ന്യൂഡൽഹി:കേന്ദ്ര ബജറ്റിൽ മുതിർന്ന പൗരന്മാർക്ക് പ്രത്യേക നികുതി ഇളവുകൾ പ്രഖ്യാപിച്ചു. 75 വയസുകഴിഞ്ഞവര്‍ ഇനി മുതൽ നികുതി റിടേണ്‍ സമര്‍പിക്കണ്ട.പെന്‍ഷന്‍, പലിശ എന്നിവയിലൂടെ മാത്രം വരുമാനമുള്ളവര്‍ക്കാണ് ഈ ഇളവ്. സ്വാതന്ത്ര്യത്തിന്റെ 75-ാം വാര്‍ഷികത്തോടനുബന്ധിച്ചാണ് കേന്ദ്രസര്‍ക്കാരിന്റെ ഈ പ്രഖ്യാപനം. രണ്ടരലക്ഷം രൂപവരെ വാര്‍ഷിക വരുമാനമുള്ളവരെ ആദായനികുതിയില്‍ നിന്ന് ഒഴിവാക്കിയിട്ടുണ്ട്.വാര്‍ഷിക വരുമാനം 2,50,001 മുതല്‍ അഞ്ച് ലക്ഷം വരെയുള്ളവര്‍ക്ക് അഞ്ച് ശതമാനം നികുതിയടക്കണം. നികുതി പുനഃപരിശോധനയ്ക്കുള്ള സമയം മൂന്നു വര്‍ഷമാക്കി കുറച്ചു. നേരത്തെ ഇത് ആറ് വര്‍ഷമായിരുന്നു. പ്രവാസി ഇന്ത്യക്കാരുടെ ഇരട്ട നികുതി ഒഴിവാക്കിയിട്ടുണ്ട്.നികുതി സമ്പ്രദായം കൂടുതല്‍ സുതാര്യമാക്കും. കോര്‍പ്പറേറ്റ് നികുതി ലോകത്ത് ഏറ്റവും കുറവ് ഇന്ത്യയിലാണ്. നാനൂറോളം കസ്റ്റംസ് നികുതിയിളവുകള്‍ പിന്‍വലിക്കും. പുതിയ കസ്റ്റംസ് നികുതി ഘടന കൊണ്ടുവരും. ചെറുകിട നികുതിദായകര്‍ക്കായി തര്‍ക്ക പരിഹാര പാനല്‍ കൊണ്ടുവരും. സ്റ്റാര്‍ട്ടപ്പുകള്‍ക്ക് നികുതിയിളവ് തുടരുമെന്നും ധനമന്ത്രി വ്യക്തമാക്കി. ആദായ നികുതിയുമായി ബന്ധപ്പെട്ട തര്‍കങ്ങള്‍ പരിശോധിക്കാന്‍ പ്രത്യേക സമിതി രൂപവത്കരിക്കുമെന്നും മന്ത്രി പറഞ്ഞു
