കൊച്ചി: ചെലവന്നൂരിലെ ഫ്‌ലാറ്റ് കേന്ദ്രീകരിച്ച് നടന്ന ചൂതാട്ടവുമായി ബന്ധപ്പെട്ട് കൂടുതൽ വിവരങ്ങൾ പുറത്ത്. ലക്ഷങ്ങളുടെ ഇടാപാടാണെന്ന് ഓരോ കളിയിലും നടന്നതെന്ന് പോലീസ് കണ്ടെത്തി. ആഴ്ചയിൽ രണ്ട് ദിവസമാണ് ഇവിടെ ചൂതാട്ടം നടന്നിരുന്നത്. കൊച്ചി വാഹനാപകടത്തിൽ മോഡലുകൾ മരിച്ച കേസിൽ അറസ്റ്റിലായ സൈജു തങ്കച്ചന്റെ ലഹരിപാർട്ടികളുമായി ബന്ധപ്പെട്ട പരിശോധനയിലാണ് പോലീസ് ഫ്‌ലാറ്റിൽ റെയ്ഡ് നടത്തിയത്. കൊച്ചി നഗരത്തിലെ പ്രധാനപ്പെട്ട നിരവധി വ്യക്തികൾ ചൂതാട്ടത്തിൽ പങ്കെടുത്തിട്ടുണ്ട്. ലക്ഷക്കണക്കിന് രൂപയുടെ ഇടപാടാണ് നടന്നത്. പോക്കർ കോയിനുകൾ ഉപയോഗിച്ചുളള ചൂതാട്ടമാണ് നടന്നിരുന്നത്.ചെലവന്നൂരിലെ ഹീര ഫ്‌ലാറ്റ് സമുച്ചയത്തിലെ പതിനെട്ടാം നിലയിലുള്ള ഡ്യൂപ്ലെ ഫ്‌ലാറ്റിലാണ് ചൂതാട്ടകേന്ദ്രം. അറുപതിനായിരം രൂപ കൊടുത്ത് വാടകയ്‌ക്ക് എടുത്ത ഫ്‌ലാറ്റിന്റെ മുകൾ ഭാഗത്തുള്ള മുറിയാണ് ചൂതാട്ട കേന്ദ്രമായി സജ്ജീകരിച്ചിരിക്കുന്നത്. കഴിഞ്ഞ ആറ് മാസമായി ഇത് സജീവമായി പ്രവർത്തിക്കുകയായിരുന്നു. മാഞ്ഞാലി സ്വദേശി ടിപ്‌സന്റെ ഫോണിൽ നിന്നും ഇതുമായി ബന്ധപ്പെട്ട വിവരങ്ങൾ ലഭിച്ചിട്ടുണ്ട്. സൈജു തങ്കച്ചൻ നൽകിയ മൊഴിയുടെ അടിസ്ഥാനത്തിലാണ് കൊച്ചിയിലെ വിവിധ ഫ്‌ലാറ്റുകളിൽ പോലീസ് സംഘവും നർകോട്ടിക്ക്‌സ് സംയുക്തമായി പരിശോധന നടത്തിയത്. ഇവിടെ നിന്നും ലഹരി ഉപയോഗിക്കുന്ന പേപ്പറുകളും മറ്റ് വസ്തുക്കളും കണ്ടെടുത്തിട്ടുണ്ട്.
