ന്യൂഡൽഹി:ഇന്ധന വിലവർദ്ധനവിൽ പ്രതിഷേധിച്ച് തിങ്കളാഴ്ച ഭാരത് ബന്ദിന് കോൺഗ്രസ് ആഹ്വാനം ചെയ്തു.രാവിലെ ഒൻപതുമണി മുതൽ വൈകുന്നേരം മൂന്നുമണി വരെയാണ് ബന്ദ്.ബന്ധുമായി സഹകരിക്കുമെന്ന് മറ്റ് പ്രതിപക്ഷ പാർട്ടികൾ ഉറപ്പുനല്കിയിട്ടുണ്ടെന്ന് കോൺഗ്രസ് വക്താവ് രൺദീപ് സിംഗ് സുർജേവാല പറഞ്ഞു.ഡീസല്‍, പെട്രോള്‍ എന്നിവയുടെ കേന്ദ്ര എക്സൈസ് തീരുവ കുറക്കുക, സംസ്ഥാന വാറ്റ് നികുതി കുറക്കുക, പെട്രോളും ഡീസലും ജിഎസ്ടി പരിധിയില്‍ കൊണ്ടുവരിക എന്നീ ആവശ്യങ്ങളുന്നയിച്ചാണ് ബന്ദ്. കോണ്‍ഗ്രസ് ആഹ്വാനം ചെയ്ത ബന്ദിന് പിന്തുണയായി സിപിഎം തിങ്കളാഴ്ച ഹര്‍ത്താല്‍ പ്രഖ്യാപിച്ചു. ഇന്ധന വില നിയന്ത്രണം വിട്ട് കുതിക്കുമ്പോഴും നികുതി വര്‍ധിപ്പിച്ച് സാധാരണ ജനങ്ങളെ കൊള്ളയടിക്കുകയാണ് നരേന്ദ്ര മോദി സര്‍ക്കാര്‍ ചെയ്യുന്നതെന്ന് പാര്‍ട്ടി ആരോപിച്ചു.ബന്ദിന് തൃണമൂല്‍ കോണ്‍ഗ്രസ് ഒഴികെയുള്ള പ്രതിപക്ഷ പാര്‍ട്ടികളുടെ പിന്തുണയുണ്ടാകുമെന്നും കോണ്‍ഗ്രസ് നേതാക്കള്‍ അറിയിച്ചു. 2014ല്‍ മോദി സര്‍ക്കാര്‍ അധികാരത്തില്‍ എത്തിയ ശേഷം പെട്രോളിന്റെയും ഡീസലിന്റെയും നികുതിയിനത്തില്‍ പതിനൊന്ന് ലക്ഷം രൂപയാണ് പിരിച്ചെടുത്തത്. നാലര വര്‍ഷത്തില്‍ പെട്രോളിന്റെ കേന്ദ്ര എക്സൈസ് തീരവയില്‍ 211 ശതമാനവും, ഡീസലിന്റെ തീരുവയില്‍ 443 ശതമാനവും വര്‍ധനവുണ്ടായി. ഇന്ധന വില റെക്കോര്‍ഡ് ഉയര്‍ച്ചയിലേക്ക് കുതിക്കുമ്പോഴും ഈ കൊള്ള തുടരുകയാണെന്നും കോണ്‍ഗ്രസ് ആരോപിച്ചു.
