December 2018

തിരുവനന്തപുരം:ഡിവൈഎസ്പി വാഹനത്തിന് മുൻപിൽ തള്ളിയിട്ട് കൊലപ്പെടുത്തിയ നെയ്യാറ്റിന്കറിയെ സനലിന്റെ ഭാര്യയും മക്കളും തിരുവനന്തപുരം സെക്രെട്ടെറിയേറ്റ് പടിക്കൽ സമരം നടത്തുന്നു.സര്‍ക്കാര്‍ നല്‍കിയ വാഗ്ദാനം പാലിക്കണമെന്നാണ് ആവശ്യം.അര്‍ഹമായ നഷ്ടപരിഹാരം നല്‍കുമെന്ന് മന്ത്രി കടകംപള്ളി സുരേന്ദ്രന്‍ സനലിന്റെ കൊലപാതകം നടന്ന ശേഷം വ്യക്തമാക്കിയിരുന്നു. ഇക്കാര്യത്തില്‍ പോലീസ് മേധാവി സര്‍ക്കാരിന് റിപ്പോര്‍ട്ട് സമര്‍പ്പിക്കുകയും ചെയ്തിരുന്നു. എന്നാല്‍ ഇതുവരെ സര്‍ക്കാര്‍ യാതൊരു നടപടിയും എടുത്തില്ല. തുടർന്നാണ് നീതി ആവശ്യപ്പെട്ട് കുടുംബം സമരത്തിന് ഇറങ്ങിയത്. പ്രതിയായ ഡിവൈഎസ്പി ഹരികുമാര്‍ ജീവനൊടുക്കിയതോടെയാണ് നഷ്ടപരിഹാരം നല്‍കുന്നതില്‍ നിന്ന് സര്‍ക്കാര്‍ പിന്നാക്കം പോയത്. 22 ലക്ഷം രൂപ കടബാധ്യതയുള്ളവരാണ് സനലിന്റെ കുടുംബം. വായ്പാ തിരിച്ചടവ് മുടങ്ങിയതോടെ വീട് ജപ്തി ഭീഷണിയിലാണ്.സനലിന്റെ ഭാര്യ വിജിക്ക് സര്‍ക്കാര്‍ ജോലി നല്‍കണമെന്ന് പോലീസ് മേധാവി സര്‍ക്കാരിനോട് ശുപാര്‍ശ ചെയ്തിരുന്നു. ഇതൊന്നും പാലിക്കപ്പെടാതെ വന്നതോടെയാണ് ഇവർ സമരത്തിനിറങ്ങിയിരിക്കുന്നത്.

തിരുവനന്തപുരം:ശബരിമല വിഷയത്തിൽ പ്രതിപക്ഷ ബഹളത്തെ തുടർന്ന് നിയമസഭാ ഇന്നത്തേക്ക് പിരിഞ്ഞു.ശബരിമലയിലെ നിരോധനാജ്ഞ പിന്‍വലിക്കണമെന്ന് ആവശ്യപ്പെട്ട് പ്രതിപക്ഷം സഭാ നടപടികള്‍ ആരംഭിച്ചപ്പോള്‍ തന്നെ സഭയുടെ നടുത്തളത്തില്‍ ഇറങ്ങി പ്രതിഷേധം ആരംഭിച്ചു.പ്രതിപക്ഷ എംഎല്‍എമാര്‍ ബാനറുകളും പ്ലക്കാര്‍ഡുകളുമായാണ് നടുത്തളത്തില്‍ ഇറങ്ങി പ്രതിഷേധിച്ചത്. സ്പീക്കറുടെ ഡയസ് മറച്ചായിരുന്നു പ്രതിപക്ഷത്തിന്‍റെ പ്രതിഷേധം.ജനകീയ വിഷയങ്ങള്‍ കൂടി ചര്‍ച്ച ചെയ്യേണ്ട വേദിയാണ് സഭയെന്നും പ്രതിപക്ഷം ചോദ്യോത്തരവേളയോട് സഹകരിക്കണമെന്നും സ്പീക്കര്‍ ആവര്‍ത്തിച്ച്‌ ആവശ്യപ്പെട്ടു. എന്നാല്‍ പ്രതിപക്ഷം പ്രതിഷേധം ശക്തമാക്കിയതോടെ സ്പീക്കര്‍ ചോദ്യോത്തരവേള റദ്ദാക്കി സഭ നടപടികള്‍ പൂര്‍ത്തിയാക്കുകയായിരുന്നു. പ്രതിപക്ഷ എംഎല്‍എമാരുടെ സമരം ഒത്തുതീര്‍പ്പാക്കാന്‍ ഇടപെടണമെന്ന് ആവശ്യപ്പെട്ട് ഇന്ന് രാവിലെ സഭ ചേരുന്നതിനു മുന്‍പ് രമേശ് ചെന്നിത്ത സ്പീക്കറെ കണ്ട് ചര്‍ച്ച നടത്തിയിരുന്നു.

