June 2018

പത്തനംതിട്ട:എരുമേലിയിൽ നിന്നുംകാണാതായ ബിരുദ വിദ്യാർത്ഥിനി ജെസ്‌നയുടെ തിരോധാനവുമായി ബന്ധപ്പെട്ട് സുഹൃത്തിനെ നുണ പരിശോധനയ്ക്ക് വിധേയനാക്കാനൊരുങ്ങി പോലീസ്.ജസ്‌നയുടെ ഈ സുഹൃത്തിന് പലതും അറിയാമെന്നാണ് പൊലീസ് വിലയിരുത്തൽ. എന്നാല്‍ ചോദ്യം ചെയ്യലില്‍ ഇയാള്‍ കൃത്യമായ മറുപടി നല്‍കുന്നുമില്ല. ജസ്‌നയെ കാണാതായതിനു തൊട്ടുമുന്‍പുപോലും ഇയാളുടെ ഫോണിലേക്ക് ജെസ്‌നയുടെ ഫോണിൽ നിന്നും എസ്‌എംഎസ് സന്ദേശം പോയിട്ടുണ്ട്. അന്വേഷണ സംഘം പലതവണ ഇയാളെ ചോദ്യംചെയ്‌തെങ്കിലും ഇയാള്‍ ഒന്നും പറഞ്ഞില്ല. ഈ സാഹചര്യത്തിലാണ് നുണ പരിശോധനയ്ക്ക് യുവാവിനെ വിധേയനാക്കാനുള്ള തീരുമാനം.സുപ്രീംകോടതി നിര്‍ദ്ദേശ പ്രകാരം യുവാവ് സമ്മതിച്ചാല്‍ മാത്രമേ ഇത്തരം പരിശോധനകള്‍ നടത്താനാകൂ. വിസമ്മതം അറിയിച്ചാല്‍ അത് സംശയിക്കാനുള്ള മറ്റൊരു കാരണവുമാകും. അങ്ങനെ വന്നാല്‍ യുവാവിനെ പൊലീസ് കസ്റ്റഡിയില്‍ എടുത്ത് ചോദ്യം ചെയ്യുന്ന അവസ്ഥയും വരും.ജസ്‌നയെ കാണാതായതിന്റെ പിറ്റേന്ന് ഇയാള്‍ പരുന്തുംപാറയില്‍ പോയിരുന്നതായും പൊലീസ് സൂചന നല്‍കി. മുക്കൂട്ടുതറയില്‍ നിന്ന് കുറച്ചു സമയം യാത്ര ചെയ്താല്‍ പരുന്തുംപാറയിലെത്താം. യുവാവുമായി മുൻപും ജെസ്‌ന ഇവിടെ പോയിട്ടുണ്ട്. ഈ സാഹചര്യത്തിലാണ് പോലീസ് സംശയം ബലപ്പെടുത്തുന്നത്.അതിനിടെ ജെസ്‌നയെ ഹാജരാക്കണമെന്നാവശ്യപ്പെട്ട് സമര്‍പ്പിച്ച ഹര്‍ജി ഹൈക്കോടതി ഇന്ന് പരിഗണിക്കും. ഷോണ്‍ ജോര്‍ജ് നല്‍കിയ ഹേബിയസ് കോര്‍പസ് ഹരജിയില്‍ പെണ്‍കുട്ടിയെ ഹാജരാക്കാന്‍ ഡി.ജി.പിക്ക് നിര്‍ദേശം നല്‍കിയിരുന്നു.

