മട്ടന്നൂർ: മട്ടന്നൂർ നഗരസഭയുടെ പുതിയ ഭരണസമിതി നാളെ രാവിലെ 11 ന് സത്യപ്രതിജ്ഞ ചെയ്ത് അധികാരമേൽക്കും. നഗരസഭ ഓഫീസിനു സമീപം പ്രത്യേകം സജ്ജമാക്കുന്ന വേദിയിലാണു ചടങ്ങ്. വരണാധികാരി ഡിഎഫ്ഒ സുനിൽ പാമിഡി മുന്പാകെ മുതിർന്ന അംഗം വി.എൻ.സത്യേന്ദ്രനാഥനാണ് ആദ്യം സത്യപ്രതിജ്ഞ ചെയ്യുക. തുടർന്ന് അദ്ദേഹം മറ്റ് അംഗങ്ങൾക്കു പ്രതിജ്ഞാവാചകം ചൊല്ലിക്കൊടുക്കും. തുടർന്ന് മുതിർന്ന അംഗത്തിന്‍റെ അധ്യക്ഷതയിൽ ആദ്യ കൗൺസിൽ യോഗം ചേരും. നഗരസഭാ ചെയർമാനെയും വൈസ് ചെയർമാനെയും തെരഞ്ഞെടുക്കേണ്ടതു സംബന്ധിച്ച അറിയിപ്പ് കൗൺസിൽ യോഗത്തിൽ നൽകും. 14നാണ് തെരഞ്ഞെടുപ്പ്.നഗരസഭ രൂപീകരിച്ചതിനുശേഷം അഞ്ചാംതവണയും എൽഡിഎഫാണ് അധികാരത്തിൽ വരുന്നത്. ഇക്കുറി ആകെയുള്ള 35 സീറ്റിൽ 28 സീറ്റ് എൽഡിഎഫിനും ഏഴു സീറ്റ് യുഡിഎഫിനുമാണ് ലഭിച്ചത്. ചെയർമാൻസ്ഥാനം വനിതാസംവരണമാണ്. ചെയർപേഴസ്ൺ സ്ഥാനത്തേക്ക് നെല്ലുന്നി വാർഡിൽനിന്നു വിജയിച്ച സിപിഎമ്മിലെ അനിത വേണുവിനെയും വൈസ് ചെയർമാൻ സ്ഥാനത്തേക്ക് സിപിഎം ജില്ലാ കമ്മിറ്റി അംഗം പി.പുരുഷോത്തമനെയുമാണ് പരിഗണിക്കുന്നത്.