തിരുവനന്തപുരം:ശബരിമല വിഷയത്തില്‍ ബിജെപി സംസ്ഥാന ജനറല്‍ സെക്രട്ടറി എ.എന്‍. രാധാകൃഷ്ണന്‍ ആരംഭിച്ച അനിശ്ചിതകാല നിരാഹാര സമരം എട്ടാം ദിവസത്തിലേക്ക് കടന്നു.സമരം എട്ട് ദിവസം പിന്നിട്ടതോടെ രാധാകൃഷ്ണന്‍റെ ആരോഗ്യനില വഷളായി.രക്തസമ്മര്‍ദ്ദവും രക്തത്തിലെ പഞ്ചസാരയുടെ അളവും കുറഞ്ഞതിനാല്‍ സമരം ഉടന്‍ അവസാനിപ്പിക്കണമെന്നാണ് ഡോക്ടര്‍മാരുടെ നിര്‍ദേശം. രാധാകൃഷ്ണനെ ഇന്ന് ആശുപത്രിയിലേക്ക് മാറ്റിയേക്കുമെന്നും സൂചനകളുണ്ട്.കെ. സുരേന്ദ്രനെതിരായ കേസുകള്‍ പിന്‍വലിക്കുക, ശബരിമലയിലെ അടിസ്ഥാന സൗകര്യങ്ങള്‍ വര്‍ധിപ്പിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് രാധാകൃഷ്ണൻ സമരം ആരംഭിച്ചത്.രാധാകൃഷ്ണനു സമരം അവസാനിപ്പിക്കേണ്ടി വന്നാല്‍ മുതിര്‍ന്ന നേതാവ് സി.കെ. പത്മനാഭന്‍ പകരം നിരാഹാരമിരിക്കും.

കണ്ണൂർ:ഉത്ഘാടന ദിവസമായ ഇന്ന് കണ്ണൂർ അന്താരാഷ്ട്ര വിമാനത്താവളത്തിൽ നിന്നും വിമാനം പറന്നുയരുമ്പോൾ ചരിത്രത്തിന്റെ ഭാഗമാകാനൊരുങ്ങി കണ്ണൂർ കാടാച്ചിറ സ്വദേശികളായ ഒരു അച്ഛനും മകനും.ഇന്ന് കണ്ണൂരില്‍നിന്ന് തിരുവനന്തപുരത്തേക്ക് പറക്കുന്ന ഗോ എയര്‍ വിമാനത്തില്‍ പൈലറ്റാകുന്നത് കണ്ണൂര്‍ സ്വദേശി അശ്വിന്‍ നമ്പ്യാരാണ്.രണ്ട് വര്‍ഷം മുന്‍പ് കണ്ണൂര്‍ വിമാനത്താവളത്തില്‍ ആദ്യമിറങ്ങിയ ഡോണിയര്‍ വിമാനം പറത്തിയ കണ്ണൂര്‍ സ്വദേശി എയര്‍ മാര്‍ഷല്‍ രഘു നമ്പ്യാരുടെ മകനാണ് അശ്വിന്‍. വ്യോമസേനയുടെ ട്രെയിനിങ് കമാന്‍ഡിലായിരുന്ന രഘു നമ്പ്യാരാണ് അന്ന് ഡോണിയര്‍ 228 വിമാനം പറത്തിയത്. ഇപ്പോള്‍ ഷില്ലോങ്ങിലെ ഈസ്‌റ്റേണ്‍ എയര്‍ കമാന്‍ഡില്‍ എയര്‍ ഓഫീസര്‍ കമാന്‍ഡിങ് ചീഫാണ് രഘു നമ്പ്യാർ.സ്വന്തം നാട്ടിൽ നിന്നും പുറപ്പെടുന്ന ആദ്യ വിമാനത്തിന്റെ പൈലറ്റ് അകാൻ സാധിച്ചതിൽ തനിക്കും തന്റെ കുടുംബത്തിനും അഭിമാനമുണ്ടെന്ന് അശ്വിൻ പറഞ്ഞു.കണ്ണൂരിൽ നിന്നും ഉൽഘാടന ദിവസം സർവീസ് നടത്തുന്ന ഫ്‌ലൈറ്റുകളിൽ ഒന്ന് ഗോ എയർ ആണെന്നറിഞ്ഞപ്പോൾ തന്നെ അശ്വിൻ തന്നെ ഇതിന്റെ ഭാഗമാക്കണമെന്ന് ആവശ്യപ്പെട്ട് കൊണ്ട് തന്റെ  സീനിയർ ഓഫീസർക്ക് പേർസണൽ റിക്വസ്റ്റ് അയക്കുകയായിരുന്നു.തന്നെ ഇതിന്റെ ഭാഗമാക്കുകയാണെങ്കിൽ തനിക്കും തന്റെ കുടുംബത്തിനും എന്നും അഭിമാനിക്കാൻ പറ്റുന്ന ഒരു നിമിഷമായിരിക്കുമെന്നും അതെന്നും റിക്വസ്റ്റിൽ അദ്ദേഹം വ്യക്തമാക്കിയിരുന്നു.ഈ അപേക്ഷ സീനിയർ ഓഫീസർ സ്വീകരിക്കുകയായിരുന്നു. കഴിഞ്ഞ ഒന്നര വർഷമായി ഗോ എയർ ഫ്ലൈറ്റിന്റെ പൈലറ്റ് ആയി പ്രവർത്തിച്ചു വരികയാണ് അശ്വിൻ.കൂടുതലായും ന്യൂ ഡൽഹി-കൊൽക്കത്ത എയർപോർട്ടുകളിലായാണ് അശ്വിൻ ഫ്ലൈറ്റ് സർവീസ് നടത്തിയിരിക്കുന്നത്.കേരളത്തിൽ കൊച്ചി എയർപോർട്ടിലേക്ക് മാത്രവും.