June 2019

കണ്ണൂർ:കണ്ണൂർ സെൻട്രൽ ജയിലിൽ തടവുകാർ പിരിവെടുത്ത് ടി.വി സ്ഥാപിച്ച സംഭവത്തിൽ മൂന്ന് ഉദ്യോഗസ്ഥർക്ക് സസ്‌പെൻഷൻ.ഡെപ്യൂട്ടി ജയിൽ സൂപ്രണ്ട് കെ.വിനോദൻ,ഡെപ്യൂട്ടി പ്രിസൺ ഓഫീസർ വി.ടി.കെ രവീന്ദ്രൻ,അസി.പ്രിസൺ ഓഫീസർ എം.കെ ബൈജു എന്നിവരെയാണ് സസ്‌പെൻഡ് ചെയ്തത്.അച്ചടക്ക ലംഘനത്തിന് കൂട്ടുനിന്നതിനാണ് മൂവരെയും ജയിൽ ഡിജിപി ഋഷിരാജ് സിങ് സസ്‌പെൻഡ് ചെയ്തത്.സെൻട്രൽ ജയിലിലെ സൂപ്രണ്ടിന്റെ അനുമതിയില്ലാതെ ചില ഉദ്യോഗസ്ഥരുടെ ഒത്താശയോടെ തടവുകാരുടെ വേതനത്തിൽ നിന്നും പിരിവെടുത്ത് 2018 മാർച്ച് 27 നാണ് ജയിലിൽ ടി.വി വാങ്ങിയത്.സൂപ്രണ്ടിന്റെ അനുമതിയില്ലാതെ ജയിലിനകത്ത് ടി.വി കയറ്റാൻ ഗാർഡ് ഡ്യൂട്ടിയിലുണ്ടായിരുന്ന എം.കെ ബൈജുവും ഗേറ്റ് കീപ്പറുടെ ചുമതലയുണ്ടായിരുന്ന വി.ടി.കെ രവീന്ദ്രനും സൗകര്യമൊരുക്കിയെന്നാണ് കണ്ടെത്തൽ.ഇതിനെല്ലാം ഡെപ്യൂട്ടി സൂപ്രണ്ട് വിനോദിന്റെ സഹായവുമുണ്ടായിരുന്നു.സംഭവത്തെ കുറിച്ചുള്ള വാർത്ത മാധ്യമങ്ങളിൽ വന്നതോടെ ടി.വി അവിടെനിന്നും മാറ്റി അന്വേഷണം പ്രഖ്യാപിച്ചു.ജയിൽ ഡിഐജി അന്വേഷിച്ച് റിപ്പോർട്ട് സമർപ്പിച്ചെങ്കിലും പിന്നീട് നടപടികളൊന്നും ഉണ്ടായില്ല.ഋഷിരാജ് സിങ് ജയിൽ മേധാവിയായി എത്തിയതോടെ ജയിലുകളിലെ അച്ചടക്കവുമായി ബന്ധപ്പെട്ട മുഴുവൻ ഫയലുകളും പരിശോധിച്ചാണ് നടപടി പ്രഖ്യാപിച്ചത്.

