August 2018

തളിപ്പറമ്പ്:അധ്യാപകൻ മാനസികമായി പീഡിപ്പിച്ചു എന്നാരോപിച്ച് ധര്മശാല നിഫ്റ്റിൽ(നാഷണൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്‌നോളജി)വിദ്യാർത്ഥിനി ആത്മഹത്യയ്ക്ക് ശ്രമിച്ചു.മൂന്നാം വർഷ വിദ്യാർത്ഥിനിയെയാണ് അമിതമായി ഗുളിക കഴിച്ച നിലയിൽ തളിപ്പറമ്പ് സഹകരണ ആശുപത്രിയിൽ പ്രവേശിപ്പിച്ചിരിക്കുന്നത്.ശനിയാഴ്ച ഉച്ചയോടെയാണ് സംഭവം.താമസസ്ഥലത്തുവെച്ച് ഗുളിക കഴിച്ച വിദ്യാർത്ഥിനി വിവരം സുഹൃത്തുക്കളെ ഫോണിൽ വിളിച്ച് അറിയിക്കുകയായിരുന്നു.അബോധാവസ്ഥയിലായ പെണ്‍കുട്ടിയെ സുഹൃത്തുക്കൾ ഉടന്‍ തളിപ്പറമ്പ് സഹകരണ ആശുപത്രിയിലെത്തിച്ചു. റാന്‍ടെക് എന്ന ഗുളിക അമിതമായി കഴിച്ചതാണ് കാരണമെന്ന് പോലീസ് പറഞ്ഞു.അപകടനില തരണം ചെയ്തിട്ടുണ്ട്. നിഫ്റ്റിലെ അധ്യാപകനായ ചെന്നൈ സ്വദേശി സെന്തില്‍കുമാര്‍ വെങ്കിടാചലം എന്ന അധ്യാപകന്റെ പീഡനം സഹിക്കാനാവാതെയാണ് അത്മഹത്യക്ക് ശ്രമിച്ചതെന്ന് പെണ്‍കുട്ടി പോലീസിനോട് പറഞ്ഞു. ഈ അധ്യാപകനെ പറ്റി എല്ലാ വിദ്യാര്‍ത്ഥിനികള്‍ക്കും പരാതിയുണ്ടെങ്കിലും പരീക്ഷയില്‍ തോല്‍പ്പിക്കുമെന്ന ഭയന്ന് പരസ്യമായി പ്രതികരിച്ചിരുന്നില്ലത്രേ.

അതേസമയം ശനിയാഴ്ച വൈകുന്നേരം ഒരുസംഘം ആളുകളെത്തി നിഫ്റ്റ് ക്യാമ്പസ്സിന് നേരെ ആക്രമണം നടത്തി.പ്രകടനമായെത്തിയ ഇവർ ക്യാമ്പസ്സിൽ കയറി ഗ്ലാസുകളും പൂച്ചെടികളും അടിച്ചു തകർത്തു.അഞ്ചുലക്ഷം രൂപയുടെ നഷ്ട്ടം കണക്കാക്കുന്നു.ആരോപണവിധേയനായ അദ്ധ്യാപകനെ സസ്‌പെൻഡ് ചെയ്യണമെന്ന് ആവശ്യപ്പെട്ടാണ് ഇവർ അക്രമം നടത്തിയത്. അക്രമവുമായി ബന്ധപ്പെട്ട് കണ്ടാലറിയാവുന്ന 35 പേര്‍ക്കെതിരെ തളിപ്പറമ്പ് പോലീസ് വിവിധ വകുപ്പുകള്‍ പ്രകാരം കേസെടുത്തു.നിഫ്റ്റ് ഡയരക്ടര്‍ ഡോ. ഇളങ്കോവന്‍ തളിപ്പറമ്പ് പോലീസിന് നല്‍കിയ പരാതി പ്രകാരമാണ് കേസ്.

