February 2022

കോട്ടയം: നടന്‍ കോട്ടയം പ്രദീപ്(61) അന്തരിച്ചു. ഹൃദയാഘാതത്തെ തുടര്‍ന്ന് കോട്ടയത്തായിരുന്നു അന്ത്യം. പുലര്‍ച്ചെ മൂന്ന് മണിയോടെയാണ് അദ്ദേഹത്തിന് ഹൃദയാഘാതം ഉണ്ടായത്. തുടര്‍ന്ന് അടുത്തുള്ള സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.പ്രത്യേക സംഭാഷണശൈലി കൊണ്ടും പ്രത്യേക അഭിനയശൈലി കൊണ്ടും മലയാള സിനിമയില്‍ ഏറെ പെട്ടന്ന് ശ്രദ്ധേയനായ വ്യക്തിയാണ് കോട്ടയം പ്രദീപ്. 2001ല്‍ റിലീസ് ചെയ്ത ഈ നാട് ഇന്നലെ വരെ എന്ന ഐ.വി.ശശി ചിത്രത്തില്‍ ജൂനിയര്‍ ആര്‍ട്ടിസ്റ്റായി ചലച്ചിത്ര ജീവിതം ആരംഭിച്ചു.ഐവി ശശി സംവിധാനം ചെയ്ത ‘ഈ നാട് ഇന്നലെ വരെ’ എന്ന ചിത്രത്തിലൂടെയാണ് ജൂനിയര്‍ ആര്‍ട്ടിസ്റ്റായി സിനിമാ ജീവിതം ആരംഭിച്ച പ്രദീപ് പിന്നീട് നിരവധി ചിത്രങ്ങളില്‍ വേഷമിട്ടു. വിണ്ണൈത്താണ്ടി വരുവായാ, തട്ടത്തിന്‍ മറയത്ത്, ആട്, വടക്കന്‍ സെല്‍ഫി, കട്ടപ്പനയിലെ ഋത്വിക് റോഷന്‍, തോപ്പില്‍ ജോപ്പന്‍, കുഞ്ഞിരാമായണം തുടങ്ങിയവ പ്രധാന ചിത്രങ്ങളായിരുന്നു. വിണ്ണൈ താണ്ടി വരുവായ എന്ന തമിഴ് ചിത്രത്തിലെ റോള്‍ വളരെയധികം ശ്രദ്ധിക്കപ്പെട്ടു.2020ല്‍ പുറത്തിറങ്ങിയ പാപം ചെയ്യാത്തവര്‍ കല്ലെറിയട്ടെ ആണ് പ്രദീപിന്റെ അവസാന ചിത്രം.1989 മുതല്‍ എല്‍ഐസി ജീവനക്കാരനായിരുന്നു. ഭാര്യ: മായ, മക്കള്‍: വിഷ്ണു, വൃന്ദ.

ആലപ്പുഴ: കുമാരപുരത്ത് ബിജെപി പ്രവര്‍ത്തകന്‍ കുത്തേറ്റു മരിച്ചു.വാര്യംകോട് സ്വദേശി ശരത് ചന്ദ്രനാണ് മരിച്ചത്. ക്ഷേത്രോത്സവത്തിനിടെ ഉണ്ടായ തര്‍ക്കമാണ് കൊലപാതകത്തില്‍ കലാശിച്ചതെന്നാണ് വിവരം. ഇന്നലെ രാത്രി പന്ത്രണ്ടരയോട് കൂടിയായിരുന്നു കൊലപാതകം. നന്ദു പ്രകാശ് എന്നയാളുടെ നേതൃത്വത്തിലുള്ള ഏഴംഗ സംഘമാണ് കൊലപാതകത്തിന് പിന്നിലെന്ന് പൊലീസ് തിരിച്ചറിഞ്ഞിട്ടുണ്ട്. പ്രതികളെ ഉടന്‍ തന്നെ പിടികൂടുമെന്ന് പൊലീസ് അറിയിച്ചു.ജില്ലയില്‍ ലഹരി മാഫിയാ സംഘങ്ങള്‍ തുടര്‍ച്ചയായി പ്രശ്നങ്ങള്‍ സൃഷ്ടിക്കുകയാണെന്ന് നേരത്തെ തന്നെ പരാതികളുയര്‍ന്നിരുന്നു. അതേസമയം സംഭവത്തിന് പിന്നില്‍ സിപിഎം-ഡിവൈഎഫ്‌ഐ പിന്തുണയുള്ള ലഹരിമരുന്ന് സംഘമാണെന്ന് ബിജെപി ആരോപിച്ചു.

