തിരുവനന്തപുരം:ചിറയിൻകീഴിൽ യുവാവിന് ക്രൂര മർദനം.ബൈക്കിൽ അഭ്യാസ പ്രകടനം നടത്തിയതിനെ ചോദ്യം ചെയ്തതിനെ തുടർന്നാണ് യുവാവിന് മർദനമേറ്റത്.ചിറയിൻകീഴ് കിഴുവിലം കൊച്ചാലുംമൂട് അബൂബക്കറിന്റെ മകൻ സുധീറിനാണ് മർദനമേറ്റത്.അക്രമ ദൃശ്യം സമൂഹമാധ്യമങ്ങളിലൂടെ പുറത്തു വന്നിരുന്നു.മുടപുരം എസ്.എൻ ജംഗ്ഷന് സമീപം ഈച്ചരൻവിളാകത് താമസിക്കുന്ന അനന്തു,ശ്രീക്കുട്ടൻ എന്നിവരാണ് അക്രമം നടത്തിയതെന്ന് പോലീസ് പറഞ്ഞു.ഇതിൽ അനന്തുവിനെ പോലീസ് കസ്റ്റഡിയിലെടുത്തു.ഇയാൾ പല ക്രിമിനൽ കേസുകളിലും പ്രതിയാണ്.രണ്ടാമത്തെ പ്രതി ശ്രീക്കുട്ടന് വേണ്ടി പോലീസ് തിരച്ചിൽ നടത്തുകയാണ്. അതേസമയം സംഭവത്തിൽ ആരും പരാതി നൽകാത്തതിനെ തുടർന്ന് സിസിടിവി ദൃശ്യങ്ങളുടെ അടിസ്ഥാനത്തിലാണ് പോലീസ് കേസെടുത്തിരിക്കുന്നത്. അഭ്യാസപ്രകടനം ചോദ്യം ചെയ്ത യുവാവിനെ രണ്ടംഗസംഘം ക്രൂരമായി മർദിച്ച്‌ അവശനാക്കുന്നത് സിസിടിവി ദൃശ്യങ്ങളിൽ കാണാം.നിലത്തു വീണ ഇയാളെ ചവിട്ടുകയും ചെയ്യുന്നുണ്ട്.സ്ഥലത്ത് ആളുകൾ കൂടിയെങ്കിലും ആരും സംഭവത്തിൽ ഇടപെടുന്നില്ല.