കണ്ണൂര്‍: മട്ടന്നൂര്‍ വെളിയമ്പ്ര പെരിയത്തില്‍നിന്നും രണ്ട് സ്റ്റീല്‍ ബോംബുകള്‍ കണ്ടെടുത്തു. രഹസ്യവിവരത്തെ തുടര്‍ന്ന് മട്ടന്നൂര്‍ സിഐ ജോഷി ജോസിന്റെ നേതൃത്വത്തിലുള്ള സംഘം നടത്തിയ പരിശോധനയിലാണ് ഉഗ്രസ്‌ഫോടന ശേഷിയുള്ള സ്റ്റീല്‍ ബോംബുകള്‍ കണ്ടെടുത്തത്. രാവിലെ പെരിയം കമ്പിവേലിയിലെ ചെങ്കല്‍ ക്വാറിക്കു സമീപത്ത് അടുക്കിവച്ച ചെങ്കല്ലുകള്‍ക്കിടയില്‍ നിന്നാണ് ബോംബുകള്‍ കണ്ടെത്തിയത്. ഇവ മട്ടന്നൂര്‍ പോലീസ് സ്റ്റേഷനിലേക്ക് മാറ്റി. സംഭവത്തെക്കുറിച്ച്‌ പോലീസ് അന്വേഷണം തുടങ്ങി. മാസങ്ങള്‍ക്കു മുൻപ് ഈ പ്രദേശങ്ങളില്‍നിന്നു വാളുകള്‍ പിടികൂടിയിരുന്നു.

ഇടുക്കി:ഇടുക്കി കമ്പക്കാനം കൂട്ടക്കൊലക്കേസിൽ രണ്ടുപേർ കൂടി പിടിയിൽ.കേസുമായി ബന്ധപ്പെട്ട് നേരത്തെ അറസ്റ്റിലായ മുഖ്യപ്രതികളായ അനീഷ്,ലിബീഷ് എന്നിവരെ സഹായിച്ച തൊടുപുഴ ആനക്കൂട് ചാത്തന്‍മല ഇലവുങ്കല്‍ ശ്യാംപ്രസാദ് (28), മൂവാറ്റുപുഴ വെള്ളൂര്‍കുന്നം പട്ടരുമഠത്തില്‍ സനീഷ് (30) എന്നിവരെയാണ് അറസ്റ്റുചെയ്തത്. മുഖ്യപ്രതികള്‍ അപഹരിച്ച സ്വര്‍ണം പണയം വയ്ക്കാന്‍ പിടിയിലായവര്‍ സഹായിച്ചെന്നാണ് വിവരം. കൊലപാതകത്തെക്കുറിച്ച്‌ വിവരമറിഞ്ഞിട്ടും പോലീസിനെ അറിയിക്കാത്തതിനും ഉപകരണങ്ങള്‍ വാങ്ങിക്കൊടുത്തു സഹായിച്ചതിനുമാണ് ഇവരെ അറസ്റ്റുചെയ്തത്.മന്ത്രവാദത്തിന്‍റെ പേരില്‍ കൃഷ്ണനും അനീഷും തമ്മിലുണ്ടായിരുന്ന അഭിപ്രായ വ്യത്യാസമാണ് ക്രൂരമായ കൊലപാതകത്തിലേക്ക് നയിച്ചത്. കൃഷ്ണനോടൊപ്പം വീട്ടില്‍ താമസിച്ച്‌ മന്ത്രവിദ്യകള്‍ സ്വായത്തമാക്കിയിരുന്ന അനീഷാണ് കൊലപാതകം ആസൂത്രണം ചെയ്‌തതെനാണ് പോലീസിന്റെ കണ്ടെത്തല്‍.തൊടുപുഴ വണ്ണപ്പുറം കമ്പക്കാനം കാനാട്ടുവീട്ടില്‍ കൃഷ്ണന്‍, ഭാര്യ സുശീല, മക്കളായ ആര്‍ഷ, അര്‍ജുന്‍ എന്നിവരെ കൊന്നു വീടിനോടു ചേര്‍ന്ന ചാണകക്കുഴിയില്‍ കുഴിച്ചുമൂടിയ നിലയില്‍ കഴിഞ്ഞാഴ്ചയാണ് കണ്ടെത്തിയത്.

