December 2019

കണ്ണൂർ:എസ്‌ഡിപിഐ പ്രകടനത്തിനിടെ തളിപ്പറമ്പിൽ സ്വകാര്യ ബസ് ജീവനക്കാർക്ക് മർദനമേറ്റു.ചൊവ്വാഴ്ച പകൽ പതിനൊന്നരയോടെയായിരുന്നു സംഭവം.പയ്യന്നൂരിലേക്ക് പോവുകയായിരുന്ന സ്വകാര്യ ബസ്സിലെ ജീവനക്കാർക്കാണ് മർദനമേറ്റത്.സാരമായി പരിക്കേറ്റ കണ്ടക്റ്റർ പെരളശ്ശേരിയിലെ അർജുൻ ബാബു(23)വിനെ പരിയാരം മെഡിക്കൽ കോളേജിൽ പ്രവേശിപ്പിച്ചു.പൗരത്വ ഭേദഗതി ബില്ലിനെതിരെ എസ്‌ഡിപിഐ പ്രവർത്തകർ നടത്തിയ പ്രകടനം താലൂക്ക് ഓഫീസിനു മുന്നിലൂടെ കടന്നുപോകുമ്പോൾ ബസ്സ്റ്റാൻഡ് കവാടത്തിൽ പ്രകടനക്കാരും റോഡിലേക്കിറങ്ങുകയായിരുന്ന ബസ്സിലെ ജീവനക്കാരും തമ്മിൽ വാക്കേറ്റമുണ്ടായി.തുടർന്ന് എസ്ഡിപിഐ പ്രവർത്തകർ ബസ്സിൽ കയറി ജീവനക്കാരെ മർദിക്കുകയായിരുന്നു.യാത്രക്കാരുടെ മുൻപിൽ വെച്ചായിരുന്നു മർദനം.സമീപത്തെ എയ്ഡ്പോസ്റ്റിൽ ഉണ്ടായിരുന്ന പോലീസുകാർ എത്തിയെങ്കിലും തടയാനായില്ല.സാരമായി പരിക്കേറ്റ അർജുൻ ബാബുവിനെ തളിപ്പറമ്പ് താലൂക്ക് ആശുപത്രിയിൽ പ്രഥമ ശുശ്രൂഷ നൽകിയതിന് ശേഷമാണ് പരിയാരത്തേക്ക് കൊണ്ടുപോയത്.സംഭവത്തെ തുടർന്ന് ടൗണിൽ നിന്നുള്ള ദീർഘദൂര ബസ്സുകൾ ഉൾപ്പെടയുള്ള ബസ്സുകൾ മിന്നൽ പണിമുടക്ക് നടത്തി.

അതേസമയം അർജുൻ ബാബുവിനെ മർദിച്ച സംഭവത്തിൽ അഞ്ച് എസ്ഡിപിഐ പ്രവർത്തകരെ പോലീസ് അറസ്റ്റ് ചെയ്തു.വധശ്രമകേസാണ് ഇവർക്കെതിരെ ചുമത്തിയിരിക്കുന്നത്. .തൽഹത്ത്(29),എം.പി മുഹമ്മദ് റാഷിദ്(23),ടി.അഫ്‌സൽ(24),വളപ്പിൽ ഹൗസിൽ അബ്ദുൽസഹീർ(28),എം.പി ഫവാസ്(32) എന്നിവരെയാണ് അറസ്റ്റ് ചെയ്തത്.സംഭവത്തിൽ കൂടുതൽ പ്രതികൾ ഉൾപ്പെട്ടിട്ടുള്ളതായി പോലീസ് പറഞ്ഞു.പോലീസിന്റെ അനുമതിയില്ലാതെ ടൗണിൽ പ്രകടനം നടത്തിയതിന് അൻപതോളം എസ്ഡിപിഐക്കാരുടെ പേരിൽ പോലീസ് മറ്റൊരു കേസും രെജിസ്റ്റർ ചെയ്തിട്ടുണ്ട്.എസ്ഡിപിഐ മണ്ഡലം പ്രസിഡന്റ്‌ എസ്.പി മുഹമ്മദലി,സെക്രെട്ടറി ഇർഷാദ്, സ്ഥാന കമ്മിറ്റിയംഗം നൗഷാദ് മംഗലശ്ശേരി തുടങ്ങിയവരെ പ്രകടനം നടത്തിയതിന് അറസ്റ്റ് ചെയ്തു.

