March 2018

തിരുവനന്തപുരം:ഹയർസെക്കണ്ടറി ഫിസിക്സ് ചോദ്യപേപ്പർ വാട്സാപ്പ് വഴി ചോർന്നെന്ന റിപ്പോർട് തെറ്റാണെന്ന് കണ്ടെത്തി.ഇത് സംബന്ധിച്ച് ക്രൈം ബ്രാഞ്ച് ഡിജിപി സർക്കാരിന് റിപ്പോർട്ട് നൽകി.മതിലകം സെന്‍റ് ജോസഫ് ഹയർ സെക്കൻഡറി സ്കൂളിലെ വിദ്യാർഥികൾ തയാറാക്കിയ ചോദ്യാവലിയാണ് ചോർന്ന ചോദ്യപേപ്പറെന്ന പേരിൽ വാട്സ്ആപ്പിൽ പ്രചരിച്ചതെന്നും റിപ്പോർട്ടിൽ പറയുന്നു.ഈമാസം 21നു നടന്ന ഹയര്‍ സെക്കന്‍ഡറി ഫിസിക്സ് പരീക്ഷയുടെ ചോദ്യപേപ്പർ വാട്സ്ആപിലൂടെ പ്രചരിച്ചുവെന്നതായിരുന്നു അന്വേഷണത്തിന് ആധാരം.ഹയര്‍ സെക്കന്‍ഡറി ഡയറക്ടറുടെ പരാതിയുടെ അടിസ്ഥാനത്തില്‍ ൈസബര്‍സെല്‍ ഇതിനെ കുറിച്ച് അന്വേഷണം നടത്തി റിപ്പോർട്ട് സമർപ്പിക്കുകയായിരുന്നു.തൃശൂര്‍ മതിലകം സെന്റ് ജോസഫ്സ് ഹയര്‍ സെക്കന്‍ഡറി സ്കൂളിലെ വിദ്യാര്‍ഥികള്‍ പഠനത്തിെന്‍റ ഭാഗമായി തയാറാക്കിയ ചോദ്യാവലിയാണ് വാട്സ്‌ആപ് വഴി പ്രചരിച്ചത്. ആദ്യം 40 ചോദ്യങ്ങള്‍ എഴുതി തയാറാക്കിയ വിദ്യാര്‍ഥികള്‍ അധ്യാപരുടെ സഹായത്തോടെ പ്രധാനപ്പെട്ട 26 ചോദ്യങ്ങളാക്കി പിന്നീടതിനെ പരിഷ്കരിക്കുകയായിരുന്നെന്നും അന്വേഷണത്തില്‍ കണ്ടെത്തി. വാട്സ്ആപ് ഗ്രൂപ്പുകള്‍ പരിശോധിച്ചപ്പോള്‍ ഇക്കാര്യം വ്യക്തമായെന്നും ക്രൈംബ്രാഞ്ച് റിപ്പോര്‍ട്ടില്‍ പറയുന്നു. അധ്യാപകരില്‍നിന്നും വിദ്യാര്‍ഥികളില്‍നിന്നും മൊഴിയെടുത്ത സംഘം ശാസ്ത്രീയ പരിശോധനയും കൈയക്ഷര പരിശോധനയുമുള്‍പ്പെടെ നടത്തിയശേഷമാണ് റിപ്പോര്‍ട്ട് തയാറാക്കിയത്.

കൊച്ചി:നടി ആക്രമിക്കപ്പെട്ട കേസിൽ ദൃശ്യങ്ങൾ ആവശ്യപ്പെട്ട് ഹൈക്കോടതിയെ സമീപിച്ച ദിലീപിനോട് ദൃശ്യങ്ങൾ എന്തിനെന്ന ചോദ്യവുമായി ഹൈക്കോടതി. അങ്കമാലി കോടതിയിൽ വച്ച് നിങ്ങൾ ഈ ദൃശ്യങ്ങൾ കണ്ടതല്ലേ എന്നും പിന്നെ എന്തിനാണ് പകർപ്പ് ആവശ്യപ്പെടുന്നതെന്നും കോടതി ചോദിച്ചു. ദൃശ്യങ്ങൾ ദിലീപിന് കൈമാറിയാൽ അത് പുറത്ത് പ്രചരിക്കാൻ സാധ്യതയുണ്ടെന്നും ദുരുപയോഗം ചെയ്യപ്പെടാമെന്നും പ്രോസിക്യൂഷൻ വാദിച്ചിരുന്നു.ഇതിനു പിന്നാലെയാണ് കോടതിയുടെ സുപ്രധാന ചോദ്യം.കേസിലെ പ്രധാന തെളിവായ നടിയെ ആക്രമിച്ച ദൃശ്യങ്ങളിൽ കൂട്ടിച്ചേർക്കലുകൾ നടന്നിട്ടുണ്ടോ എന്ന് സംശയമുണ്ട്. വിചാരണ വേളയിൽ തന്‍റെ വാദങ്ങൾ നിരത്താൻ പ്രതിക്ക് പ്രധാന തെളിവ് ലഭിക്കേണ്ടത് അത്യാവശ്യമാണ്. അതിനാലാണ് ദൃശ്യങ്ങളുടെ പകർപ്പ് വേണമെന്ന് പറയുന്നതെന്നും പ്രതിഭാഗം വാദിച്ചു.ദൃശ്യങ്ങൾ  യാഥാർത്ഥമല്ലെന്നും എഡിറ്റിങ് നടന്നിട്ടുള്ളതായും സംശയിക്കുന്നു.ദൃശ്യത്തിൽ നടിയുടെ ശബ്ദത്തിന്റെ തീവ്രത  കുറച്ചതായും സംശയമുണ്ട്.ഇതറിയുന്നതിന് വേണ്ടിയാണ് ദൃശ്യങ്ങള്‍ ആവശ്യപ്പെടുന്നതെന്നും പൊലീസ് വിവരങ്ങള്‍ മറച്ചുവയ്ക്കുകയാണെന്നും ദിലീപിന്റെ അഭിഭാഷകന്‍ ആരോപിച്ചു.എന്നാൽ ദിലീപിന് ദൃശ്യങ്ങളുടെ പകർപ്പ് നൽകുന്നതിനെ പ്രോസിക്യൂഷൻ ഇന്നും ശക്തമായി എതിർത്തു. ദൃശ്യങ്ങൾ ദിലീപിന്‍റെ കൈവശം എത്തുന്നത് ഇരയ്ക്ക് അപകീർത്തിയുണ്ടാകാൻ കാരണമാകുമെന്നും ദൃശ്യങ്ങളുടെ സ്വകാര്യത നഷ്ടപ്പെടുമെന്നുമായിരുന്നു പ്രോസിക്യൂഷൻ വാദിച്ചത്.

