ന്യൂഡല്‍ഹി:പ്രതിപക്ഷത്തിന്റെ ശക്തമായ എതിര്‍പ്പ‌് അവഗണിച്ച‌് ലോക‌്സഭ പാസാക്കിയ മുത്തലാഖ് നിരോധന ബില്‍ ഇന്ന് രാജ്യസഭ പരിഗണിക്കും.ഭൂരിപക്ഷം ഉപയോഗിച്ച‌് കേന്ദ്ര സര്‍ക്കാര്‍ ലോക‌്സഭയില്‍ പാസാക്കിയ ബില്‍ രാജ്യസഭയില്‍ ശക്തമായി എതിര്‍ക്കുമെന്ന‌് പ്രതിപക്ഷം വ്യക്തമാക്കി. രാജ്യസഭയില്‍ നിലവിലുള്ള മുത്തലാഖ് ബില്‍ പിന്‍വലിക്കാതെ പുതിയ ബില്‍ അവതരിപ്പിക്കാനുള്ള ശ്രമമാണ‌് കേന്ദ്രസര്‍ക്കാര്‍ നടത്തുന്നത‌്. ഇതിനെയും പ്രതിപക്ഷം ചോദ്യം ചെയ്യും.കഴിഞ്ഞ തവണ ലോക‌്സഭ പാസാക്കിയ മുത്തലാഖ് ബില്‍ രാജ്യസഭ ചര്‍ച്ച ചെയ‌്തങ്കിലും പരാജയം ഉറപ്പായതിനാല്‍ സര്‍ക്കാര്‍ വോട്ടിങ്ങിലേക്ക‌് പോയിരുന്നില്ല. രാജ്യസഭയില്‍ ഇത്തവണയും ബില്‍ പാസാക്കാനുള്ള അംഗസംഖ്യ ബിജെപിക്ക‌് ഇല്ല. ശിവസേനയുടെയും അകാലിദളിന്റെയും പിന്തുണയാണുള്ളത‌്.ബില്ലിനെതിരെ പ്രതിപക്ഷ അംഗങ്ങള്‍ ഭേദഗതി പ്രമേയങ്ങള്‍ അവതരിപ്പിക്കും. പുതിയ ബില്ലും ഓര്‍ഡിനന്‍സും തള്ളിക്കളയണമെന്ന‌് ആവശ്യപ്പെടും.വിവേചനപരമായ മുത്തലാഖ് നിരോധന ബില്‍ അംഗീകരിക്കില്ലെന്ന‌് കോണ്‍ഗ്രസ‌് ഉള്‍പ്പെടെ വ്യക്തമാക്കിയിരുന്നു. സുപ്രീംകോടതിയുടെ അഞ്ചംഗ ഭരണഘടനാബെഞ്ച‌് ഭൂരിപക്ഷവിധിയുടെ അടിസ്ഥാനത്തില്‍ മുത്തലാഖ് നിയമവിരുദ്ധമാക്കിയ സാഹചര്യത്തില്‍ ഈ ബില്‍ അപ്രസക്തമാണെന്നും വിവേചനപരമാണെന്നും സിപിഐ എമ്മും വ്യക്തമാക്കി. മുത്തലാഖ് ബില്‍ പാസാക്കുന്നതിനുമുമ്ബ‌് വിശദമായ ചര്‍ച്ച ആവശ്യമായതിനാല്‍ സെലക‌്റ്റ‌് കമ്മറ്റിയുടെ പരിഗണനയ‌്ക്ക‌് വിടണമെന്ന‌്‌ ചൂണ്ടിക്കാട്ടി ഇടത് എംപിമാരായ എളമരം കരിം, കെ സോമപ്രസാദ‌്, ബിനോയ‌് വിശ്വം എന്നിവര്‍ ശനിയാഴ‌്ച രാജ്യസഭാ ചെയര്മാന് കത്ത‌് നല്‍കിയിരുന്നു.മുത്തലാഖിനെ എതിര്‍ക്കുന്നുവെന്നും എന്നാല്‍, അതിന്റെ പേരില്‍ ക്രിമിനല്‍ കുറ്റം ചുമത്തുന്നതും കഠിനമായ ജാമ്യവ്യവസ്ഥകള്‍ ഉള്‍ക്കൊള്ളിച്ചതും അംഗീകരിക്കില്ലെന്നുമാണ‌് പ്രതിപക്ഷത്തിന്റെ നിലപാട‌്.
