കണ്ണൂർ:പോലിസിനെ നിരീക്ഷിക്കാൻ സിഐടിയു ഡ്രൈവർമാരുടെ പ്രത്യേക വാട്സ് ആപ്പ് ഗ്രൂപ്.പോലീസിന്റെ നീക്കങ്ങൾ അറിയാനും പങ്കുവെയ്ക്കാനുമാണ് സിഐടിയു ഡ്രൈവേഴ്സ് എന്ന പേരിൽ വാട്ട്സ് ആപ്പ് ഗ്രൂപ് തുടങ്ങിയിരിക്കുന്നത്.ജില്ലയിലെ മലയോരമേഖലയായ പെരിങ്ങോം കേന്ദ്രീകരിച്ചാണ് ഗ്രൂപ്.90 അംഗങ്ങളാണ് ഗ്രൂപ്പിലുള്ളത്.നിരവധി ക്വാറികൾ ഉള്ള പ്രദേശമാണ് പെരിങ്ങോം മേഖല.ഇവിടെ പോലീസിന്റെ നീക്കങ്ങളും പരിശോധനകളും നിരീക്ഷിക്കുന്നതിനായാണ് ഗ്രൂപ് രൂപീകരിച്ചിരിക്കുന്നതെന്നാണ് റിപ്പോർട്ട്.രാവിലെ മുതൽ രാത്രിവരെയുള്ള പെരിങ്ങോം പോലീസിന്റെ നീക്കങ്ങൾ നിരീക്ഷിക്കുകയും ഗ്രൂപ്പിലൂടെ പങ്കുവയ്ക്കുകയും ചെയ്യുന്നതായി ഗ്രൂപ്പിലുള്ള ശബ്ദ സന്ദേശങ്ങൾ വ്യക്തമാക്കുന്നു.പോലീസ് വാഹനങ്ങൾ ഇപ്പോൾ എവിടെയാണുള്ളതെന്നും ഇനി എങ്ങോട്ടാണ് പോകുന്നതെന്നുമുള്ള വിവരങ്ങളെല്ലാം ഗ്രൂപ്പിലൂടെ പങ്കുവെയ്ക്കപ്പെടുന്നുണ്ട്.ക്വാറി മാഫിയയുടെയും ചെങ്കല്ല് കടത്തുകാരുടെയും നീക്കങ്ങൾ സുഗമമാക്കുന്നതിന് വേണ്ടിയാണ് ഈ ഗ്രൂപ് പ്രവർത്തിക്കുന്നതെന്നാണ് പോലീസിന്റെ നിഗമനം.ഗ്രൂപ്പിന്റെ പ്രവർത്തനം പെരിങ്ങോം പോലീസ് കണ്ടെത്തുകയും തളിപ്പറമ്പ് ഡിവൈഎസ്പിയെ വിവരമറിയിക്കുകയും ചെയ്തിട്ടുണ്ട്.തളിപ്പറമ്പ് ഡിവൈഎസ്പി രത്നകുമാറിന്റെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.
