കൊച്ചി:നെടുമ്പാശ്ശേരി അന്താരാഷ്ട്ര വിമാനത്താവളത്തിൽ വൻ സ്വർണ്ണ വേട്ട.മൂന്നുപേരിൽ നിന്നായി ഒരുകോടിയിലധികം രൂപ വിലമതിക്കുന്ന സ്വർണ്ണമാണ് കസ്റ്റംസ് പിടികൂടിയത്. ജിദ്ദയിൽ നിന്നും സൗദി എയർലൈൻസ് വിമാനത്തിൽ വന്ന പെരിന്തൽമണ്ണ സ്വദേശി സിദ്ദിഖിന്റെ പക്കൽ നിന്നും രണ്ടു കിലോ സ്വർണ്ണമാണ് പിടിച്ചെടുത്തത്.സ്പീക്കറിന്റെ ട്രാൻസ്ഫോർമറിലുള്ള ചെമ്പുകമ്പി നീക്കം ചെയ്ത ശേഷം പകരം സ്വർണ്ണക്കമ്പി പിടിപ്പിക്കുകയായിരുന്നു. ദുബൈയിൽ നിന്നും ജെറ്റ് എയർവെയ്‌സ് വിമാനത്തിൽ വന്ന കർണാടകം സ്വദേശിയായ സിയാവുൽ ഹഖ് കാൽപ്പാദങ്ങളിൽ ഒട്ടിച്ചു വെച്ച് കടത്താൻ ശ്രമിച്ച 466 ഗ്രാം തൂക്കമുള്ള സ്വർണ്ണ ബിസ്‌ക്കറ്റുകളും പിടികൂടി.ഷാർജയിൽ നിന്നും എയർ ഏഷ്യ വിമാനത്തിൽ വന്ന നിയസിന്റെ പക്കൽ നിന്നും 703 ഗ്രാം സ്വർണ്ണമാണ് പിടികൂടിയത്.പെർഫ്യൂം ബോട്ടിലിന്റെ അടപ്പിനകത്ത് ചെറിയ മുത്തുകളുടെ രൂപത്തിലാണ് ഇവ ഒളിച്ചു കടത്താൻ ശ്രമിച്ചത്.