ഇരിട്ടി ∙ ഇരിട്ടി പാലത്തിൽ ബസിടിച്ച് സ്കൂട്ടർ യാത്രികനു പരുക്കേറ്റു. അപകടത്തിൽ സ്കൂട്ടറും യാത്രികന്റെ കാലും ബസ് ടയറിൽ കുടുങ്ങി. കാലിനു പരുക്കേറ്റ കണിച്ചാർ സ്വദേശി വേണു (63) വിനെ ഇരിട്ടി കാരുണ്യ ആശുപത്രിയിൽ പ്രവേശിപ്പിച്ചു.അപകടത്തെ തുടർന്ന് പാലത്തിൽ അര മണിക്കൂറോളം ഗതാഗതം മു‍ടങ്ങി. മടിക്കേരിയിൽ നിന്നു കണ്ണൂരിലേക്കു വരികയായിരുന്ന എസ്ആർഎസ് ബസ്, മുന്നിലായി പാലത്തിലേക്കു കയറാൻ ശ്രമിക്കുകയായിരുന്ന സ്കൂട്ടറിൽ ഇടിച്ചു കയറുകയായിരുന്നു.സ്കൂട്ടറും വേണുവിന്റെ വലതുകാലും ബസിന്റെ മുൻചക്രത്തിനുള്ളിൽ കുടുങ്ങി. ഓടിക്കൂടിയ നാട്ടുകാരും വാഹനങ്ങളിൽ ഉള്ളവരും ചേർന്ന് ഏറെ പണിപ്പെട്ട് ബസ് ഉയർത്തി വേണുവിനെയും സ്കൂട്ടറും പുറത്തെടുക്കുകയായിരുന്നു.സ്കൂട്ടറിന്റെ പിറകിൽ സഞ്ചരിച്ച സുഹൃത്ത് പുറത്തേക്കു തെറിച്ചു വീണതിനാൽ പരുക്കേൽക്കാതെ രക്ഷപ്പെട്ടു.