ആലപ്പുഴ: മാവേലിക്കരയിൽ വനിതാ പൊലീസ് ഉദ്യോഗസ്ഥ സൗമ്യയെ പെട്രോൾ ഒഴിച്ച് തീ വച്ച് കൊന്ന കേസിലെ പ്രതി ആലുവ ട്രാഫിക് സ്റ്റേഷനിലെ പൊലീസുകാരനായ അജാസിനെ സസ്‌പെൻഡ് ചെയ്തു.അജാസിനെതിരെ കൊലപാതക്കുറ്റമടക്കമുള്ള എഫ്ഐആർ രജിസ്റ്റർ ചെയ്തതായി ഔദ്യോഗികമായി പ്രഖ്യാപിച്ചതോടെയാണ് സസ്പെൻഡ് ചെയ്തതായി ഉത്തരവിറക്കിയത്.വകുപ്പുതല അന്വേഷണത്തിന് റൂറൽ എസ്പി കെ കാർത്തിക് ഉത്തരവ് നൽകി.ശരീരത്തിൽ നാൽപ്പത് ശതമാനത്തോളം പൊള്ളലേറ്റ അജാസ് ആലപ്പുഴ മെഡിക്കൽ കോളേജിൽ തീവ്ര പരിചരണ വിഭാഗത്തിൽ ചികിത്സയിലാണ്.വിവാഹാഭ്യർത്ഥന നിരസിച്ചതാണ് കൊലപാതകത്തിലേക്ക് നയിച്ചതെന്ന് അജാസ് മജിസ്ട്രേറ്റിന് മൊഴി നൽകി. തീ കൊളുത്തിയ ശേഷം സൗമ്യയെ കയറിപിടിക്കുകയായിരുന്നു താനെന്നും അജാസ് വ്യക്തമാക്കി.വള്ളിക്കുന്നം പൊലീസ് സ്റ്റേഷനിലെ സിവില്‍ പൊലീസ് ഓഫീസറായ സൗമ്യ പുഷ്പകരനെ സഹപ്രവർത്തകനായ അജാസ് പെട്രോളൊഴിച്ച് തീ കൊളുത്തി കൊല്ലുകയായിരുന്നു. ഡ്യൂട്ടി കഴിഞ്ഞ് വീട്ടില്‍ മടങ്ങിയെത്തി സൗമ്യയെ കാറില്‍ പിന്തുടര്‍ന്ന് വന്ന അജാസ് കാഞ്ഞിപ്പുഴയില്‍ വച്ച് സ്കൂട്ടര്‍ ഇടിച്ച് വീഴ്ത്തുകയായിരുന്നു.ശേഷം കത്തി ഉപയോഗിച്ച് കുത്തുകയും  പെട്രോളൊഴിച്ച് കത്തിക്കുകയുമായിരുന്നു.ഗുരുതരമായി പൊള്ളലേറ്റ സൗമ്യ സംഭവസ്ഥലത്ത് വച്ചു തന്നെ മരിച്ചു.

ആലപ്പുഴ: മാവേലിക്കരയില്‍ വനിത പോലീസ് ഉദ്യോഗസ്ഥ സൗമ്യയെ തീകൊളുത്തി കൊലപ്പെടുത്തുനതിനിടെ നാല്‍പ്പത് ശതമാനത്തിലധികം പൊള്ളലേറ്റ പ്രതി അജാസിന്റെ ആരോഗ്യനില അതീവ ഗുരുതരമാണെന്ന് ആശുപത്രി അധികൃതര്‍. അജാസിന്റെ കിഡ്നി തകരാറിലാണ്. ഇന്നലെ ഡയാലിസിസിനായി ശ്രമിച്ചെങ്കിലും രക്തസമ്മര്‍ദ്ദം കുറഞ്ഞതിനാല്‍ ഡയാലിസിസ് നടത്താനായിട്ടില്ല. രക്തസമ്മര്‍ദ്ദം ഉയര്‍ത്താന്‍ മരുന്നു കുത്തിവെച്ചങ്കിലും മരുന്നുകളോട് ഇതുവരെ പ്രതികരിച്ചിട്ടില്ലെന്നും ആശുപത്രി അധികൃതർ വ്യക്തമാക്കി. ഇതോടെ അജാസിന്റെ അറസ്റ്റ് വൈകുകയാണ്.ആരോഗ്യം തൃപ്തിയായാല്‍ മാത്രമേ അറസ്റ്റുണ്ടാകൂവെന്നാണ് അറിയാന്‍ കഴിയുന്നത്. സൗമ്യയോട് കടുത്ത പ്രണയമായിരുന്നുവെന്നും വിവാഹം ചെയ്യണമെന്ന് ആവശ്യപ്പെട്ടിട്ടും സമ്മതിച്ചില്ലെന്നും ഒടുവില്‍ കൊല്ലാന്‍ തീരുമാനിക്കുകയായിരുന്നുവെന്ന് അജാസ് മൊഴി നല്‍കിയിരുന്നു.