തിരുവനന്തപുരം:വിദേശരാജ്യങ്ങളിൽ നിന്നും മടങ്ങിയെത്തുന്ന പ്രവാസികൾ ക്വാറന്റൈനില്‍ കഴിയാന്‍ പണം നല്‍കണമെന്ന് മുഖ്യമന്ത്രി പിണറായി വിജയന്‍.തൊഴില്‍ നഷ്ടമായി വിദേശത്തുനിന്ന് മടങ്ങുന്നവര്‍ ഉള്‍പ്പെടെ ആര്‍ക്കും ഇക്കാര്യത്തില്‍ ഇളവ് അനുവദിക്കാനാകില്ലെന്നും മുഖ്യമന്ത്രി പറഞ്ഞു.തുക സര്‍ക്കാര്‍ നിശ്ചയിച്ച്‌ അറിയിക്കും. പാവപ്പെട്ടവര്‍ക്ക് ചെലവുകുറഞ്ഞ ക്വാറന്റീന്‍ സൗകര്യം ഏര്‍പ്പെടുത്തും.വിദേശത്ത് നിന്ന് എത്രപേര്‍ വന്നാലും ആവശ്യമായ സൗകര്യങ്ങള്‍ സംസ്ഥാനം ഏര്‍പ്പെടുത്തിയിട്ടുണ്ടെന്നായിരുന്നു പ്രവാസികള്‍ മടങ്ങിയെത്തുന്ന സമയത്തെ മുഖ്യമന്ത്രിയുടെ നിലപാട്.ഇനി മുതല്‍ വിദേശ രാജ്യങ്ങളില്‍ നിന്ന് കേരളത്തില്‍ എത്തുന്നവര്‍ ഏഴ് ദിവസത്തെ നിര്‍ബന്ധിത ക്വാറന്റൈന് പണം നല്‍കണമെന്ന് മുഖ്യമന്ത്രി പറഞ്ഞു. ഇതുവരെ സംസ്ഥാനത്ത് എത്തിയ പ്രവാസികള്‍ക്ക് 7 ദിവസം സര്‍ക്കാര്‍ നിര്‍ബന്ധിത സൗജന്യ ക്വാറന്റൈന് നല്‍കിയിരുന്നു. ഇത് ഒഴിവാക്കിയാണ് പ്രവാസികളില്‍ നിന്നും പണം ഈടാക്കുന്നത്. വിദേശ രാജ്യങ്ങളില്‍ നിന്നും തൊഴില്‍ നഷ്ടപ്പെട്ട് ഉള്‍പ്പടെ എത്തുന്ന നിരവധി പേര്‍ക്ക് ഇത് ബുദ്ധിമുട്ട് സൃഷ്ടിക്കും.അതേസമയം ഇതിനോടകം സംസ്ഥാനത്തെത്തി ഇപ്പോള്‍ ക്വാറന്റീനില് കഴിയുന്നവര്‍ക്ക് ഇത് ബാധകമല്ലെന്നും മുഖ്യമന്ത്രി പറഞ്ഞു.വിദേശ രാജ്യങ്ങളില്‍ നിന്നും വിമാനത്താവളങ്ങളില്‍ എത്തുന്നവരെ നേരെ ക്വാറന്റൈന് കേന്ദ്രങ്ങളിലേക്കാണ് മാറ്റുന്നത്. ഗര്‍ഭിണികളെ മാത്രമാണ് വീടുകളിലേക്ക് വിടുന്നത്. ഇത്തരത്തില്‍ ഏഴു ദിവസം ഇന്‍സ്റ്റിറ്റ്യൂഷണല്‍ ക്വാറന്റീനും ഏഴ് ദിവസം ഹോം ക്വാറന്റീനുമാണ് നിര്‍ദ്ദേശിച്ചിരിക്കുന്നത്.
