May 2018

കണ്ണൂർ:ഇന്നലെ വൈകുന്നേരം ഏഴുമണിയോടുകൂടിയുണ്ടായ കനത്ത ഇടിയിലും മഴയിലും കാറ്റിലും ജില്ലയിൽ വിവിധയിടങ്ങളിൽ വ്യാപക നാശനഷ്ടം. സംസ്ഥാന സർക്കാരിന്റെ വാർഷികാഘോഷങ്ങൾക്കായി കണ്ണൂർ കളക്റ്ററേറ്റ് മൈതാനത്ത് സ്ഥാപിച്ച പന്തൽ കാറ്റിൽ നിലംപൊത്തി. വാർഷികാഘോഷത്തിൽ വിവിധ വകുപ്പുകളുടെ പ്രദർശനത്തിനായി ഒരുക്കിയ പന്തലാണ്  തകർന്നത്.പണി പൂർത്തിയായ പന്തൽ മുഴുവനായും തകർന്നു.തകർന്നുവീണ പന്തലിനുള്ളിൽ ജോലിക്കാരുൾപ്പെട്ടിട്ടുണ്ടെന്ന സംശയം ആശങ്കയ്ക്കിടയാക്കി.ഫയർഫോഴ്‌സ് തിരച്ചിൽ നടത്തുന്നതിനിടെ പന്തലിനുള്ളിൽ അകപ്പെട്ട  മൂന്നു അന്യസംസ്ഥാന തൊഴിലാളികളും നിസ്സാര പരിക്കുകളോടെ രക്ഷപ്പെട്ടതായി കണ്ടെത്തി. പന്തലിനുള്ളിൽ ഒരു ലോറിയും അകപ്പെട്ടിട്ടുണ്ട്.സ്‌കൗട്ട് ഭവന് മുൻപിൽ മരം കടപുഴകിവീണു.നഗരത്തിലെ പലകടകളുടെയും മേൽക്കൂരയിലെ ഷീറ്റുകൾ ശക്തമായ കാറ്റിൽ പറന്നു.റയിൽവെ സ്റ്റേഷന്റെ മേൽക്കൂരയും കാറ്റിൽ തകർന്നു.കനത്ത മഴയിലും കാറ്റിലും തളിപ്പറമ്പ് റോഡിൽ മരം കടപുഴകി വീണു.വൈദ്യുത തൂണുകൾ തകർത്ത് ബൈക്കുകൾക്ക് മുകളിലേക്കാണ് മരം വീണത്.കണ്ണൂരിൽ നിന്നും അഗ്‌നിശമന സേനയെത്തിയാണ് മരം മുറിച്ചുമാറ്റിയത്.

തിരുവനന്തപുരം:മധ്യവേനലവധിക്ക് ശേഷം ഇക്കുറി പൊതുവിദ്യാലയങ്ങള്‍ തുറക്കുന്നത് ജൂണ്‍ ഒന്നിന് തന്നെ. തിങ്കളാഴ്ചയോ ബുഘനാഴ്ചയോ എന്ന പതിവ് തെറ്റിച്ചാണ് ഇക്കുറി ജൂണ്‍ ഒന്നാം തീയതിയായ വെള്ളിയാഴ്ച തന്നെ സ്‌കൂള്‍ തുറക്കാന്‍ സര്‍ക്കാര്‍ തീരുമാനം ആയത്. ജൂണ്‍ രണ്ട് ശനിയാഴ്ചയും പ്രവൃത്തി ദിവസമായിരിക്കും.ഇതു സംബന്ധിച്ച ഔദ്യോഗിക പ്രഖ്യാപനം ഈ ആഴ്ച തന്നെ നടത്തും.പതിവനുസരിച്ച്‌ തിങ്കളാഴ്ചയോ ബുധനാഴ്ചയോ ആണ് സ്‌കൂള്‍ തുറക്കുന്നത്. ആ പതിവനുസരിച്ച്‌ ഇക്കൊല്ലം ജൂണ്‍ നാലിന് തിങ്കളാഴ്ച സ്‌കൂള്‍ തുറക്കുമെന്നായിരുന്നു പ്രചരിച്ചിരുന്നത്. അടുത്ത അധ്യയന വർഷം 220 പ്രവൃത്തി ദിവസം ഉണ്ടാകണമെന്നതിലാണ് ഈ തീരുമാനം.പുതിയ വിദ്യാഭ്യാസാവകാശ നിയമത്തിലെ വ്യവസ്ഥകള്‍ പ്രകാരം സ്‌കൂള്‍ ഉച്ചഭക്ഷണത്തിന് കേന്ദ്രസര്‍ക്കാര്‍ ഫണ്ട് അനുവദിക്കണമെങ്കില്‍ 220 പ്രവൃത്തിദിനം വേണം. ജൂണ്‍ നാലിന് സ്‌കൂള്‍ തുറക്കുമെന്നാണ് സംസ്ഥാനത്തെ മിക്ക സി.ബി.എസ്.ഇ. സ്‌കൂളുകളും അറിയിച്ചിരിക്കുന്നത്. സി.ബി.എസ്.ഇ. സ്‌കൂളുകള്‍ക്ക് ഈ തീരുമാനം ബാധകമല്ല.

