പയ്യന്നൂർ:പട്ടാപ്പകൽ പുതിയ ബസ് സ്റ്റാൻഡ് പരിസരത്തു ലോറിയിൽ മാലിന്യം കൊണ്ടുവന്നു തള്ളി. ഇന്നലെ പത്തര മണിയോടെ വെള്ളൂരിൽ നിന്നാണ് ലോറിയിൽ മാലിന്യം കൊണ്ടുവന്നു തള്ളിയത്. സംഭവം കണ്ട പരിസരവാസികൾ ദൃശ്യം മൊബൈലിൽ പകർത്തി നഗരസഭ അധ്യക്ഷനെ അറിയിച്ചു. നഗരസഭ ജീവനക്കാർ എത്തുമ്പോഴേക്കും മാലിന്യം തള്ളിയവർ വാഹനവുമായി കടന്നിരുന്നു. വാഹന നമ്പർ ആർടിഒ അധികൃതർക്ക് കൈമാറി വാഹന ഉടമസ്ഥനെ കണ്ടെത്തി. വാഹന ഉടമയില്‍ നിന്ന് നഗരസഭ 10,000 രൂപ പിഴ ഈടാക്കി. മാലിന്യം തിരിച്ചെടുപ്പിക്കുകയും ചെയ്തു.രാത്രികാലങ്ങളിൽ വിവിധ പ്രദേശങ്ങളിൽ നിന്നു പയ്യന്നൂരിൽ വാഹനങ്ങളിൽ മാലിന്യം കൊണ്ടുവന്നു തള്ളാറുണ്ടായിരുന്നു. ഇതു കണ്ടെത്തുന്നതിനു വിവിധ പ്രദേശങ്ങളിൽ ജനങ്ങളുടെ സ്ക്വാഡുകൾ രൂപീകരിച്ചിട്ടുണ്ട്.