February 2022

കണ്ണുര്‍: പയ്യാമ്പലത്തെ സൂഫി മക്കാനി ഹോട്ടല്‍ ഉടമ തായത്തെരു കലിമയില്‍ പള്ളിക്കണ്ടി ജസീറിനെ (35)ആയിക്കരയില്‍ വെച്ചു കുത്തിക്കൊലപ്പെടുത്തിയ സംഭവത്തില്‍ പ്രതികളെ പൊലീസ് കസ്റ്റഡിയില്‍ വിട്ടു.കണ്ണൂര്‍ സബ് ജയിലില്‍ കഴിയുന്ന ഒന്നും രണ്ടും പ്രതികളായ ആയിക്കര സ്വദേശി റബീഹ്, ഉരുവച്ചാല്‍ സ്വദേശി ഹനാന്‍ എന്നിവരെയാണ് കസ്റ്റഡിയില്‍ വിട്ടത്.തിങ്കളാഴ്‌ച്ച രാവിലെ 11-ഓടെയാണ് പ്രതികളെ ജുഡിഷ്യല്‍ ഫസ്റ്റ് ക്ലാസ് മജിസ്‌ടേറ്റ് രണ്ട് കോടതിയില്‍ ഹാജരാക്കിയത്. കേസന്വേഷണ ഉദ്യോഗസ്ഥന്റെ അപേക്ഷ പരിഗണിച്ച കോടതി ചൊവ്വാഴ്‌ച്ച വൈകീട്ട് അഞ്ചുമണി വരെയാണ് കസ്റ്റഡിയില്‍ വിട്ടു കൊടുത്തത്. ഇരുവരെയും സംഭവ സ്ഥലത്ത് എത്തിച്ച്‌ തെളിവെടുക്കുമെന്ന് സിറ്റി സിഐ അറിയിച്ചു.പ്രതികൾ ഉപയോഗിച്ചെന്ന് കരുതുന്ന ആയുധം നേരത്തെ കണ്ടെത്തിയിരുന്നു. ഇത് ഫോറന്‍സിക് പരിശോധനയ്ക്ക് അയച്ചിരിക്കുകയാണ്. ജസീറിന്റെ കൊലപാതകത്തെ തുടര്‍ന്ന് കണ്ണൂര്‍ സിറ്റി കേന്ദ്രീകരിച്ചു പ്രവര്‍ത്തിക്കുന്ന ലഹരി മാഫിയക്കെതിരെ പൊലിസ് നടപടി ശക്തമാക്കിയിട്ടുണ്ട്.

കണ്ണൂര്‍: അഴീക്കോട് കപ്പക്കടവിനു സമീപം നിയന്ത്രണം വിട്ട ബൈക്ക് വൈദ്യുതി തൂണിലിടിച്ചു യുവാവ് മരിച്ചു.ചിറക്കല്‍ പുതിയാപ്പറമ്പ് ജവഹര്‍ ഭവന്‍ സീനാ നിവാസില്‍ ധ്രുവ രാജാണ് മരിച്ചത്.19 വയസ്സായിരുന്നു.അഴിക്കല്‍ പാമ്ബാടി ഉത്സവം കണ്ടു ഇന്നലെ രാത്രി വൈകി മടങ്ങിവരുമ്പോഴാണ് അപകടം. ബാബുരാജ് – സീന മകനാണ്. മൃതദേഹം ജില്ലാ ആശുപത്രി മോര്‍ച്ചറി യില്‍. സംസ്‌കാരം ഇന്ന് ഉച്ചയ്ക്ക് രണ്ടു മണിക്ക് കണ്ണൂര്‍ പയ്യാമ്പലത്ത്.

