August 2018

ഇടുക്കി:ജലനിരപ്പ് 2401.50 അടിയായി ഉയർന്ന സാഹചര്യത്തിൽ ഇടുക്കി ചെറുതോണി അണക്കെട്ടിന്റെ നാലാമത്തെ ഷട്ടറും തുറന്നു.അണക്കെട്ടിലേക്കുള്ള നീരൊഴുക്ക് തുടരുന്ന സാഹചര്യത്തില്‍ കെഎസ്‌ഇബി ഇന്നലെത്തന്നെ അതീവ ജാഗ്രതാ നിര്‍ദേശം (റെഡ് അലര്‍ട്ട്) പുറപ്പടുവിച്ചിരുന്നു. അര്‍ധരാത്രിക്ക് 2400.38 അടിയായിരുന്നു ഡാമിലെ ജലനിരപ്പ്. രാവിലെ അത് 2401നു മുകളില്‍ എത്തുകയായിരുന്നു.2403 അടിയാണ് അണക്കെട്ടിന്റെ പരമാവധി സംഭരണശേഷി. 26 വര്‍ഷങ്ങള്‍ക്കുശേഷമാണ് ഇടുക്കി ചെറുതോണി അണക്കെട്ടിന്റെ ഷട്ടര്‍ തുറന്നത്. സെക്കന്‍ഡില്‍ 300 ക്യൂമെക്‌സ്‌ വെള്ളമാണ്‌ പുറത്തുവിടുന്നത്‌. ചെറുതോണി അണക്കെട്ടില്‍ നിന്ന് തുറന്ന് വിടുന്ന വെള്ളം കുത്തിയൊലിച്ച്‌ എത്തുക പെരിയാറിലേക്ക് ആണ്. പെരിയാറില്‍ അനിയന്ത്രിതമായി വെള്ളം ഉയര്‍ന്നാല്‍ അത് കൊച്ചിയിലും വെള്ളപ്പൊക്കത്തിന് ഇടയാക്കും. ആലുവ പുഴ ഇപ്പോള്‍ തന്നെ നിറഞ്ഞുകവിഞ്ഞിരിക്കുകയാണ്.ചെറുതോണി ടൗണ്‍ മുതല്‍ പെരിയാറിന്റെ ഇരുകരയിലുമുള്ളവര്‍ അതീവ ജാഗ്രത പാലിക്കണമെന്ന് അധികൃതര്‍ അറിയിച്ചു.

കണ്ണൂർ:കനത്ത മഴയെ തുടർന്നുണ്ടായ ഉരുൾപ്പൊട്ടലിലും വെള്ളപ്പൊക്കത്തിലും കണ്ണൂർ ജില്ലയിൽ കനത്ത നാശനഷ്ടം.ഇരിട്ടി, തളിപ്പറമ്പ് താലൂക്കുകളില്‍ ഇരുന്നൂറോളം വീടുകളില്‍ വെള്ളം കയറി. അയ്യങ്കുന്ന്, നുച്യാട്, വയത്തൂര്‍, ചാവശ്ശേരി, കോളാരി, വിളമന, കേളകം, ആറളം, ഇരിക്കൂര്‍, കൊട്ടിയൂര്‍, എരിവേശ്ശി, ചെങ്ങളായി, ഉളിക്കല്‍ വില്ലേജുകളിലാണ് കൂടുതല്‍ നാശനഷ്ടങ്ങളുണ്ടായത്. ഇരിട്ടി താലൂക്കില്‍ ആറും തളിപ്പറമ്പ് താലൂക്കില്‍ മൂന്നും ദുരിതാശ്വാസ ക്യാംപുകള്‍ തുറന്നു.ജില്ലാ പഞ്ചായത്ത് പ്രസിഡന്റ് കെ വി സുമേഷ്, ജില്ലാ കലക്ടര്‍ മീര്‍ മുഹമ്മദലി തുടങ്ങിയവര്‍ ഉരുള്‍പൊട്ടലുണ്ടായ സ്ഥലങ്ങളിലെത്തി ദുരിതാശ്വാസ പ്രവര്‍ത്തനങ്ങള്‍ക്ക് നേതൃത്വം നല്‍കി. അതിനിടെ, വയനാട് വഴിയുള്ള പാതകള്‍ ഉരുള്‍പൊട്ടലും വെള്ളപ്പൊക്കവും കാരണം തടസ്സപ്പെട്ടതിനെ തുടര്‍ന്ന് വഴിയില്‍ കുടുങ്ങിയ യാത്രക്കാര്‍ക്ക് ഭക്ഷണവും വെള്ളവും ലഭ്യമാക്കാന്‍ കണ്ണൂര്‍ ജില്ലാ ഭരണകൂടം ക്രമീകരണങ്ങള്‍ ഒരുക്കി.വയനാട് ജില്ലാ അധികൃതരുമായി ബന്ധപ്പെട്ട് ഇതിനാവശ്യമായ സംവിധാനം ഏര്‍പ്പെടുത്തിയതായി എഡിഎം ഇ മുഹമ്മദ് യൂസഫ് അറിയിച്ചു. ബംഗളൂരുവില്‍ നിന്ന് കണ്ണൂര്‍ ജില്ലയുടെ വിവിധ ഭാഗങ്ങളിലേക്ക് പുറപ്പെട്ട ബസ് യാത്രക്കാരാണ് വയനാട് തലപ്പുഴ ഭാഗത്ത് കുടുങ്ങിയത്.കനത്ത മഴയിലും ഉരുൾപൊട്ടലിലും ഇരിട്ടി മേഖലയിൽ മാത്രം 75 വീടുകളാണ് നശിച്ചത്.ബുധനാഴ്ച പത്തിടങ്ങളിലുണ്ടായ ഉരുൾപൊട്ടലിനു പുറമെ വ്യാഴാഴ്ച നാലിടങ്ങളിൽ കൂടി ഉരുൾപൊട്ടി.മേഖലയിൽ നൂറോളം കുടുംബങ്ങളെ ദുരിതാശ്വാസ ക്യാമ്പുകളിലേക്ക് മാറ്റി.നൂറുകണക്കിന് ഏക്കറിലെ കൃഷിയും നശിച്ചു.ആറളം,അയ്യങ്കുന്ന് പഞ്ചായത്തുകളിലായി ഇരുപത്തഞ്ചോളം റോഡുകൾ തകർന്നു. ദുരന്തനിവാരണത്തിനായി സൈന്യവും രംഗത്തിറങ്ങി.ഡി എസ് സി ബറ്റാലിയൻ ജെ.സി.ഒ വിനോദ് കണ്ണോത്തിന്റെ നേതൃത്വത്തിലുള്ള മുപ്പതംഗ സംഘത്തെയും 122 ടി.എ ബറ്റാലിയനിലെ കമാൻഡൻറ് കെ.കെ സിംഹയുടെയും നേതൃത്വത്തിലുള്ള 25 പേരെയുമാണ്  ദുരിതാശ്വാസ പ്രവർത്തങ്ങൾക്കായി നിയോഗിച്ചിരിക്കുന്നത്.