സൗമ്യയുമായി 5 വര്‍ഷത്തിലേറെയായി അടുപ്പമുണ്ടെന്ന് അജാസ് പറയുന്നു. വിവാഹം കഴിക്കാന്‍ ആഗ്രഹം അറിയിച്ചെങ്കിലും സൗമ്യ സമ്മതം നല്‍കിയില്ല. അടുത്തിടെയായി അവഗണന കൂടി. കടമായി വാങ്ങിയ പണം തിരികെ നല്‍കുകയും ഫോണില്‍ വിളിച്ചാല്‍ എടുക്കാതാകുകയും ചെയ്തതോടെ സൗമ്യ പൂര്‍ണമായും ഒഴിവാക്കാന്‍ ശ്രമിക്കുകയാണെന്നു തോന്നി. അതോടെ ദേഷ്യമായി. ഒന്നിച്ചു ജീവിക്കാന്‍ കഴിയില്ലെന്ന് ഉറപ്പായതോടെ ഒന്നിച്ചു മരിക്കണമെന്ന് ഉറപ്പിച്ചു. അങ്ങനെയാണു കൊലപാതകം ആസൂത്രണം ചെയ്തത്.കൊച്ചിയില്‍ നിന്ന് ആയുധങ്ങളും പെട്രോളും കാറില്‍ കരുതിയാണു ശനിയാഴ്ച വള്ളികുന്നത്തെത്തിയത്. കാര്‍ സ്‌കൂട്ടറില്‍ ഇടിച്ചു സൗമ്യയെ വീഴ്‌ത്തിയ ശേഷം വെട്ടുകയും കുത്തുകയും ചെയ്തു. സൗമ്യയുടെ ദേഹത്തും സ്വന്തം ശരീരത്തിലും പെട്രോള്‍ ഒഴിച്ചു തീ കൊളുത്തി. അങ്ങനെയാണു തനിക്കും പൊള്ളലേറ്റതെന്ന് അജാസ് പറഞ്ഞു.

മുംബൈ:വിവാഹ വാഗ്ദാനം നൽകി തന്നെ പീഡിപ്പിച്ചെന്ന യുവതിയുടെ പരാതിയിൽ പ്രതികരണവുമായി ബിനോയ് കോടിയേരി രംഗത്ത്.പരാതിക്കാരിയായ യുവതിയെ തനിക്ക് പരിചയമുണ്ട്.എന്നാൽ ഇപ്പോഴത്തെ പരാതിക്ക് പിന്നിൽ ബ്ലാക്ക് മെയിലിംഗ് ശ്രമമാണെന്നും ബിനോയ് പറഞ്ഞു. 6 മാസം മുന്‍പ് യുവതിയെ താന്‍ വിവാഹം ചെയ്തുവെന്ന് കാണിച്ച് തനിക്ക് നോട്ടീസ് അയച്ചിരുന്നു.5 കോടി രൂപയാണ് അന്ന് യുവതി ആവശ്യപ്പെട്ടത്. സംഭവത്തില്‍ അന്ന് കണ്ണൂര്‍ റേഞ്ച് ഐജിക്ക് പരാതി നൽകിയിരുന്നുവെന്നും ബിനോയ് പറഞ്ഞു.ആരോപണത്തെ നിയമപരമായി നേരിടുമെന്നും ബിനോയ് പ്രതികരിച്ചു. എട്ട് വയസുള്ള കുട്ടിയുണ്ടെന്നാണ് യുവതിയുടെ ആരോപണം. ഇത് തെളിയിക്കാന്‍ ഇന്നത്തെ കാലത്ത് ശാസ്ത്രീയമായ പല മാര്‍ഗങ്ങളുമുണ്ട്.പരാതി വ്യാജമാണെന്നും ബിനോയ് വ്യക്തമാക്കി. അതിനിടെ യുവതിക്കെതിരെ നാല് മാസം മുൻപ് ബിനോയ് പരാതി നൽകിയിരുന്നതായി കണ്ണൂര്‍ റേഞ്ച് ഐ.ജി സ്ഥിരീകരിച്ചു.പരാതി തുടര്‍ നടപടിക്കായി എസ്.പിക്ക് കൈമാറിയിരുന്നുവെന്നും പൊലീസ് വൃത്തങ്ങള്‍ വ്യക്തമാക്കി.ബിനോയ് വിവാഹവാഗ്ദാനം നല്‍കി വർഷങ്ങളോളം പീഡിപ്പിച്ചെന്ന ബിഹാർ സ്വദേശിനിയായ ബാർ ഡാൻസറുടെ പരാതിയിൽ അന്ധേരിയിലെ ഓഷിവാര പൊലീസ് ബിനോയ് കൊടിയേരിക്കെതിരെ കേസെടുത്തിട്ടുണ്ട്.പീഡനം, വഞ്ചന, ഭീഷണിപ്പെടുത്തല്‍ തുടങ്ങിയ കുറ്റങ്ങളാണ് ബിനോയിക്കെതിരെ ചുമത്തിയിരിക്കുന്നത്.