May 2018

ചെങ്ങന്നൂർ:ഉപതിരഞ്ഞെടുപ്പ് നടക്കുന്ന ചെങ്ങന്നൂരിൽ മികച്ച പോളിങ് പുരോഗമിക്കുന്നു.ആദ്യ മൂന്നു മണിക്കൂർ പിന്നിടുമ്പോൾ 18 ശതമാനം പോളിങ്ങാണ് രേഖപ്പെടുത്തിയിരിക്കുന്നത്. കൃത്യം ഏഴ് മണിക്ക് തന്നെ പോളിങ് ആരംഭിച്ചു. ആദ്യ മണിക്കൂറില്‍ തന്നെ നീണ്ട ക്യൂവാണ് പോളിങ് ബൂത്തുകളിലെല്ലാം ഉള്ളത്. എൽഡിഎഫ് സ്ഥാനാർഥി സജി ചെറിയാന്‍ കൊഴുവല്ലൂര്‍ എസ്‌.എന്‍.ഡി.പി എച്ച്‌.എസ്‌.എസിലെ 77ആം നമ്പർ ബൂത്തിലും യു.ഡി.എഫ്‌ സ്ഥാനാര്‍ത്ഥി ഡി. വിജയകുമാര്‍ സകുടുംബം പുലിയൂര്‍ ഗവ. ഹൈസ്കൂളിലെ 97ആം നമ്പർ ബൂത്തിലും വോട്ട്‌ രേഖപ്പെടുത്തി. പ്രതിപക്ഷ നേതാവ് രമേശ് ചെന്നിത്തലയ്ക്കും ചെങ്ങന്നൂര്‍ മണ്ഡലത്തിലായിരുന്നു വോട്ട്. തൃപ്പെരുന്തുറ യു.പി സ്കൂളില്‍ 130ആം നമ്പർ ബൂത്തില്‍ കുടുംബസമേതമാണ് രമേശ് ചെന്നിത്തല വോട്ട് ചെയ്യാനെത്തിയത്.വോട്ടിംഗ് ആദ്യ ഏതാനും മണിക്കൂറുകള്‍ പിന്നിടുമ്ബോള്‍ അനിഷ്ട സംഭവങ്ങളൊന്നും റിപ്പോര്‍ട്ട് ചെയ്യപ്പെട്ടിട്ടില്ല. ആലപ്പുഴ എസ്.പി സുരേന്ദ്രന്റെ മേല്‍നോട്ടത്തില്‍ ശക്തമായ സുരക്ഷാ ക്രമീകരണമാണ് മണ്ഡലത്തിലുടനീളം സജ്ജമാക്കിയിട്ടുള്ളത്. വൈകിട്ട് ആറു വരെയാണ് വോട്ടെടുപ്പ്. 164 വോട്ടെടുപ്പ് കേന്ദ്രങ്ങളിലും 17 സഹായ ബൂത്തുകളിലുമായാണ് പോളിംഗ് പുരോഗമിക്കുന്നത്. ഓരോ ബൂത്തിലും രണ്ടു വോട്ടിംഗ് യന്ത്രങ്ങള്‍ വീതമുണ്ട്. 31നാണ് വോട്ടെണ്ണല്‍.

കോട്ടയം:പ്രണയിച്ചു വിവാഹം കഴിച്ചതിന്റെ പേരിൽ അർദ്ധരാത്രിയിൽ പെൺകുട്ടിയുടെ ബന്ധുക്കൾ തട്ടിക്കൊണ്ടു പോയ നവവരനെ മരിച്ച നിലയിൽ കണ്ടെത്തി.കുമാരനല്ലൂർ സ്വദേശി കെവിനെയാണ് മരിച്ച നിലയിൽ കണ്ടെത്തിയത്.പുനലൂര്‍ ചാലിയേക്കരയില്‍ നിന്നും ഇന്ന് പുലർച്ചെയാണ് കെവിന്‍റെ മൃതദേഹം കണ്ടെത്തിയത്. കെവിന്‍റെ ശരീരത്തില്‍ മുറിവേറ്റ പാടുകളും കണ്ടെത്തിയിട്ടുണ്ട്. കഴിഞ്ഞ ദിവസം അർധരാത്രി മാന്നാനത്തായിരുന്നു സംഭവം. അർധരാത്രി വീടാക്രമിച്ചാണ് അക്രമി സംഘം കെവിനെയും സുഹൃത്തിനെയും തട്ടിക്കൊണ്ടുപോയത്. പിന്നീട് സുഹൃത്തിനെ വിട്ടയച്ചു.പത്തനാപുരം സ്വദേശിയായ പെൺകുട്ടിയെ കെവിൻ രജിസ്റ്റർ വിവാഹം ചെയ്തിരുന്നു.പിന്നീട് പെൺകുട്ടിയെ കോട്ടയത്തെ ഒരു ഹോസ്റ്റലിൽ താമസിപ്പിച്ചു. കെവിൻ മാന്നാനത്ത് ബന്ധു വീട്ടിലുമായിരുന്നു.പെൺകുട്ടിയുടെ സഹോദരനും സംഘവും മൂന്നു വാഹനങ്ങളിൽ എത്തിയാണ് വീട്ടിൽ കയറി കെവിനെ തട്ടിക്കൊണ്ടുപോയത്. സംഭവത്തിൽ ബന്ധുകളുടെ പരാതിയിൽ പോലീസ് കൃത്യസമയത്ത് നടപടി സ്വീകരിച്ചില്ലെന്നും പരാതികൾ ഉയരുന്നുണ്ട്.