കൽപറ്റ: കോഴിക്കോട്– വയനാട് ജില്ലകളെ ബന്ധിപ്പിക്കുന്ന ആനക്കാംപൊയിൽ– കള്ളാടി– മേപ്പാടി തുരങ്കപ്പാതയ്ക്ക് 2134.5 കോടി രൂപയുടെ കിഫ്ബി ധനാനുമതി ലഭിച്ചു.ഇന്നലെ ചേർന്ന കിഫ്ബി ബോർഡ് യോഗം ധനാനുമതി നൽകിയ പദ്ധതികളിൽ സംസ്ഥാനത്തു തന്നെ ഏറ്റവുമധികം തുക അനുവദിച്ചത് തുരങ്കപ്പാതയ്ക്കായാണ്. തുരങ്കപ്പാതയുടെ വിശദ പദ്ധതി രേഖ പ്രകാരമാണ് തുക അനുവദിച്ചിരിക്കുന്നത്.നേരത്തെ തുരങ്കപ്പാതയ്ക്ക് 658 കോടി രൂപയുടെ ഭരണാനുമതി നൽകിയിരുന്നു.പിന്നീട് കൊങ്കൺ റെയിൽവേ കോർപറേഷൻ തയാറാക്കിയ ഡിപിആർ പ്രകാരമാണ് 2134 കോടി രൂപയുടെ ചെലവ് വരുമെന്നു കണക്കാക്കിയത്. സർക്കാരിന്റെ നൂറു ദിന കർമപദ്ധതിയിൽ ഉൾപ്പെടുത്തി 2020 ഒക്ടോബർ 5നാണ് മുഖ്യമന്ത്രി പിണറായി വിജയൻ തുരങ്കപാത പദ്ധതി പ്രഖ്യാപനം നടത്തിയത്.തുരങ്കപ്പാത പഠനം, പദ്ധതി നിർവഹണം എന്നിവയുടെ സ്പെഷൽ പർപ്പസ് വെഹിക്കിൾ ആയി കൊങ്കൺ റെയിൽവേ കോർപറേഷനെ സർക്കാർ ഏൽപിച്ചു. 2020 ഡിസംബർ 22 നു തുരങ്കപ്പാതയുടെ സർവേ പ്രവർത്തനങ്ങൾ പൂർത്തിയായി. ഡിസംബർ 24നു പാരിസ്ഥിതിക ആഘാതപഠനം ആരംഭിച്ചു.2021 ജനുവരിയിൽ അലൈൻമെന്റ് അംഗീകരിച്ചു. മറിപ്പുഴയിൽ നിന്ന് തുടങ്ങി മേപ്പാടി മീനാക്ഷി പാലത്തിൽ അവസാനിക്കുന്ന തരത്തിലുള്ള അലൈൻമെന്റിനാണ് അംഗീകാരം ലഭിച്ചത്. 3 വർഷം കൊണ്ട് പൂർത്തീകരിക്കുന്ന വിധത്തിലാണ് പദ്ധതി. കോഴിക്കോട്, വയനാട് കലക്ടര്‍മാരുടെ നേതൃത്വത്തില്‍ തുരങ്കപ്പാതയുടെ സ്ഥലമേറ്റെടുക്കലിനുള്ള പ്രാഥമിക നടപടികള്‍ക്കു തുടക്കം കുറിച്ചിട്ടുണ്ട്.