ലഖ്‌നൗ:പൗരത്വ ഭേദഗതി നിയമത്തിനെതിരെ അലീഗഢ്‌ മുസ്ലിം സര്‍വലകലാശാലയില്‍ നടന്ന പ്രതിഷേധത്തിനിടെ പോലീസ് വിദ്യാര്‍ഥികളെ ആക്രമിച്ചത് ജയ് ശ്രീറാം വിളിച്ചെന്ന് റിപ്പോര്‍ട്ട്.ജയ് ശ്രീറാം എന്നു മുദ്രാവാക്യം വിളിച്ചാണു പോലീസ് വിദ്യാര്‍ഥികളെ ആക്രമിച്ചതെന്നും സ്കൂട്ടറുകള്‍ക്കും വാഹനങ്ങള്‍ക്കും പോലീസ് തീയിട്ടെന്നും റിപ്പോര്‍ട്ടില്‍ ചൂണ്ടിക്കാട്ടുന്നു.യുദ്ധസമാനമായ സാഹചര്യങ്ങള്‍ സൃഷ്ടിച്ചും ഭീകരവാദികളെ നേരിടുന്നതിന് സമാനമായിട്ടുമാണ് ഉത്തര്‍പ്രദേശ് പോലീസ് വിദ്യാര്‍ഥികളെ നേരിട്ടതെന്നും റിപ്പോർട്ടിൽ പറയുന്നു.പ്രതിഷേധിച്ച വിദ്യാര്‍ഥികള്‍ക്കു നേരെ പോലീസ് സ്റ്റണ്‍ ഗ്രനേഡുകള്‍ പ്രയോഗിച്ചു.കണ്ണീര്‍ വാതക ഷെല്ലാണെന്നു കരുതി സ്റ്റണ്‍ ഗ്രനേഡ് എടുത്ത വിദ്യാര്‍ഥിക്കു കൈ നഷ്ടപ്പെട്ടു.തീവ്രവാദി എന്ന് അര്‍ഥം വരുന്ന തരത്തിലുള്ള മതപരമായ വാക്കുകളും പോലീസുകാര്‍ ഉപയോഗിച്ചു. എന്നാല്‍ കോളജ് ഈ നടപടികളെ ന്യായീകരിക്കുകയാണ് ചെയ്തതെന്നും റിപ്പോര്‍ട്ടില്‍ പറയുന്നു.മുന്‍ ഐഎഎസ് ഉദ്യോഗസ്ഥന്‍ ഹര്‍ഷ് മന്ദര്‍, അക്കാദമിക് നന്ദിനി സുന്ദര്‍, അവകാശ പ്രവര്‍ത്തകന്‍ ജോണ്‍ ദയാല്‍, എഴുത്തുകാരന്‍ നതാഷ ബദ്വാര്‍ എന്നിവര്‍ ഉള്‍പ്പെട്ട 13 അംഗ സമിതിയാണു റിപ്പോര്‍ട്ട് തയാറാക്കിയത്. സംഭവസമയത്തു ക്യാമ്പസ്സിലുണ്ടായിരുന്ന അധ്യാപകരുടെയും വിദ്യാര്‍ഥികളുടെയും മറ്റുള്ളവരുടെയും മൊഴികളുടെ അടിസ്ഥാനത്തിലാണു റിപ്പോര്‍ട്ട് തയാറാക്കിയതെന്നു സമിതി അറിയിച്ചു. എന്നാല്‍, റിപ്പോര്‍ട്ട് തള്ളിയ അലിഗഡ് സിറ്റി എസ്പി അഭിഷേക് വിദ്യാര്‍ഥികളാണ് അക്രമത്തിന് തുടക്കമിട്ടതെന്നും പോലീസ് ആത്മരക്ഷയ്ക്കായി മിനിമം ഫോഴ്സ് ഉപയോഗിക്കുകയായിരുന്നുവെന്നും പറഞ്ഞു.