കണ്ണൂർ:കണ്ണനൂർ അന്തരാഷ്ട്ര വിമാനത്താവളം ഒക്ടോബറിൽ പ്രവർത്തന സജ്ജമാകും. അത്യാധുനിക സംവിധാനങ്ങളോടെ നിർമാണം പൂർത്തിയായ വിമാനത്താവളത്തിൽ ഇനി ബാക്കിയുള്ളത് കാലിബ്രേഷൻ മാത്രമാണ്.മഴ രണ്ടു ദിവസമെങ്കിലും വിട്ടു നിന്നാൽ അതിനും സൗകര്യമൊരുങ്ങും.ഒക്ടോബർ ഒന്നിനോ അതിനു ശേഷമോ വിമാനത്താവളം ഉൽഘാടനം ചെയ്യും.ഉൽഘാടന തീയതി സംസ്ഥാന സർക്കാരും ഡയറക്റ്ററേറ്റ് ഓഫ് സിവിൽ ഏവിയേഷനും ചേർന്നാണ് തീരുമാനിക്കണമെന്ന് കേന്ദ്ര വ്യോമയാന മന്ത്രി സുരേഷ് പ്രഭു വാർത്ത സമ്മേളനത്തിൽ പറഞ്ഞു.തുടക്കത്തിൽ തന്നെ മൂന്നു അന്താരാഷ്ട്ര വിമാന സർവീസുകൾ ഉണ്ടാകും.കണ്ണൂർ-അബുദാബി ജെറ്റ് എയർവെയ്‌സ്,കണ്ണൂർ-ദമാം ഗോ എയർ,കണ്ണൂർ-ദോഹ ഇൻഡിഗോ എന്നീ അന്താരാഷ്ട്ര സർവീസുകൾക്ക് അനുമതി നൽകിയിട്ടുണ്ട്.കൂടുതൽ വിമാനകമ്പനികൾ വൈകാതെ തന്നെ കണ്ണൂരിൽ നിന്നും സർവീസ് നടത്താൻ എത്തുമെന്ന് സുരേഷ് പ്രഭു പറഞ്ഞു.കണ്ണൂർ വിമാനത്താവളത്തിനെ ഉഡാൻ പദ്ധതിയിൽ ഉൾപ്പെടുത്തിയിട്ടുണ്ടെന്നും വിമാനത്താവളം തുറക്കുന്ന ദിവസം തന്നെ ഉഡാൻ സർവീസ് തുടങ്ങുമെന്നും വ്യോമയാന സഹമന്ത്രി ജയന്ത് സിൻഹ പറഞ്ഞു.എയർ ഇന്ത്യ,ഗോ എയർ,ഇൻഡിഗോ എന്നീ വിമാന കമ്പനികളാണ് ഉഡാൻ പത്തയിൽ കണ്ണൂരിൽ നിന്നും സർവീസ് നടത്താൻ തയ്യാറായിരിക്കുന്നത്.വിദേശത്തുനിന്നുള്ള വിമാനകമ്പനികൾക്ക് സർവീസ് നടത്താൻ അനുമതി നൽകണമെന്ന് ആവശ്യം വൈകാതെ അംഗീകരിക്കപ്പെടുമെന്നാണ് കിയാലിന്റെ പ്രതീക്ഷ.