പത്തനാപുരം: വിദ്യാര്‍ഥികള്‍ തമ്മിലുണ്ടായ സംഘട്ടനത്തില്‍ കെ.എസ്.യു. ജില്ലാ നേതാവിന് ഗുരുതര പരിക്ക്. പട്ടാഴി സ്വദേശി യദുകൃഷ്ണനാണ് പത്തനാപുരം സെന്റ് സ്റ്റീഫന്‍സ് കോളേജില്‍ നടന്ന ക്രൂരമായ മര്‍ദ്ദനത്തില്‍ പരിക്കേറ്റത്.യദുകൃഷ്ണനെ കൊല്ലത്തെ സ്വകാര്യ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.കോളേജ് കവാടത്തില്‍ കെ.എസ്.യു. യൂണിറ്റ് ഉദ്ഘാടനവും എസ്.എഫ്.ഐ. ദിനാചരണവും നടക്കുന്നതിനിടെയാണ് സംഘര്‍ഷമുണ്ടായത്. യദുകൃഷ്ണനെ എസ്.എഫ്.ഐ.ക്കാര്‍ വളഞ്ഞുവച്ച് മര്‍ദ്ദിക്കുകയായിരുന്നുവെന്ന് കെ.എസ്.യു. പ്രവര്‍ത്തകര്‍ പറയുന്നു. കമ്പുകൊണ്ടുള്ള അടിയേറ്റ് കാലൊടിഞ്ഞു, തലപൊട്ടി, ശരീരമാസകലം മുറിവേറ്റു.പത്തനാപുരത്തെ സ്വകാര്യ ആസ്പത്രിയില്‍ പ്രവേശിപ്പിച്ച് കാലില്‍ പ്ലാസ്റ്ററിട്ട ശേഷം പരിക്ക് ഗുരുതരമാണെന്നറിയിച്ചതോടെ കൊല്ലത്തേക്ക് കൊണ്ടുപോവുകയായിരുന്നു.