March 2018

കാഞ്ഞങ്ങാട്:കാഞ്ഞങ്ങാട് ആശുപത്രിയിൽ ഗർഭിണി ചികിത്സ കിട്ടാതെ മരിച്ച സംഭവത്തിൽ പ്രതിഷേധം ശക്തം.കാഞ്ഞങ്ങാട് സ്വദേശിനി ആശയാണ് ആശുപത്രി ജീവനക്കാരുടെ അനാസ്ഥമൂലം ചികിത്സ കിട്ടാതെ മരണപ്പെട്ടത്.മാർച്ച് 17 നാണ് ആശയെ  വയറുവേദനയും ഛർദിയും കാരണം കാഞ്ഞങ്ങാട് ദീപ ഹോസ്പിറ്റലിൽ അഡ്മിറ്റ് ചെയ്തത്.എന്നാൽ ആശയെ  പരിശോധിച്ച ഡോക്റ്റർമാർ പറഞ്ഞത് ആശയ്ക്ക് യാതൊരു വിധത്തിലുള്ള കുഴപ്പമില്ലെന്നും ഇത്  വെറും അഭിനയം മാത്രമാണെന്നുമാണ്.രോഗിയുടെ അഭിനയത്തിന് നിങ്ങൾ കൂട്ടുനിൽക്കരുതെന്നും ബന്ധുക്കളോട് പറഞ്ഞു എന്നാൽ അവശത വർധിച്ചപ്പോൾ ബന്ധുക്കൾ വീണ്ടും ഡോക്റ്ററെ സമീപിച്ചു.അപ്പോഴും ഡോക്റ്റർ ആദ്യം നൽകിയ മറുപടി തന്നെയാണ് നൽകിയത്.ഇതിനെത്തുടർന്ന് ബന്ധുക്കൾ ആശയെ അവിടെനിന്നും ഡിസ്ചാർജ് ചെയ്ത് മംഗളൂരുവിലെ ആശുപത്രിയിലേക്ക് മാറ്റി.അവിടെ വെച്ച് നടത്തിയ പരിശോധനയിലാണ് കുഞ്ഞ് മരിച്ചെന്നും ആശയുടെ  ശരീരം മുഴുവൻ ഇൻഫെക്ഷൻ ബാധിച്ചെന്നും ആശ രക്ഷപ്പെടാനുള്ള സാധ്യത ഒരുശതമാനം മാത്രമേ ഉള്ളൂ എന്നും അറിയുന്നത്.ഈ സംഭവത്തിനെതിരെ കടുത്ത പ്രതിശേഷമാണ് ഉയരുന്നത്.സംഭവത്തെ കുറിച്ച് ആശയുടെ ഒരു ബന്ധു ഫേസ്ബുക്കിൽ എഴുതിയ ഒരു പോസ്റ്റും ഇപ്പോൾ ചർച്ചയാകുകയാണ്.

ആലപ്പുഴ:ആലപ്പുഴയിൽ വാഹനാപകടത്തിൽ അച്ഛനും രണ്ടു മക്കളും മരിച്ചു.തോട്ടപ്പള്ളി കല്പകവാടിയിൽ ശനിയാഴ്ച പുലർച്ചെയാണ് അപകടമുണ്ടായത്. നിർത്തിയിട്ടിരുന്ന ലോറിയിൽ കാറിടിച്ചാണ് അപകടമുണ്ടായത്.ബാബു (48), അഭിജിത്ത് (18), അമര്‍ജിത്ത് (16) എന്നിവരാണ് മരിച്ചത്. ബാബുവിന്റെ ഭാര്യ ലിസി ആശുപത്രിയില്‍ ചികിത്സയിലാണ്. ഇവരുടെ നില അതീവ ഗുരുതരമായി തുടരുകയാണ്.അമ്പലപ്പുഴ ക്ഷേത്രോത്സവത്തിനു വന്നതായിരുന്നു ബാബുവും കുടുംബവും.തിരിച്ചുള്ള യാത്രയ്ക്കിടെയാണ് അപകടമുണ്ടായത്.അപകട കാരണം വ്യക്തമല്ല.

കണ്ണൂർ:കഞ്ചാവും കുഴല്പണവുമായി രണ്ടുപേർ പിടിയിൽ.245000 രൂപയുടെ കുഴപ്പണവുമായി തലശ്ശേരി സ്വദേശി കെ.പി ഷമാനെയും 15 ഗ്രാം കഞ്ചാവുമായി പാറാട് സ്വദേശി പറമ്പത്ത് മൻസിലിൽ തൻവീറുമാണ് പിടിയിലായത്.രഹസ്യവിവരത്തെ തുടർന്ന് നടത്തിയ പരിശോധനയിൽ പാപ്പിനിശ്ശേരി എക്‌സൈസ് ഇൻസ്പെക്റ്റർ എം.ദിലീപും സംഘവുമാണ് ഇവരെ പിടികൂടിയത്.കണ്ണാടിപ്പറമ്പ് പുല്ലൂപ്പിക്കടവ് പാലത്തിനു സമീപത്തുനിന്നും ബുധനാഴ്ച വൈകിട്ടോടെയാണ് ഇവർ രണ്ടുപേരും പിടിയിലാകുന്നത്.വർഷങ്ങളായി ഇവർ കുഴൽപ്പണ വിതരണവും കഞ്ചാവ് വിൽപ്പനയും നടത്തിവരികയാണെന്നും പോലീസ് പറഞ്ഞു. പ്രിവന്റീവ് ഓഫീസർ കെ.ദിനേശൻ,സി.ഇ.ഒമാരായ കെ.സി ഷിബു,കെ.സുജിത്ത്,കെ.പി റോഷി എന്നിവരും എക്‌സൈസ് സംഘത്തിൽ ഉണ്ടായിരുന്നു.

തിരുവനന്തപുരം:കേന്ദ്രസർക്കാരിന്റെ പുതിയ തൊഴിൽ നിയമ ഭേദഗതിയിൽ പ്രതിഷേധിച്ച് ഏപ്രിൽ രണ്ടിന് സംസ്ഥാനത്ത് പൊതുപണിമുടക്ക് നടത്തും. ബിഎംഎസ് ഒഴികെയുള്ള തൊഴിലാളി സംഘടനകൾ പണിമുടക്കിൽ പങ്കെടുക്കും.സംസ്ഥാനത്തെ സ്വകാര്യ-പൊതുമേഖലാ സ്ഥാപനങ്ങളിലെ മുഴുവൻ തൊഴിലാളികളും പണിമുടക്കിൽ പങ്കെടുക്കണമെന്ന് സംയുക്ത ട്രേഡ് യൂണിയൻ നേതാക്കൾ ആവശ്യപ്പെട്ടു.നിശ്ചിത കാലാവധിയിലേക്ക് തൊഴിലാളികളെ നിയമിക്കാൻ തൊഴിലുടമകൾക്ക് അധികാരം നൽകിയ കേന്ദ്ര സർക്കാർ നടപടിയിൽ പ്രതിഷേധിച്ചാണ് പണിമുടക്ക്.1946 ലെ ഇൻഡസ്ട്രിയൽ എംപ്ലോയ്‌മെന്റ് സ്റ്റാന്റിംഗ് ഓർഡർ ആക്റ്റിൽ നിയമ ഭേദഗതി വരുത്തിയാണ് കേന്ദ്രസർക്കാർ വിജ്ഞാപനം പുറപ്പെടുവിച്ചിരിക്കുന്നത്.