ഇരിക്കൂർ: സംസ്ഥാനപാതയിൽ ബസ് ഇടിച്ചു ലോറി മറിഞ്ഞു. പരുക്കേറ്റ മിനിലോറി ഡ്രൈവർ കുയിലൂരിലെ കപ്പള്ളി ബിജു(33)വിനെ കണ്ണൂർ എകെജി ആശുപത്രിയിൽ പ്രവേശിപ്പിച്ചു. തളിപ്പറമ്പ് – ഇരിട്ടി സംസ്ഥാനപാതയിൽ പെരുമണ്ണ് സ്കൂൾവളവിൽ ഇന്നലെ ഉച്ചയ്ക്കായിരുന്നു അപകടം. പടിയൂരിൽ നിന്നു ചെങ്കൽ കയറ്റി ഇരിക്കൂർ ഭാഗത്തേക്കു വന്ന മിനിലോറിയുടെ പിറകിൽ ഇരിട്ടി–തളിപ്പറമ്പ് റൂട്ടിൽ ഓടുന്ന സ്വകാര്യ ബസ് ഇടിച്ചു തെറിപ്പിക്കുകയായിരുന്നു. സ്കൂൾവളവിലെ കയറ്റത്തിൽ മിനിലോറിയെ മറി കടക്കുവാനുള്ള ശ്രമത്തിനിടയിലാണ് അപകടം. ഇടിയുടെ ആഘാതത്തിൽ തെറിച്ചു നിയന്ത്രണം വിട്ട ലോറി റോഡരികിലെ മൺതിട്ടയിൽ പാഞ്ഞുകയറി സംസ്ഥാന പാതയിലേക്കു തന്നെ മറിയുകയായിരുന്നു.ഇരിക്കൂർ എസ്ഐ പ്രദീപന്റെ നേതൃത്വത്തിൽ നാട്ടുകാരും യാത്രക്കാരും ചേർന്നു രക്ഷാപ്രവർത്തനം നടത്തി.അപകടത്തെത്തുടർന്ന് ഇരിക്കൂർ–ഇരിട്ടി സംസ്ഥാന പാതയിൽ അരമണിക്കൂറോളം ഗതാഗതം തടസ്സപ്പെട്ടു.