ന്യൂഡല്‍ഹി:രാജ്യത്തെ തീവണ്ടി ഗതാഗതം സാധാരണ നിലയിലേക്കെത്തുന്നു. മലബാര്‍, മാവേലി എക്സ്പ്രസുകളുള്‍പ്പെടെ 13 തീവണ്ടികളുടെ സര്‍വീസ് പുനരാരംഭിക്കാന്‍ റെയില്‍വേ ബോര്‍ഡ് അനുമതി നല്‍കി. മാവേലി, മലബാര്‍ എക്സപ്രസ്സുകള്‍ ഈ മാസം ആദ്യ വാരം മുതല്‍ സര്‍വ്വീസ് പുനരാരംഭിക്കും.മംഗളൂരു-തിരുവനന്തപുരം മലബാര്‍ എക്സ്പ്രസ് ഈ വെള്ളിയാഴ്ച മുതലും മംഗളൂരു-തിരുവനന്തപുരം മാവേലി എക്സ്പ്രസ് ഈ മാസം പത്ത് മുതലുമാണ് ഓടിത്തുടങ്ങുക. ചെന്നൈ-തിരുവനന്തപുരം, ചെന്നൈ-മംഗളൂരു, ചെന്നൈ-പാലക്കാട്, ചെന്നൈ-ഗുരുവായൂര്‍ (തിരുവനന്തപുരം വഴി) എന്നീ വണ്ടികള്‍ ഈ മാസം എട്ടിനും മധുര-പുനലൂര്‍ എക്സ്പ്രസ് വെള്ളിയാഴ്ചയും സര്‍വീസ് ആരംഭിക്കും. ദിവസേനയുള്ള വണ്ടികളാണ് എല്ലാം കോവിഡ് കാല സ്പെഷ്യല്‍ ട്രെയിനുകൾ ആയതിനാല്‍ ഇവയില്‍ ജനറല്‍ കമ്പാർട്ട്മെന്റുകൾ ഉണ്ടാവില്ല.എല്ലാം റിസര്‍വേഷന്‍ കോച്ചുകളായിരിക്കും.ചെന്നൈ-തിരുച്ചെന്തൂര്‍, ചെന്നൈ-കാരയ്ക്കല്‍,മ ധുരവഴിയുള്ള കോയമ്പത്തൂർ-നാഗര്‍കോവില്‍, ചെന്നൈ എഗ്മോര്‍-രാമേശ്വരം, ചെന്നൈ-നാഗര്‍കോവില്‍, ചെന്നൈ-മന്നാര്‍ഗുഡി എന്നിവയാണ് വീണ്ടും സര്‍വീസ് തുടങ്ങുന്ന മറ്റുവണ്ടികള്‍. അതേസമയം പകല്‍വണ്ടികളായ പരശുറാം, ഏറനാട്, രാജ്യറാണി, അമൃത എക്സ്പ്രസുകള്‍ എന്ന് ഓടിത്തുടങ്ങുമെന്നു കാര്യത്തില്‍ തീരുമാനമായിട്ടില്ല.
