September 2018

കൊച്ചി: കന്യാസ്ത്രീയെ പീഡിപ്പിച്ച കേസില്‍ ജലന്ധര്‍ മുന്‍ ബിഷപ്പ് ഫ്രാങ്കോ മുളയ്ക്കലിനെ അറസ്റ്റ് ചെയ്തു. അറസ്റ്റ് അനിവാര്യമാണെന്ന് ബിഷപ്പിനെ പൊലീസ് അറിയിച്ചു.വെള്ളിയാഴ്ച രാത്രി എട്ടുമണിയോടെ  വൈക്കം ഡിവൈഎസ്പി കെ.സുഭാഷാണ് അറസ്റ്റ് വിവരം ബിഷപ്പിനെ അറിയിച്ചത്. തുടര്‍ച്ചയായി മൂന്നു ദിവസം ചോദ്യം ചെയ്തതിനു ശേഷമാണ് ബിഷപ്പിന്റെ അറസ്റ്റ്. ഫ്രാങ്കോയെ അറസ്റ്റ് ചെയ്തത് പഞ്ചാബ് പൊലീസിനെയും പഞ്ചാബിലുള്ള അഭിഭാഷകനെയും പൊലീസ് അറിയിച്ചു.എട്ട് മണിക്കൂര്‍ നീണ്ട രണ്ടാം ദിവസത്തെ ചോദ്യം ചെയ്യലിന് ശേഷവും മൊഴികളിലെ വ്യക്തത കുറവാണ് അറസ്റ്റിന് തടസമായി അന്വേഷണസംഘം ചൂണ്ടിക്കാട്ടിയിരുന്നത്. ചോദ്യം ചെയ്യലില്‍ ഫ്രാങ്കോ മുളയ്‌ക്കലിന് പല ചോദ്യങ്ങള്‍ക്കും ഉത്തരമുണ്ടായിരുന്നില്ല. സംഭവം നടന്നതായി കന്യാസ്‌ത്രീ പരാതിപ്പെട്ട 2014 മെയ് അഞ്ചിന് താന്‍ കുറവിലങ്ങാട്ടെ മഠത്തില്‍ എത്തിയില്ലെന്നും തൊടുപുഴ മുതലക്കോടത്തായിരുന്നുവെന്നും ഫ്രാങ്കോ മുളയ്‌ക്കല്‍ ആവര്‍ത്തിച്ചു. എന്നാല്‍, കുറവിലങ്ങാട്ട് എത്തിയതായി തെളിയിക്കുന്ന സന്ദര്‍ശന രജിസ്റ്ററിലെ വിവരങ്ങളും തൊടുപുഴയില്‍ എത്തിയില്ലെന്ന് വ്യക്തമാക്കുന്ന ടവര്‍ ലൊക്കേഷന്‍ വിവരങ്ങളും അന്വേഷണ ഉദ്യോഗസ്ഥര്‍ കാണിച്ചു.പല ചോദ്യങ്ങള്‍ക്കും മുമ്ബില്‍ കൃത്യമായ മറുപടിയില്ലാതെ ബിഷപ് നിസ്സഹായനായി. സ്വകാര്യചടങ്ങില്‍ കന്യാസ്ത്രീയും ബിഷപ്പും പങ്കെടുക്കുന്ന വീഡിയോ ബിഷപ്പ് അന്വേഷണസംഘത്തിന് കൈമാറി. ഈ ദൃശ്യങ്ങള്‍ എഡിറ്റ് ചെയ്തതാണെന്ന് അന്വേഷണസംഘം കണ്ടെത്തി. ഇതും ബിഷപ്പിനെ കുഴപ്പിച്ചു.കോട്ടയം എസ്പിയുടെയും അന്വേഷണ ഉദ്യോഗസ്ഥന്റെയും നേതൃത്വത്തില്‍ രണ്ടു സംഘമായി തിരിഞ്ഞ് നേരത്തെ തയ്യാറാക്കിയ ചോദ്യാവലിയുടെ അടിസ്ഥാനത്തിലായിരുന്നു ചോദ്യം ചെയ്യല്‍. ഒന്നാംഘട്ടത്തില്‍ 104 ചോദ്യങ്ങളാണ് തയ്യാറാക്കിയിരുന്നത്. നാലു ക്യാമറകളിലൂടെ ഇത് പകര്‍ത്തുകയും ചെയ്തു. ഡിജിപി ഉള്‍പ്പെടെയുള്ള ഉന്നത ഉദ്യോഗസ്ഥര്‍ക്ക് നിരീക്ഷിക്കാനും റെക്കോഡ് ചെയ്യാനും സൗകര്യം ഉണ്ടായിരുന്നു.

