കാസർകോഡ്:നാലുലക്ഷം രൂപ വിലമതിക്കുന്ന ചന്ദനമുട്ടിയുമായി രണ്ടുപേർ പിടിയിൽ.ബേഡഡുക്ക പന്നിയാടിയിലെ ഹംസ,കുണ്ടംകുഴി കാരക്കാട്ടെ കൃഷ്‌ണൻ എന്നിവരെയാണ് 20 കിലോഗ്രാം ചന്ദനമുട്ടിയുമായി പോലീസ് പിടികൂടിയത്. ഇവരോടൊപ്പമുണ്ടായിരുന്ന മുഹമ്മദ് എന്നയാൾ ഓടി രക്ഷപ്പെട്ടു.ഇന്നലെ ഉച്ചയോടെ ഹംസയുടെ വീട്ടിൽ നിന്നാണ് കാസർകോഡ് ഫോറസ്റ്റ് റേഞ്ച് ഓഫീസർ എൻ.അനിൽ കുമാറും സംഘവും ചന്ദനമുട്ടി പിടികൂടിയത്.സ്വകാര്യ ഭൂമിയിൽ നിന്നും മുറിച്ച ചന്ദനം വീട്ടിനുള്ളിൽ വെച്ച് വൃത്തിയാക്കുന്നതിനിടെയാണ് ഇവരെ ഫോറെസ്റ്റ് അധികൃതർ വളഞ്ഞത്.രണ്ടു കിലോഗ്രാം ചന്ദന ചീളുകളും പിടിച്ചെടുത്തിട്ടുണ്ട്.വനം വകുപ്പ് ഉദ്യോഗസ്ഥർക്ക് കിട്ടിയ രഹസ്യ വിവരത്തിന്റെ അടിസ്ഥാനത്തിലാണ് പരിശോധന നടത്തിയത്.രക്ഷപ്പെട്ടയാൾക്കായുള്ള തിരച്ചിൽ തുടരുകയാണ്.പ്രതികളെ ഇന്ന് രാവിലെ കാസർകോഡ് ചീഫ് ജുഡീഷ്യൽ മജിസ്‌ട്രേറ്റ് കോടതിയിൽ ഹാജരാക്കും.