തിരുവനന്തപുരം:മൂന്നാറിലെ അനധികൃത കയ്യേറ്റങ്ങൾക്കെതിരെ ശക്തമായ നടപടികൾ സ്വീകരിച്ച് ശ്രദ്ധേയനായ ദേവികുളം സബ് കളക്ടർ ശ്രീറാം വെങ്കിട്ടരാമനെ സ്ഥലം മാറ്റി.മാനന്തവാടി സബ്‌കളക്ടർക്കാണ് പകരം ചുമതല നൽകിയിരിക്കുന്നത്.ഇന്ന് നടന്ന മന്ത്രിസഭാ യോഗത്തിലാണ് ശ്രീറാമിനെ സ്ഥലം മാറ്റാനുള്ള തീരുമാനം ഉണ്ടായത്.എംപ്ലോയ്‌മെന്റ് ആൻഡ് ട്രെയിനിങ് ഡയറക്ടറുടെ ചുമതലയാണ് ശ്രീറാമിന് നൽകിയിട്ടുള്ളത്.വകുപ്പ് മേധാവിയായി സ്ഥാന കയറ്റം നൽകുകയായിരുന്നു എന്നാണ് സർക്കാർ വിശദീകരിക്കുന്നത്.ഭൂമാഫിയക്കെതിരെ ശക്തമായി നടപടി സ്വീകരിച്ച ശ്രീറാമിനെ മാറ്റാൻ സർക്കാരിന് സമ്മർദമുണ്ടായിരുന്നുവെന്നാണ് സൂചന.എന്നാൽ സബ്‌കളക്ടറെ മാറ്റിയതിൽ സി.പി.ഐ പരസ്യമായി രംഗത്തു വന്നിട്ടുണ്ട്.അതേസമയം ശ്രീറാമിനെ മാറ്റിയത് സ്വാഭാവിക നടപടി മാത്രമാണെന്ന് റവന്യൂ മന്ത്രി ഇ.ചന്ദ്രശേഖരൻ പറഞ്ഞു.എല്ലാ കാലത്തും ഒരേ പോസ്റ്റിൽ തന്നെ തുടരാൻ സാധിക്കില്ലെന്നും സ്ഥലം മാറ്റം മറ്റുരീതിയിൽ വ്യാഖ്യാനിക്കേണ്ട കാര്യമില്ലെന്നും മന്ത്രി കൂട്ടിച്ചേർത്തു.