തിരുവനന്തപുരം:കെഎസ്ആർടിസി റിസർവേഷൻ കൗണ്ടറുകളുടെ നടത്തിപ്പ് കുടുംബശ്രീക്ക് കൈമാറും.ഒക്ടോബർ മുതൽ കൗണ്ടറുകൾ കുടുംബശ്രീ ഏറ്റെടുക്കും.സ്ഥലം,വൈദ്യുതി എന്നിവ കെഎസ്ആർടിസി നൽകും.ഫർണിച്ചറുകൾ,കമ്പ്യൂട്ടർ,പ്രിൻറർ,നെറ്റ്‌വർക്ക് എന്നിവ കുടുംബശ്രീ സജ്ജീകരിക്കണം.സീറ്റ് റിസർവേഷൻ കൂപ്പണുകളുടെയും കൗണ്ടറുകളിലൂടെ വിൽക്കുന്ന ടിക്കറ്റുകളുടെയും നാലുശതമാനം വിഹിതം കുടുംബശ്രീക്ക് ലഭിക്കും.ഒൻപതു ഡിപ്പോയിലെ കൗണ്ടറുകൾ രാവിലെ ആറുമണി മുതൽ പത്തുമണിവരെയും പതിനൊന്നു ഡിപ്പോയിലെ കൗണ്ടറുകൾ രാവിലെ ഒൻപതുമണിമുതൽ അഞ്ചുമണിവരെയും മൂന്നു ഡിപ്പോകളിലെ കൗണ്ടറുകൾ ഇരുപത്തിനാലു മണിക്കൂറും പ്രവർത്തിക്കും. 69 കുടുംബശ്രീ പ്രവർത്തകർക്ക് ഇവിടെ ജോലി ലഭിക്കും.നിലവിൽ കൗണ്ടറുകളിലുള്ള കെഎസ്ആർടിസി ജീവനക്കാരെ മറ്റു വിഭാഗങ്ങളിൽ നിയോഗിക്കും.തിരുവനന്തപുരം സെൻട്രൽ,എറണാകുളം, വൈറ്റില,മൈസൂരു,ബെംഗളൂരു എന്നീ ഡിപ്പോകളിലെ കൗണ്ടറുകളും കൈമാറിയവയിൽ ഉൾപ്പെടുന്നു.

കണ്ണൂർ:ജോലിക്കായി എത്തിയ വീട്ടിൽ നിന്നും സ്വർണ്ണം കവർന്നശേഷം രക്ഷപ്പെട്ട വീട്ടുവേലക്കാരിയെ പിടികൂടി.കണ്ണാടിപ്പറമ്പ് പുല്ലൂപ്പി ആയിഷ ക്വാർട്ടേഴ്സിൽ ആതിരയാണ്(18) അറസ്റ്റിലായത്.ഈ മാസം നാലാം തീയതി തുളിച്ചേരിയിലെ ഒരു വീട്ടിൽ നിന്നാണ് ആതിര ആറുപവന്റെ ആഭരണങ്ങളുമായി കടന്നത്. ഒരുമാസമായി ഈ വീട്ടിൽ ജോലിക്ക് നിൽക്കുകയായിരുന്നു ആതിര.വീട്ടുകാർ പുറത്തുപോയ സമയത്ത് ആഭരങ്ങളുമായി കടന്നുകളയുകയായിരുന്നു. മോഷ്ടിച്ച ആഭരണങ്ങൾ കണ്ണൂരിലെ രണ്ട് ജ്വല്ലറികളിലായി വിറ്റ ശേഷം ഭർത്താവുമൊത്ത് കോയമ്പത്തൂരിലേക്ക് പോയി.നാട്ടിൽ കേസ് നടക്കുന്ന കാര്യം അറിയാതെ ഞായറാഴ്ച ആതിര കണ്ണൂരിലെത്തി.വിവരമറിഞ്ഞ കണ്ണൂർ ടൌൺ എസ്‌ഐ ശ്രീജിത്ത് കോടേരിയുടെ നേതൃത്വത്തിലുള്ള പോലീസ് ആതിരയെ കസ്റ്റഡിയിലെടുത്തു.ചോദ്യം ചെയ്യലിൽ മോഷണക്കുറ്റം സമ്മതിച്ച ആതിര സ്വർണ്ണം വിറ്റ ജ്വല്ലറികൾ ഏതാണെന്നും പോലീസിനോട് പറഞ്ഞു.പോലീസ് ഈ ജ്വല്ലറികളിൽ നിന്നും ആതിര വിറ്റ സ്വർണ്ണവും കണ്ടെടുത്തു.