അതേസമയം കേസെടുക്കുന്നതിൽ ഗാന്ധിനഗർ എസ്‌ഐക്ക് വീഴ്ച സംഭവിച്ചതായി ഡിവൈഎസ്പി റിപ്പോർട്ട് സമർപ്പിച്ചു.സംഭവത്തിൽ പോലീസ് മനപൂർവം അന്വേഷണം വൈകിപ്പിച്ചെന്നും കെവിന്‍റെ ബന്ധുക്കളും ഭാര്യയും ആരോപിച്ചിരുന്നു.ഇതിനിടെ പെൺ‌കുട്ടിയെ കാണാനില്ലെന്നു കാട്ടി ബന്ധുക്കൾ പത്തനാപുരം പോലീസ് സ്റ്റേഷനിൽ പരാതി നൽകിയിരുന്നു. ഇതിന്‍റെ അടിസ്ഥാനത്തിൽ ഗാന്ധിനഗർ പോലീസ് പെൺകുട്ടിയെ സ്റ്റേഷനിലെത്തിച്ച ശേഷം ആശുപത്രിയിൽ വൈദ്യപരിശോധനയ്ക്കു വിധേയയാക്കി.

തിരുവനന്തപുരം:സംസ്ഥാനത്തെ തപാൽ ജീവനക്കാരുടെ സമരം ആറാം ദിവസത്തിലേക്ക് കടന്നു.തപാല്‍ ഉരുപ്പടികൾ പല ഓഫീസുകളിലും കെട്ടിക്കിടക്കുകയാണ്. 5500 തപാല്‍ ഓഫീസുകള്‍, 35 റെയില്‍വെ മെയില്‍ സര്‍വീസ്, അഡ്‌മിനിസ്ട്രേറ്റീവ് ഓഫീസുകൾ തുടങ്ങിയവയെല്ലാം കഴിഞ്ഞ 22 മുതല്‍ തുറന്നിട്ടില്ല. ഗ്രാമീണ മേഖലയില്‍ പ്രവര്‍ത്തിക്കുന്ന ഡാക് സേവക് പ്രേരക്മാരുടെ സേവന വേതന വ്യവസ്ഥകള്‍ പരിഷ്‌കരിക്കണമെന്നാവശ്യപ്പെട്ട് തപാല്‍-ആര്‍എംഎസ് ജീവനക്കരുടെ സംഘടനയായ എന്‍എഫ്പിഇയാണ് അനിശ്ചിത കാല സമരം ആരംഭിച്ചത്. ഇതോടെ സര്‍ക്കാര്‍ ജോലിക്കുള്ള ഇന്റര്‍വ്യൂ കാര്‍ഡടക്കം അത്യാവശ്യമായി നല്‍കേണ്ട മുഴുവന്‍ തപാല്‍ ഉരുപ്പടികളും ഓഫീസുകളില്‍ കെട്ടിക്കിടക്കുകയാണ്.സ്പീഡ് പോസ്റ്റ്,പോസ്റ്റല്‍ ബാങ്കിങ്, സേവിങ്സ് പദ്ധതികള്‍, തപാല്‍ ലൈഫ് ഇന്‍ഷൂറന്‍സ് തുടങ്ങിയ സംവിധാനങ്ങളും കഴിഞ്ഞ 22 മുതല്‍ അനിശ്ചിതത്വത്തിലാണ്. സ്‌കൂള്‍ കോളേജ് വിദ്യാര്‍ത്ഥികള്‍ക്കുള്ള പ്രവേശന അറിയിപ്പുകള്‍, കിടപ്പിലായ രോഗികള്‍ക്കുള്ള പെന്‍ഷന്‍ തുകയെല്ലാം ഇത്രയും ദിവസങ്ങളായി മുടങ്ങിക്കിടക്കുകയാണ്. ഗ്രാമീണ മേഖലയില്‍ പ്രവര്‍ത്തിക്കുന്ന ജിഡിഎസുമാര്‍ക്ക് കേന്ദ്രസര്‍ക്കാറിന്റെ ആനുകൂല്യങ്ങളൊന്നും ലഭിക്കാത്തതില്‍ പ്രതിഷേധിച്ച്‌ തുടങ്ങിയ സമരത്തിന് തപാല്‍ മേഖലയില്‍ ഡിപ്പാര്‍ട്മെന്റ് ജീവനക്കാരുടെ പിന്തുണയുമുണ്ട്. അതേ സമയം തമിഴ്‌നാട്, ആന്ധ്ര, ബംഗാള്‍ എന്നീ സംസ്ഥാനങ്ങളിലെ ഡിപ്പാര്‍ട്മെന്റ് ജീവനക്കാര്‍ സമരത്തിന്റെ ആവശ്യങ്ങളോട് ഐക്യദാര്‍ഢ്യം പ്രഖ്യാപിച്ചു തന്നെ ജോലിയില്‍ പ്രവേശിച്ചിട്ടുണ്ട്. തിങ്കളാഴ്ച തിരുവനന്തപുരത്തെ തപാല്‍ വകുപ്പിന്റെ ആസ്ഥാനത്തിന് മുന്നിലേക്ക് സമരം വ്യാപിപ്പിക്കാനുള്ള പദ്ധതിയുമുണ്ട്.

