കണ്ണൂർ: വി സി നിയമന വിവാദവുമായി ബന്ധപ്പെട്ട് കണ്ണൂര്‍ സര്‍വകലാശാല ആസ്ഥാനത്തേക്ക് യൂത്ത് കോണ്‍ഗ്രസ് നടത്തിയ പ്രതിഷേധം അക്രമാസക്തമായി. വൈസ് ചാന്‍സലറെ പുറത്താക്കണമെന്ന ആവശ്യവുമായാണ് പ്രതിഷേധം. പ്രതിഷേധക്കാര്‍ക്ക് നേരെ പൊലീസ് ജലപീരങ്കി പ്രയോഗിച്ചു.യൂത്ത് കോണ്‍ഗ്രസിന്റെ മാര്‍ച്ച്‌ സര്‍വകലാശാലയുടെ പ്രധാന കവാടത്തിനുമുന്നില്‍ പൊലീസ് ബാരിക്കേഡ് കെട്ടി തടഞ്ഞു. ‘പിണറായി വക കമ്മ്യൂണിസ്റ്റ് പാഠശാല’ എന്നെഴുതിയ ബാനര്‍ യൂത്ത് കോണ്‍ഗ്രസ് പ്രവര്‍ത്തകര്‍ കവാടത്തിന് മുന്നില്‍ സ്ഥാപിച്ചു.തന്റെ നിയമനം നിയമപരമല്ലെങ്കില്‍ എന്തിന് ഗവര്‍ണര്‍ ഒപ്പിട്ടുവെന്ന് കണ്ണൂര്‍ സര്‍വകലാശാലാ വി സി പ്രൊഫസര്‍ ഗോപിനാഥ് രവീന്ദ്രന് മുന്‍പ് ചോദിച്ചിരുന്നു. കണ്ണൂര്‍ യൂണിവേഴ്സിറ്റി വൈസ് ചാന്‍സലറെ കണ്ടെത്താനുള്ള സെര്‍ച്ച്‌ കമ്മിറ്റി പിരിച്ചുവിടാനും ഡോ.ഗോപിനാഥ് രവീന്ദ്രന് പുനര്‍നിയമനം നല്‍കാനും ഉന്നത വിദ്യാഭ്യാസ മന്ത്രി ആര്‍. ബിന്ദു ഔദ്യോഗികമായി ഗവര്‍ണര്‍ക്ക് നല്‍കിയ കത്തുകള്‍ പുറത്തുവന്നിരുന്നു. ഇതിന്റെ പേരില്‍ മന്ത്രി രാജിവയ്ക്കണമെന്നും പ്രതിഷേധക്കാര്‍ മുദ്രാവാക്യം ഉയര്‍ത്തി.