തളിപ്പറമ്പ്:ഭര്‍ത്താവ് മരിച്ച്‌ ദിവസങ്ങള്‍ പിന്നിട്ടിട്ടും അത് മനസ്സിലാക്കാന്‍ കഴിയാതെ ഭാര്യ മൃതദേഹത്തിന് കാവലിരുന്നു.ഒരാഴ്ചയോളം ബന്ധുക്കളെയോ നാട്ടുകാരെയോ അറിയിക്കാതെ മൃതദേഹത്തിനരികിൽ അന്തിയുറങ്ങുകയും ചെയ്തു.തുടർന്ന് വീട്ടില്‍ നിന്നും ദുര്‍ഗന്ധം വമിച്ചതിനെ തുടര്‍ന്ന് നാട്ടുകാര്‍ നടത്തിയ പരിശോധനയിലാണ് അഴുകിയ നിലയില്‍ കിടക്കുന്ന മൃതദേഹം കണ്ടെത്തിയത്.തളിപ്പറമ്പ് പൂക്കോത്ത്‌തെരുവിലെ പുതിയോന്നന്‍ ബാലനാ(65)ണ് മരിച്ചത്. മാനസിക അസ്വാസ്ഥ്യമുണ്ടെന്ന് കരുതുന്ന ഭാര്യ തോലന്‍ കമലാക്ഷി മൃതദേഹത്തോടൊപ്പം കഴിയുകയായിരുന്നു. ഇരുവര്‍ക്കും മക്കളില്ല. അയല്‍പക്കവുമായി വലിയ സഹകരണമില്ലാത്തതിനാല്‍ ആരും മരണ വിവരം അറിഞ്ഞതുമില്ല. ബാലന്‍ മരിച്ചിട്ട് ദിവസങ്ങള്‍ കഴിഞ്ഞിട്ടുണ്ടാകുമെന്നാണ് കരുതുന്നത്. എന്നാല്‍ എല്ലാ ദിവസവും കമലാക്ഷി സമീപത്തെ ക്ഷേത്രത്തില്‍ ഭക്ഷണം കഴിക്കാനും മറ്റുമായി എത്തിയിരുന്നു. സമീപത്തുള്ളവരുമായി ഇവര്‍ക്ക് അടുപ്പമില്ലാത്തതിനാല്‍ ആരും ബാലനെ പുറത്ത് കാണാത്തതില്‍ അന്വേഷിച്ചതുമില്ല.ദിവസവും അലക്കിയ തുണി മാറ്റി കമലാക്ഷി ഭര്‍ത്താവിനെ പുതപ്പിക്കുകയും ചെയ്തിരുന്നു. .കഴിഞ്ഞ ദിവസം അസഹ്യമായ ദുര്‍ഗന്ധം പരന്ന് തുടങ്ങിയതിനെ തുടര്‍ന്ന് ഉറവിടം അന്വേഷിച്ചപ്പോഴാണ് വീടിനുള്ളില്‍ നിലത്ത് തുണികള്‍ കൊണ്ടു മൂടിവച്ച നിലയില്‍ അഴുകിയ മൃതദേഹം കണ്ടെത്തിയത്.നാട്ടുകാര്‍ വിവരമറിയിച്ചതിനെ തുടര്‍ന്ന് സിഐ കെ.ജെ.വിനോയി, എസ്‌ഐ കെ.ദിനേശന്‍ എന്നിവരുടെ നേതൃത്വത്തില്‍ പൊലീസ് എത്തി പരിശോധന നടത്തി. വീട് അടച്ചുപൂട്ടി പൊലീസ് കാവല്‍ ഏര്‍പ്പെടുത്തി. കമലാക്ഷിയെ ഇവിടെ നിന്ന് മാറ്റുവാന്‍ നാട്ടുകാരും ബന്ധുക്കളും ശ്രമിച്ചെങ്കിലും ഇവര്‍ പോകാതെ വീടിനു പുറത്ത് ഇരിക്കുകയാണ്. മൃതദേഹം ഇന്ന് പോസ്റ്റ്‌മോര്‍ട്ടത്തിനു ശേഷം മോറാഴ കൂളിച്ചാല്‍ ശ്മശാനത്തില്‍ സംസ്‌കരിക്കും.

കണ്ണൂർ:മാഹിയിൽ കൊല്ലപ്പെട്ട സിപിഎം പ്രവർത്തകൻ കണ്ണിപ്പൊയിൽ ബാബുവിന്റെ വീട്ടിൽ മുഖ്യമന്ത്രി സന്ദർശനം നടത്തി.ശനിയാഴ്ച രാത്രി എട്ടുമണിയോടെയാണ് മുഖ്യമന്ത്രി എത്തിയത്. അഞ്ച്‌മിനിറ്റോളം ഇവിടെ ചിലവഴിച്ച മുഖ്യമന്ത്രി ബാബുവിന്റെ ഭാര്യയെയും മക്കളെയും ആശ്വസിപ്പിച്ചശേഷമാണ് മടങ്ങിയത്.സിപിഎം കണ്ണൂർ ജില്ലാ സെക്രട്ടറി പി.ജയരാജൻ, മത്സ്യഫെഡ് ചെയർമാൻ സി.പി. കുഞ്ഞിരാമൻ, നേതാക്കളായ എം.സുരേന്ദ്രൻ, എം.സി. പവിത്രൻ, തലശേരി നഗരസഭ ചെയർമാൻ സി.കെ. രമേശൻ എന്നിവരും മുഖ്യമന്ത്രിക്ക് ഒപ്പമുണ്ടായിരുന്നു. മുഖ്യമന്ത്രിയുടെ പ്രതികരണം ആരാഞ്ഞ മാധ്യമ പ്രവർത്തകരോട് സംസാരിക്കാൻ അദ്ദേഹം തയ്യാറായില്ല.സിപിഎം സംസ്ഥാന സെക്രെട്ടറി കോടിയേരി ബാലകൃഷ്ണനും കഴിഞ്ഞ ദിവസം ബാബുവിന്റെ വീട് സന്ദർശിച്ചിരുന്നു.