വയനാട്: സമൂഹമാദ്ധ്യമങ്ങളിലൂടെ പോലീസിനെ വെല്ലുവിളിച്ച് പോസ്റ്റിട്ട  ഗുണ്ടാ നേതാവ് പല്ലൻ ഷൈജു പിടിയിൽ. വയനാട്ടിലെ ഒരു റിസോർട്ടിൽ നിന്നുമാണ് കോട്ടക്കൽ പോലീസ് ഷൈജുവിനെ പിടികൂടിയത്. നിരവധി കൊലപാതക, ഹൈവേ കവർച്ചാകേസുകളിലെ പ്രതിയാണ് ഇയാൾ.കാപ്പ ചുമത്തി നാടു കടത്തപ്പെട്ട പല്ലന്‍ ഷൈജു അടുത്തിടെ പോലീസിനെ വെല്ലുവിളിച്ച്‌ സമൂഹമാധ്യമങ്ങളിലൂടെ വീഡിയോ പോസ്റ്റ് ചെയ്തിരുന്നു. ഇതിനു പിന്നാലെ ഇയാള്‍ക്കായി പോലീസ് തെരച്ചില്‍ ശക്തമാക്കുകയായിരുന്നു. കൊടകര സ്വദേശിയായ ഷൈജുവിനെ തൃശൂര്‍ റൂറല്‍ പോലീസാണ് കാപ്പ ചുമത്തി നാടുകടത്തിയത്.ഒരു വർഷത്തേയ്‌ക്ക് തൃശ്ശൂർ ജില്ലയിൽ കാൽകുത്തുന്നതിൽ നിന്നും ഇയാളെ വിലക്കിയിരുന്നു. ജില്ലയിൽ പ്രവേശിച്ചെന്ന് തെളിഞ്ഞാൽ, മൂന്ന് വർഷം വരെ വിചാരണ കൂടാതെ തടവിൽ പാർപ്പിക്കുമെന്നാണ് പോലീസ് അറിയിച്ചത്.ഇയാള്‍ കൊലപാതകം, കവര്‍ച്ച, കുഴല്‍പ്പണം, കഞ്ചാവ് കടത്ത് ഉള്‍പ്പെടെ നിരവധി കേസുകളില്‍ പ്രതിയാണ്. ഇന്ന് പുലർച്ചെയാണ് ഷൈജു വയനാട്ടിലെ റിസോർട്ടിൽ നിന്നും പിടിയിലായത്. മലപ്പുറം എസ്പിയ്‌ക്ക് ലഭിച്ച രഹസ്യവിവരത്തിന്റെ അടിസ്ഥാനത്തിൽ പോലീസ് ഇയാളെ പിടികൂടാൻ വലവിരിക്കുകയായിരുന്നു. കഴിഞ്ഞ ദിവസമാണ് പോലീസിനെ വെല്ലുവിളിച്ചും പരിഹസിച്ചും ഷൈജു സമൂഹമാദ്ധ്യമങ്ങളിൽ പോസ്റ്റ് പങ്കുവെച്ചത്. അതിർത്തിയിലും, കടലിലും താൻ ഉണ്ടെന്ന് പറഞ്ഞാണ് പോലീസിനെ ഇയാൾ വെല്ലുവിളിച്ചത്.പോലീസ് നാടുകടത്തിയതിന്റെ പ്രകോപനത്തിലാണ് ഇയാൾ പോലീസിനെ വെല്ലുവിളിച്ച് ഒരു വീഡിയോ സന്ദേശമിട്ടത്.

കണ്ണൂര്‍: കണ്ണൂരില്‍ അനധികൃതമായി വില്‍പ്പനയ്ക്ക് ശ്രമിച്ച 18 ലിറ്ററോളം വിദേശ മദ്യവും 15 കുപ്പി ബിയറും പിടികൂടി.മാഹിയില്‍ നിന്നും വാങ്ങി കണ്ണൂരിലെത്തിച്ച്‌ വില്‍ക്കാനായിരുന്നു ശ്രമം. മദ്യം കടത്താന്‍ ശ്രമിച്ച ഓട്ടോറിക്ഷയും കസ്റ്റഡിയിലെടുത്തു.സംഭവത്തില്‍ കൂത്തുപറമ്പ് ചെണ്ടയാട് സ്വദേശി ജിന്‍സില്‍ ലാലിനെ എക്‌സൈസ് സംഘം അറസ്റ്റ് ചെയ്തു. ചെണ്ടയാട് ചെങ്കല്‍ മേഖലയില്‍ ജോലി ചെയ്യുന്ന ഇതരസംസ്ഥാന തൊഴിലാളികള്‍ക്കാണ് മദ്യം കൊണ്ടുവന്നതെന്ന് ജിന്‍സിന്‍ മൊഴി നല്‍കി.