കണ്ണൂർ:ജില്ലയിൽ കനത്ത നാശം വിതച്ച് ശക്തമായും മഴയും കാറ്റും.പഴയ ബസ്സ്റ്റാൻഡിന് സമീപം യോഗശാല-കാർഗിൽ റോഡിൽ കൂറ്റൻ ഫ്ളക്സ് ബോർഡ് നിലംപൊത്തി. നിർത്തിയിട്ടിരുന്ന കാറിനും ഓട്ടോയ്ക്കും ലോട്ടറി സ്റ്റാലിനും മുകളിലേക്കാണ് ഫ്ലെക്സ് ബോർഡ് വീണത്.സംഭവം നടക്കുമ്പോൾ ലോട്ടറിസ്റ്റാളിലുണ്ടായിരുന്ന ജീവനക്കാരൻ തലനാരിഴയ്ക്കാണ് രക്ഷപ്പെട്ടത്.സംഭവത്തെ തുടർന്ന് ഇതിലൂടെയുള്ള ഗതാഗതം പോലീസ് വഴിതിരിച്ചു വിട്ടത് പഴയ ബസ്സ്റ്റാൻഡിൽ ഗതാഗത കുരുക്കിനും ഇടയാക്കി.അഗ്നിരക്ഷാസേന സ്ഥലത്തെത്തി ജെസിബി ഉപയോഗിച്ച് ബോർഡ് എടുത്തുമാറ്റിയാണ് ഗതാഗതം പുനഃസ്ഥാപിച്ചത്.കളക്റ്ററേറ്റിന് എതിർവശത്തുള്ള പെട്രോൾ പമ്പിന് സമീപത്തുള്ള കൂറ്റൻ ബോർഡും കാറ്റിൽ തകർന്നു വീണു. താവക്കര സ്കൈപാലസിന് സമീപത്തുള്ള ചെറു റോഡിൽ മരക്കൊമ്പുകൾ പൊട്ടിവീണ് ഗതാഗത തടസ്സമുണ്ടായി.കനത്ത മഴയിൽ നഗരത്തിൽ വൻ ഗതാഗത കുരുക്കാണ് അനുഭവപ്പെട്ടത്. പുതിയതെരു,മേലേചൊവ്വ,റെയിൽവേ സ്റ്റേഷൻ റോഡ് എന്നിവിടങ്ങളിൽ ശക്തമായ ഗതാഗത കുരുക്ക് അനുഭവപ്പെട്ടു.ഇതിനെ തുടർന്ന് ജോലിസ്ഥലത്തു നിന്നും വീട്ടിലേക്ക് പോകാൻ സ്ത്രീകളടക്കമുള്ള യാത്രക്കാർ ഏറെ ബുദ്ധിമുട്ടി.പലയിടത്തും വെള്ളക്കെട്ടുകളും രൂപപ്പെട്ടു.നഗരത്തിനു സമീപത്തെ ചില വീടുകളിലും വെള്ളം കയറിയിട്ടുണ്ട്.

കോഴിക്കോട്:കോഴിക്കോട് ജില്ലയിൽ കനത്ത മഴയിലും കാറ്റിലും വ്യാപക നാശനഷ്ടം.ശക്തമായ കാറ്റില്‍ കൊയിലാണ്ടി മൃഗാശുപത്രിക്ക് മുന്‍വശത്തുള്ള കൂറ്റന്‍ ആല്‍മരം സ്വകാര്യ ബസിന് മുകളില്‍ പതിച്ചു.ഇന്നലെ രാവിലെ പതിനൊന്നരയോടെയാണ് സംഭവം. അപകടത്തിൽ പരിക്കേറ്റ  ബസ് ഡ്രൈവര്‍ മെഡിക്കല്‍ കോളജ് സ്വദേശി വിനോദ് (47) കണ്ടക്ടര്‍ കോഴിക്കോട് പുതിയ പറമ്പത്ത് ബാബുരാജ് (51) എന്നിവരെ താലൂക്ക് ആശുപത്രിയില്‍ പ്രവേശിപ്പിച്ചു.ബസ് യാത്രക്കാരായ റാഹിയ(38) നസീറ (36) എന്നിവര്‍ക്ക് നിസാരപരിക്കേറ്റു.