമരച്ചോട്ടിൽ നിന്നും അതിന്റെ വിവരങ്ങൾ ചോദിച്ചറിഞ്ഞു.ആദ്യമായാണ് ഒരു കമ്മ്യുണിസ്റ്റ് മുഖ്യമന്ത്രി ശബരിമല ക്ഷേത്ര സന്നിധാനത്ത് അയ്യപ്പ വിഗ്രഹത്തിനു മുന്നിലെത്തുന്നത്.തുടർന്ന് താഴെ വാവരുസ്വാമി നടയിലെത്തിയ മുഖ്യമന്ത്രി മുഖ്യ കർമ്മി അബ്ദുൽ റഷീദ് മുസ്ലിയാരിൽ നിന്നും കൽക്കണ്ടവും കുരുമുളകും ചേർത്ത പ്രസാദവും വാങ്ങി കഴിച്ചു.