കൊച്ചി: നടിയെ ആക്രമിച്ച കേസിലെ മുഴുവന്‍ രേഖകളും ആവശ്യപ്പെട്ട് ദിലീപ് നൽകിയ ഹർജിയിൽ വിചാരണ കോടതി ഇന്ന് വിധി പറയും.ഈ കേസിലെ മറ്റ് പ്രതികളുടെ ജാമ്യാപേക്ഷയിലും ഇന്ന് വിധി പറഞ്ഞേക്കുമെന്നാണ് സൂചന. കേസിലെ മുഴുവന്‍ രേഖകളും നല്‍കാതെ നീതിപൂര്‍വ്വമായ വിചാരണ സാധ്യമല്ലെന്ന് ദിലീപ് അപേക്ഷയില്‍ വ്യക്തമാക്കിയിരുന്നു.ത്രമല്ല 32 രേഖകള്‍ ഇനിയും നല്‍കാനുണ്ടെന്നും ദിലീപ് ഹര്‍ജിയില്‍ സൂചിപ്പിച്ചിട്ടുണ്ട്. എന്നാല്‍ നല്‍കാന്‍ കഴിയുന്ന എല്ലാ രേഖകളും നല്‍കി കഴിഞ്ഞുവെന്നും സാധ്യമായ മുഴവന്‍ രേഖകളും നല്‍കാമെന്നുമാണ് പ്രോസിക്യൂഷന്‍റെ നിലപാട്.കഴിഞ്ഞ തവണ കേസ് പരിഗണിച്ചപ്പോള്‍ ജാമ്യത്തിലിറങ്ങിയ ശേഷം ഒളിവില്‍പ്പോയ ഒന്‍പതാം പ്രതിയുടെ ജാമ്യക്കാരെ കോടതി വിളിച്ചുവരുത്തിയിരുന്നു. ഒരാഴ്ചയ്ക്കകം പ്രതിയെ ഹാജരാക്കിയില്ലയെങ്കില്‍ ജാമ്യത്തുകയായ എണ്‍പതിനായിരം രൂപ സാക്ഷികളില്‍ നിന്നും ഈടാക്കുമെന്നും കോടതി അറിയിച്ചു.അതിന്‍റെ അടിസ്ഥാനത്തില്‍ പ്രതി ഇന്ന് കോടതിയില്‍ ഹാജരാകുമെന്നാണ് സൂചന.സുപ്രീംകോടതി വിധി പ്രകാരം നടിയെ ആക്രമിക്കുന്നതിന്‍റെ ദൃശ്യങ്ങള്‍ പരിശോധിക്കാന്‍ നിശ്ചയിച്ചിരിക്കുന്ന വിദഗ്ധന്‍ ആരാണെന്ന് 10 ദിവസത്തിനകം അറിയിക്കണമെന്ന് ദിലീപിന്‍റെ അഭിഭാഷകനോട് കോടതി ആവശ്യപ്പെട്ടിരുന്നു.അതിനുള്ള അപേക്ഷയും ദിലീപ് നല്‍കിയിട്ടുണ്ട്. പരിശോധനക്കായി വിദഗ്ധനെ കണ്ടെത്താന്‍ ശ്രമിക്കുകയാണെന്നും കേരളത്തിന് പുറത്തുനിന്നുള്ളവരെയാണ് പരിഗണിക്കുന്നതെന്നും ദിലീപിന്‍റെ അഭിഭാഷകന്‍ വ്യക്തമാക്കിയിട്ടുണ്ട്.

കോട്ടയം: ക്ലാസ് നടക്കുന്നതിനിടെ ഫാന്‍ പൊട്ടി വീണ് വിദ്യാര്‍ത്ഥിയുടെ തലയ്ക്ക് പരിക്കേറ്റു. വടവാതൂര്‍ റബര്‍ ബോര്‍ഡ് കേന്ദ്രീയ വിദ്യാലയത്തിലെ അഞ്ചാംക്ലാസ് വിദ്യാര്‍ത്ഥിയായ രോഹിത് വിനോദി (11)നാണ് പരിക്കേറ്റത്.പരിക്കേറ്റ രോഹിതിനെ അധ്യാപകര്‍ ഉടന്‍ തന്നെ അടുത്തുള്ള സ്വകാര്യ ആശുപത്രിയില്‍ എത്തിച്ചു.ഇന്നലെ ഉച്ചയോടെയായിരുന്നു സംഭവം.ക്ലാസ് നടന്നുകൊണ്ടിരിക്കെ രോഹിതിന്റെ തലയില്‍ ഫാന്‍ പൊട്ടി വീഴുകയായിരുന്നു. ഫാനിന്റെ മോട്ടര്‍ ഭാഗത്തെ സ്‌ക്രൂ അഴിഞ്ഞ് ഫാന്‍ താഴേക്കു വീഴുകയായിരുന്നെന്നാണ് നിഗമനം. തലയോട് പുറത്തു കാണുന്ന രീതിയില്‍ മുറിവേറ്റ കുട്ടിയെ അധ്യാപകരും സ്‌കൂള്‍ അധികൃതരും ചേര്‍ന്ന് ഉടന്‍ ആശുപത്രിയിലെത്തിച്ചു.കുട്ടിയുടെ തലയില്‍ 6 സ്റ്റിച്ചുകളുണ്ട്. തലയില്‍ ഭാരം വീണതിനാല്‍ സിടി സ്‌കാന്‍ പരിശോധനയും നടത്തിയിരുന്നു.കുട്ടി സുരക്ഷിതനാണെന്ന് ഉറപ്പു വരുത്തിയ ശേഷമാണ് അധ്യാപകര്‍ ആശുപത്രിയില്‍ നിന്നും മടങ്ങിയതെന്നും സംഭവത്തില്‍ പരാതിയില്ലെന്നു രോഹിതിന്റെ മാതാപിതാക്കള്‍ അറിയിച്ചു.മൂന്ന് വര്‍ഷം മുന്‍പ് പണിത കെട്ടിടത്തിലെ ഫാനാണ് സാങ്കേതിക പ്രശ്‌നം മൂലം താഴെ വീണതെന്ന് പ്രധാനാധ്യാപകന്‍ പറഞ്ഞു. രോഹിത്തിന്റെ അടുത്തിരുന്നിരുന്ന കുട്ടി ഫാന്‍ വീഴുന്നതിന് തൊട്ടുമുന്‍പ് അധ്യാപികയുടെ അടുത്തേക്കു പോയതിനാല്‍ പരുക്കേല്‍ക്കാതെ രക്ഷപ്പെട്ടു.