കോഴിക്കോട്:നിപ്പ വൈറസിനെ പ്രതിരോധിക്കുന്നതിനായി മലേഷ്യയിൽ നിന്നെത്തിച്ച റിബ വൈറിൻ ഉപയോഗിക്കാനുള്ള വിവേചനാധികാരം ഡോക്റ്റർമാർക്ക് നൽകിക്കൊണ്ടുള്ള ചികിത്സ മാർഗരേഖ പുറത്തിറക്കി.മറ്റുപല രോഗങ്ങൾക്കും ഉപയോഗിക്കുന്ന റിബ വൈറിൻ നിപ്പ ബാധിതരിൽ എത്രത്തോള ഫലപ്രദമാണെന്ന് ഇതുവരെ സ്ഥിതീകരിച്ചിട്ടില്ല.ദോഷകരമായ പാർശ്വഫലങ്ങൾ ഉള്ള മരുന്നാണിതെന്ന് പബ്ലിക് ഹെൽത്ത് അസി.ഡയറക്റ്റർ കെ.ജെ റീന നേരത്തെ വ്യക്തമാക്കിയിരുന്നു.ഇതിന്റെ ഉപയോഗം കിഡ്നിയുടെ പ്രവർത്തനത്തെ ദോഷകരമായി ബാധിക്കും.നിപ്പ ബാധിതർക്ക് വലിയ ഡോസിൽ തന്നെ ഈ മരുന്ന് നൽകേണ്ടി വരും.ഒരു കോഴ്സിൽ 250 ടാബ്‌ലറ്റുകൾ വരെ നൽകേണ്ടി വരുമെന്നാണ് കണക്ക്.ഈ സാഹചര്യങ്ങൾ ഒക്കെ മുന്നിൽ കണ്ടുകൊണ്ടാണ് രോഗിയുടെ ആരോഗ്യസ്ഥിതി കൂടി കണക്കിലെടുത്ത് മരുന്ന് ഉപയോഗിക്കാനുള്ള വിവേചനാധികാരം ഡോക്റ്റർമാർക്ക് നൽകിയിരിക്കുന്നത്.ഇതിനിടെ നിപ്പ വൈറസ് ബാധയുടെ പശ്ചാത്തലത്തിൽ കോഴിക്കോട് ജില്ലയിൽ നടക്കാനിരിക്കുന്ന മുഴുവൻ പൊതുപരിപാടികളും മെയ് 31 വരെ  നിർത്തി വെയ്ക്കാൻ കലക്റ്റർ യു.വി ജോസ് നിർദേശം നൽകിയിട്ടുണ്ട്.മെയ് 31 വരെ ജില്ലയിൽ നടക്കാനിരിക്കുന്ന പിഎസ്‌സി പരീക്ഷകളും മാറ്റിവെച്ചിട്ടുണ്ട്.ജില്ലയിലെ അംഗൻവാടികൾ, ട്യൂഷൻ സെന്ററുകൾ, ട്രെയിനിങ് ക്ലാസുകൾ എന്നിവയും മെയ് 31 വരെ പ്രവർത്തിക്കരുതെന്നും കലക്റ്റർ നിർദേശിച്ചിട്ടുണ്ട്.കാലിക്കറ്റ് സർവകലാശാലയുടെ എല്ലാ പരീക്ഷകളും നിർത്തിവെയ്ക്കാനും നിർദേശമുണ്ട്.വൈറസ് വ്യാപനം തടയുന്നതിനായി പരമാവധി കൂടിച്ചേരലുകൾ ഒഴിവാക്കുക എന്ന ലക്ഷ്യത്തോടെയാണ് പൊതുപരിപാടികളും പരീക്ഷകളും മാറ്റിയത്.