കോഴിക്കോട് നിന്നും കൊയിലാണ്ടിയിലേക്ക് വരികയായിരുന്ന അനഘ ബസിനു മുകളിലാണ് മരം വീണത്.ബസിന്‍റെ മുന്‍ ഭാഗം തകര്‍ന്നു.ഒരു ഓട്ടോയും മരത്തിനിടയിൽ കുടുങ്ങി.സമീപത്തെ കടകള്‍ക്കും കേടുപാടുകൾ സംഭവിച്ചു.കച്ചവടക്കാരും കാൽനട യാത്രക്കാരും ഓടി രക്ഷപ്പെട്ടതിനാല്‍ വലിയ അപകടം ഒഴിവായി.കൊയിലാണ്ടി നഗരത്തിലെ ഏറ്റവും തിരക്കേറിയ ഭാഗത്താണ് ആല്‍മരം വീണത്. മുപ്പത് വര്‍ഷം മുമ്പ് ഈ ആല്‍മരം ദേശീയപാത വികസനത്തിന്‍റെ ഭാഗമായി മുറിച്ചുമാറ്റാന്‍ ജില്ലാ കളക്ടര്‍ ഉത്തരവിറക്കിയിരുന്നു.എന്നാൽ ഇതിനെതിരേ കൊയിലാണ്ടിയിലെ സാംസ്‌കാരിക,പരിസ്ഥി പ്രവര്‍ത്തകർ രംഗത്തു വന്നതിനെ തുടർന്ന് മരം മുറിക്കാനുള്ള നീക്കം ഉപേക്ഷിക്കുകയായിരുന്നു.

കോഴിക്കോട്:കോഴിക്കോട് ജില്ലയിലെ ആശുപത്രികളിൽ രക്തക്ഷാമം രൂക്ഷം.നിപ്പ ഭീതിയെ തുടർന്ന് രക്തം നല്‍കാന്‍ ആളുകള്‍ മടിക്കുന്നതാണ് ഇപ്പോഴത്തെ പ്രതിസന്ധിക്ക് കാരണം. ഇതിനാല്‍ ശസ്ത്രക്രിയകള്‍ പോലും മാറ്റിവെക്കേണ്ട അവസ്ഥയാണുള്ളത്.രക്തം നല്‍കുന്നതിനായി കോഴിക്കോട് മെഡിക്കല്‍ കോളേജിലേക്ക് എത്താന്‍ ആളുകള്‍ മടിക്കുകയാണ്. ഇതിനാല്‍ കോഴിക്കോട് മെഡിക്കല്‍ കോളേജിലെ നെഗറ്റീവ് ബ്ലഡ് ഗ്രൂപ്പുകളുടെ സ്റ്റോക്ക് തീര്‍ന്നു.അടിയന്തര ശസ്ത്രക്രിയകള്‍ക്ക് ഇത് പ്രതിസന്ധി സൃഷ്ടിക്കുകയാണ്. രക്തത്തിന്റെ ക്ഷാമം പരിഹരിക്കുന്നതിനായി. ജില്ലാ ഭരണകൂടവും, ജില്ലാ ആരോഗ്യവകുപ്പും, ബ്ലഡ് ഡോണേഴ്സ് അസോസിയേഷനും സംയുക്തമായി രക്തദാന ക്യാമ്ബുകള്‍ സംഘടിപ്പിക്കാനൊരുങ്ങുകയാണ്.ജൂണ്‍ പത്തിനും പതിനാലിനുമിടയിലായിരിക്കും രക്തദാന ക്യാമ്ബുകള്‍ സംഘിപ്പിക്കുക. അനാവശ്യമായ ആശങ്കകളാണ് പലരെയും രക്തം നല്‍കുന്നതില്‍ നിന്നും പിന്തിരിപ്പിക്കുന്നതെന്നും ആശങ്കയില്ലാതെ രക്തദാനത്തിനായി ജനങ്ങള്‍ മുന്നോട്ടു വരണമെന്നും ജില്ലാ ആരോഗ്യ വകുപ്പ് ആവശ്യപ്പെട്ടു.