തൃശ്ശൂര്‍: ചാലക്കുടിക്കടുത്ത് കൊടകരയില്‍ കേരളാ പൊലീസിന്റെ ചരിത്രത്തിലെ ഏറ്റവും വലിയ കഞ്ചാവ് വേട്ട. 450 കിലോയിലധികം കഞ്ചാവുമായി മൂന്ന് പേര്‍ പിടിയിലായി. അഞ്ച് കോടി രൂപയോളം ചില്ലറ വിപണി വിലയുള്ള മുന്തിയ ഇനം കഞ്ചാവാണ് ചാലക്കുടി ഡിവൈഎസ്പിയും സി ആര്‍ സന്തോഷും സംഘവും ചേര്‍ന്ന് പിടികൂടിയത്.ചരക്കുലോറിയില്‍ അതിവിദഗ്ധമായി ഒളിപ്പിച്ച് കടത്തുകയായിരുന്നു. ലോറിയില്‍ കടലാസ് കെട്ടുകള്‍ക്കിടയില്‍ ഒളിപ്പിച്ച നിലയിലായിരുന്നു കഞ്ചാവ്.സംഭവത്തില്‍ കൊടുങ്ങല്ലൂര്‍ സ്വദേശി ലുലു (32), തൃശൂര്‍ വടക്കാഞ്ചേരി പെരിങ്ങണ്ടൂര്‍ സ്വദേശി ഷാഹിന്‍ (33), മലപ്പുറം പൊന്നാനി സ്വദേശി സലീം (37 ) എന്നിവരാണ് അറസ്റ്റിലായത്. കഞ്ചാവ് മാഫിയക്കെതിരെ പൊലീസ് നടത്തുന്ന ‘മിഷന്‍ ഡാഡ്’ ഓപറേഷന്റെ ഭാഗമായുള്ള പ്രത്യേക പരിശോധനയായിരുന്നു കഞ്ചാവ് വേട്ട.