തിരുവനന്തപുരം: ഇന്ന് കര്‍ക്കിടകവാവ്. പിതൃസ്മരണയില്‍ സംസ്ഥാനത്തിന്‍റെ വിവിധ കേന്ദ്രങ്ങളില്‍ ലക്ഷക്കണക്കിന് ആളുകളാണ് ബലിതര്‍പ്പണം നടത്തുന്നത്. പുലര്‍ച്ചയോടു കൂടി തന്നെ വിവിധ ക്ഷേത്രങ്ങളില്‍ ചടങ്ങുകള്‍ ആരംഭിച്ചു. ബലിച്ചോറുണ്ണാന്‍ വരുന്ന പിതൃക്കളുടെ ആത്മാക്കളെ തൃപ്തിപ്പെടുത്താന്‍ ദര്‍ഭയും നീരും ചേര്‍ത്ത് അവര്‍ ബലിച്ചോര്‍ നിവേദിച്ചു. പ്രതികൂല സാഹചര്യത്തിലും ആയിരങ്ങള്‍ ആലുവയില്‍ ബലിതര്‍പ്പണത്തിന് എത്തി. ക്ഷേത്രത്തിന്റെ ഭാഗം വെള്ളം മുങ്ങിയതിനാല്‍ ശിവരാത്രി മണപ്പുറത്തെ ബലിതര്‍പ്പണം മണപ്പുറം റോഡിലാണ് നടത്തുന്നത്.വെള്ളം ഉയര്‍ന്നതിനാല്‍ പെരിയാറില്‍ മുങ്ങി നിവരാന്‍ പൊലീസ് അനുവദിക്കില്ല. പകരം ബലി വെള്ളത്തില്‍ ഒഴുക്കി വിടാന്‍ അവസരം നല്‍കി. ബലിതര്‍പ്പണത്തിനെത്തുന്ന വിശ്വാസികള്‍ക്കും പുരോഹിതര്‍ക്കും മാത്രമായിരുന്നു പ്രവേശനം അനുവദിച്ചത്.ദേശീയ ദുരന്തനിവാരണ സേനയുടെ 37 പേരടങ്ങുന്ന ടീമിനെ വെള്ളിയാഴ്ച ഉച്ചയോടെ ആലുവ മണപ്പുറത്ത് വിന്യസിച്ചിരുന്നു. ഫയര്‍ഫോഴ്‌സിന്റെയും പൊലീസിന്റെയും സുരക്ഷയ്ക്കു പുറമെയാണിത്.തിരുവനന്തപുരം ജില്ലയില്‍ വര്‍ക്കല പാപനാശം കടപ്പുറത്ത് വെള്ളിയാഴ്ച രാത്രി ഏഴുമുതലും മറ്റിടങ്ങളില്‍ ശനിയാഴ്ച പുലര്‍ച്ചെയും പിതൃതര്‍പ്പണം ആരംഭിച്ചു. ശനിയാഴ്ച ഉച്ചയ്ക്ക് 3.27 വരെ ബലിതര്‍പ്പണം തുടരും. തിരുവല്ലം പരശുരാമസ്വാമിക്ഷേത്രം, വര്‍ക്കല പാപനാശം കടപ്പുറം, അരുവിപ്പുറം ശിവക്ഷേത്രം, മാറനല്ലൂര്‍ അരുവിക്കര ക്ഷേത്രം എന്നിവിടങ്ങളിലാണ് ബലിയിടാന്‍ തിരക്കുള്ളത്. വര്‍ക്കല ശിവഗിരി, ആറ്റിങ്ങല്‍ പൂവമ്ബാറ ക്ഷേത്രം, കൊല്ലമ്ബുഴ ആവണിപുരം ക്ഷേത്രം എന്നിവിടങ്ങളിലും ബലിതര്‍പ്പണം നടക്കുന്നുണ്ട്. കൊല്ലം ജില്ലയിലെ വിവിധ സ്നാനഘട്ടങ്ങളില്‍ പിതൃമോക്ഷത്തിനായി പതിനായിരങ്ങള്‍ ബലിതര്‍പ്പണം തുടങ്ങി.ഭാരതപ്പുഴയുടെ തീരത്തെ തിരുനാവായിലും വിപുലമായി തന്നെ ബലിതര്‍പ്പണ ചടങ്ങുകള്‍ നടന്നു.