തിരുവനന്തപുരം:കെ.എസ്.ആര്‍.ടി.സി യിൽ നിന്നും പിരിച്ചുവിടപ്പെട്ട എംപാനല്‍ ജീവനക്കാര്‍ നടത്തി വന്ന സമരം ഒത്തുതീർന്നു.അഞ്ച് വര്‍ഷത്തെ പ്രവര്‍ത്തി പരിചയവും കണ്ടക്ടര്‍ ലൈസന്‍സുമുള്ളവര്‍ക്ക് ലീവ് വേക്കന്‍സിയില്‍ ജോലി നല്‍കുമെന്ന സര്‍ക്കാര്‍ ഉറപ്പിലാണ് സമരം അവസാനിപ്പിച്ചത്. ഗതാഗതമന്ത്രിയുമായി നടത്തിയ ചര്‍ച്ചയിലാണ് തീരുമാനം. ഹൈക്കോടതി വിധിയെ തുടര്‍ന്നാണ് 3861 എംപാനല്‍ ജീവനക്കാരെ കെ.എസ്.ആര്‍.ടി.സി പിരിച്ചുവിട്ടത്. ഇതേ തുടര്‍ന്ന് 47 ദിവസമായി എംപാനല്‍ ജീവനക്കാര്‍ സമരത്തിലായിരുന്നു. ഈ മാസം അഞ്ച് മുതല്‍ ഇവർ അനിശ്ചിതകാല നിരാഹരസമരവും ആരംഭിച്ചു.സമരം വിജയമാണെന്നും സര്‍ക്കാരിന് നേരത്തെ പ്രശ്‌നം പരിഹരിക്കാമായിരുന്നുവെന്നും എംപാനല്‍ ജീവനക്കാരുടെ കൂട്ടായ്മ പ്രതികരിച്ചു. അതേസമയം തെരഞ്ഞെടുപ്പ് വിജ്ഞാപനം വരും മുമ്പേ എംപാനല്‍ ജീവനക്കാരുടെ പ്രശ്‌നം പരിഹരിക്കാനായതിന്റെ ആശ്വാസത്തിലാണ് സര്‍ക്കാര്‍.
