ഭോപ്പാൽ:മധ്യപ്രദേശിൽ വിവാഹസംഘം സഞ്ചരിച്ച ബസ് നദിയിലേക്ക് മറിഞ്ഞ് 22 പേർ മരിച്ചു. ഭോപ്പാലിൽ നിന്നും 680 കിലോമീറ്റർ അകലെ സിധി ജില്ലയിലെ അമേലിയയിൽ സോണെ നദിയിലേക്ക് വിവാഹം സംഘം സഞ്ചരിച്ച ബസ് മറിയുകയായിരുന്നു. ചൊവ്വാഴ്ച രാത്രി 10 ന് ആയിരുന്നു സംഭവം. സിവഹയിലെ പാംറിയ ഗ്രാമത്തിൽ നിന്നും വരന്റെ ആൾക്കാരുമായി പോയ ബസ് സിദ്ധി ജില്ലയിലെ ജോഗ്‌ദഗഹ പാലത്തിൽ വെച്ച് നിയന്ത്രണം വിട്ട് പാലത്തിന്റെ കൈവരി തകർത്ത് നൂറടി താഴ്ചയിലുള്ള സോൺ നദിയിലേക്ക് പതിക്കുകയായിരുന്നു.ബസ്സിനുള്ളിൽ നിരവധിപേർ കുടുങ്ങിക്കിടക്കുന്നതിനാൽ മരണസംഘ്യ ഇനിയും ഉയരാനാണ്‌ സാധ്യത.സംഭവത്തിൽ 23 പേർക്ക് പരിക്കേൽക്കുകയും ചെയ്തു. ബസിൽ 45 പേരാണ് ഉണ്ടായിരുന്നത്. പോലീസും അഗ്നിരക്ഷാസേനയും ചേർന്ന രക്ഷാപ്രവർത്തനം തുടരുകയാണ്.