കാസർകോട്: മത്സ്യബന്ധന ബോട്ട് മറിഞ്ഞ് കാണാതായ മത്സ്യത്തൊഴിലാളികളുടെ മൃതദേഹങ്ങൾ കണ്ടെത്തി. കസബ കടപ്പുറത്ത് നിന്ന് മീന്‍പിടിക്കാന്‍ പോയ പ്രദേശവാസികളായ ശശിധരന്റെ മകന്‍ സന്ദീപ് (29), അമ്ബാടികടവന്റെ മകന്‍ രതീശന്‍ (33), ഷണ്‍മുഖന്റെ മകന്‍ കാര്‍ത്തിക് (22) എന്നിവരുടെ മൃതദേഹങ്ങളാണ് കണ്ടെത്തിയത്. ബേക്കൽ കോട്ടയ്ക്ക് സമീപത്തു നിന്നായിരുന്നു മൃതദേഹങ്ങൾ കണ്ടെത്തിയത്.മത്സ്യബന്ധനത്തിനായി പോകുന്നതിനിടെ കഴിഞ്ഞ ദിവസം രാവിലെയോടെയായിരുന്നു ബോട്ട് അപകടത്തിൽപ്പെട്ടത്. ഏഴ് പേരടങ്ങുന്ന സംഘമായിരുന്നു ബോട്ടിൽ ഉണ്ടായിരുന്നത്.നെല്ലിക്കുന്ന് വച്ചാണ് ബോട്ട് കടലിൽ മറിഞ്ഞത്.മറിഞ്ഞ ബോട്ടില്‍ പിടിച്ചു കിടന്നിരുന്ന നാല് പേരെ മത്സ്യ തൊഴിലാളികളും നാട്ടുകാരും ചേര്‍ന്ന് രക്ഷപ്പെടുത്തിയിരുന്നു. അഴിമുഖത്തോട് ചേര്‍ന്ന് മണല്‍ത്തിട്ടകള്‍ രൂപമെടുത്തിട്ടുള്ളതിനാല്‍ അപ്രതീക്ഷിതമായുണ്ടായ തിരകളാണ് അപകട കാരണമെന്നാണ് മത്സ്യ തൊഴിലാളികള്‍ പറയുന്നത്. ഭാഗീകമായി തകര്‍ന്ന നിലയില്‍ തോണി ഇന്നലെ തന്നെ കരയ്ക്കടിഞ്ഞിരുന്നു. കാണാതായ മൂന്ന് പേര്ക്ക് വേണ്ടി കോസ്റ്റല്‍ പൊലീസിന്റെ ബോട്ടും മീന്‍പിടുത്ത തൊഴിലാളികളുടെ വള്ളങ്ങളും ഫിഷറീസ് വകുപ്പിന്റെ ബോട്ട് തൈക്കടപ്പുത്ത് നിന്നും എത്തിച്ചും കാണാത്തവര്‍ക്ക് വേണ്ടിയുള്ള തിരച്ചില്‍ ഇന്നലെ നടത്തിയിരുന്നെങ്കിലും ആരെയും കണ്ടെത്താന്‍ സാധിച്ചിരുന്നില്ല.