കണ്ണൂർ:കണ്ണൂരിലെ ബോംബ് രാഷ്ട്രീയത്തിന്റെ ഇരയായി കാലുനഷ്ട്ടപ്പെട്ട അസ്‌ന ഇനി മുതൽ ഡോക്റ്റർ അസ്‌ന.2000 സെപ്റ്റംബർ 27 ന് പഞ്ചായത്തു തിരഞ്ഞെടുപ്പ് ദിവസമാണ് അസ്‌നയ്ക്ക് ബോംബ് സ്ഫോടനത്തിൽ കാല് നഷപ്പെടുന്നത്.അന്ന് ഒന്നാം ക്ലാസ്സിൽ പഠിക്കുകയായിരുന്നു അസ്‌ന.വീട്ടുമുറ്റത്ത് കളിച്ചുകൊണ്ടിരിക്കുമ്പോൾ രാഷ്ട്രീയ വൈരാഗ്യത്തിന്റെ പേരിൽ ആർഎസ്എസ് അക്രമികൾ എറിഞ്ഞ ബോംബ് പൊട്ടി അസ്‌നയ്ക്കും അനിയൻ ആനന്ദിനും അമ്മ ശാന്തയ്ക്കും ഗുരുതരമായി പരിക്കേൽക്കുകയായിരുന്നു.പരിക്കേറ്റ അസ്‌നയെ ആദ്യം തലശ്ശേരി ആശുപത്രിയിലും പിന്നീട് മൂന്നു മാസത്തോളം കൊച്ചിയിലെ ആശുപത്രിയിലും ചികിൽസിച്ചു.വലതുകാൽ മുട്ടിനു താഴെവെച്ച് മുറിച്ചുമാറ്റേണ്ടിയും വന്നു.പിന്നീട് കൃത്രിമക്കാൽ വെച്ചാണ് അസ്‌ന നടന്നത്. എസ്എസ്എൽസിക്കും പ്ലസ് ടുവിനും മികച്ച വിജയം നേടി.പിന്നീട് ഒരു വർഷം തൃശൂരിൽ എൻട്രൻസ് പരിശീലനവും നേടി.തുടർന്ന് വികലാംഗ കോട്ടയിൽ അസ്‌നയ്ക്ക് എംബിബിഎസ്‌ പ്രവേശനം ലഭിച്ചു.തളരാത്ത ആത്മവിശ്വാസവുമായി പഠിച്ച് അസ്‌ന ഇന്ന് ഡോക്റ്ററായിരിക്കുകയാണ്.കോൺഗ്രസ് അനുഭാവികളായിരുന്നു അസ്‌നയുടെ കുടുംബം.അസ്‌നയുടെ വിദ്യാഭ്യാസ ചിലവ് എൻജിഒ അസോസിയേഷൻ ഏറ്റെടുത്തിരുന്നു.അന്ന് മുഖ്യമന്ത്രിയായിരുന്ന ഉമ്മൻ ചാണ്ടിയുടെ നിർദേശപ്രകാരം അസ്‌നയ്ക്ക് കോഴിക്കോട് മെഡിക്കൽ കോളേജിൽ പ്രത്യേക സൗകര്യവും ഏർപ്പാട് ചെയ്തിരുന്നു.ശനിയാഴ്ച വൈകുന്നേതോടെയാണ് എംബിബിഎസ്‌ പരീക്ഷ വിജയിച്ച കാര്യം അസ്‌ന അറിയുന്നത്. ഡോക്റ്റർ ആകാൻ സാധിച്ചതിൽ അതിയായ സന്തോഷമുണ്ടെന്നും പരിക്കേറ്റ് ആശുപത്രിയിൽ കഴിഞ്ഞിരുന്ന കാലത്ത് ഉടലെടുത്ത ആഗ്രഹമാണ് ഡോക്റ്ററാവുക എന്നുള്ളതെന്നും അസ്‌ന പറഞ്ഞു.