February 2018

കണ്ണൂർ:കണ്ണൂർ സിറ്റി കസാനക്കോട്ടയിൽ ഉണ്ടായ സ്‌ഫോടനത്തിൽ വിദ്യാർത്ഥിക്ക് പരിക്ക്. ഗ്രൗണ്ടിൽ ക്രിക്കറ്റ് കളിച്ചുകൊണ്ടിരിക്കുകയായിരുന്ന വിദ്യാർഥികൾ നഷ്ട്ടമായ ബോൾ തിരയുന്നതിനിടെയായിരുന്നു സ്ഫോടനം.സ്‌ഫോടനത്തിൽ പരിക്കേറ്റ റാസി(14) എന്ന വിദ്യാർത്ഥിയെ പരിക്കുകളോടെ പരിയാരം മെഡിക്കൽ കോളേജിൽ പ്രവേശിപ്പിച്ചു.ബോംബ് സ്ക്വാഡും ഫോറൻസിക് വിദഗ്ധരും എസ് ഐ ശ്രീജിത്ത് കോടേരിയുടെ നേതൃത്വത്തിലുള്ള പോലീസും സ്ഥലത്തെത്തി പരിശോധന നടത്തി.

കണ്ണൂർ:കണ്ണൂർ നഗരത്തിൽ വിവിധയിടങ്ങളിലായി പോലീസ് നടത്തിയ പരിശോധനയിൽ മോഷണക്കേസിലെ പ്രതികളടക്കം 15 പേർ കസ്റ്റഡിയിൽ.ടൌൺ സി.ഐ രത്നകുമാറിന്റെയും എസ്.ഐ ശ്രീജിത്ത് കോടേരിയുടെയും നേതൃത്വത്തിൽ വ്യാഴാഴ്ച വൈകുന്നേരം മുതൽ വെള്ളിയാഴ്ച രാവിലെ വരെ നടത്തിയ പരിശോധനയിലാണ് ഇവർ കസ്റ്റഡിയിലാകുന്നത്.താണ മദ്യഷാപ്പിന് മുൻപിൽ വെച്ച് ബഹളമുണ്ടാക്കിയതിന് നാലുപേരെയും മറുനാടൻ തൊഴിലാളികളുടെ ഫോൺ തട്ടിപ്പറിച്ചതിനു ഒരാളെയും അറസ്റ്റ് ചെയ്തു.പഴയ ബസ്സ്റ്റാൻഡ് പരിസരത്തു നിന്നും നാലുകിലോയോളം കഞ്ചാവുമായി കാടാമ്പുഴ സ്വദേശി അർജുൻ എന്നയാളും വെള്ളിയാഴ്ച രാവിലെ പോലീസ് പിടിയിലായി.ബെംഗളൂരുവിൽ നിന്നും 30000 രൂപയ്ക്കാണ് കഞ്ചാവ് വാങ്ങിയതെന്ന് ഇയാൾ പൊലീസിന് മൊഴി നൽകി.കണ്ണൂരിലെത്തിച്ച് ചെറിയ പൊതികളാക്കി വിൽക്കാനായിരുന്നു പദ്ധതി.കവർച്ച ആസൂത്രണത്തിനിടെ തിരുവനന്തപുരം സ്വദേശി സുനിൽ കുമാർ, കക്കാട് സ്വദേശി മുജീബ്,ചക്കരക്കൽ സ്വദേശി ദിലീപ്,മലപ്പുറം സ്വദേശി നൗഷാദ്,ചപ്പാരപ്പടവിലെ ജിനീഷ് എന്നിവർ പോലീസ് പിടിയിലായി.പൂട്ട് തകർക്കാനുള്ള ഉപകരണങ്ങളും ഇവരിൽ നിന്നും പിടിച്ചെടുത്തു. പിടിയിലായവരെല്ലാം നേരത്തെ വിവിധ കേസുകളിൽ അറസ്റ്റിലായവരും ജയിൽ ശിക്ഷ അനുഭവിച്ചവരുമാണെന്ന് പോലീസ് പറഞ്ഞു.

കണ്ണൂർ:ഷുഹൈബ് കൊലക്കേസുമായി ബന്ധപ്പെട്ട് അറസ്റ്റിലായ പ്രതികൾ ആകാശ് തില്ലങ്കേരി, റിജിൻരാജ് എന്നിവരെ തിരിച്ചറിയൽ പരേഡിൽ സാക്ഷികൾ തിരിച്ചറിഞ്ഞു. കണ്ണൂർ സ്പെഷൽ സബ് ജയിൽ ഓഫീസിൽ ജുഡീഷൽ ഒന്നാംക്ളാസ് മജിസ്ട്രേറ്റ് (ഒന്ന്) എം.സി. ആന്‍റണിയുടെ നേതൃത്വത്തിലുള്ള സംഘമാണു തിരിച്ചറിയൽ പരേഡ് നടത്തിയത്.സാക്ഷികളായ നൗഷാദ്, നിയാസ്, റിയാസ് എന്നിവരാണ് പ്രതികളെ തിരിച്ചറിഞ്ഞത്.ആകാശിന്‍റെ പങ്കിനെക്കുറിച്ചു നൗഷാദ് ആദ്യഘട്ടത്തിൽ സംശയം പ്രകടിപ്പിച്ചിരുന്നുവെങ്കിലും ഇന്നലെ പ്രതികളെ തിരിച്ചറിയുകയായിരുന്നു.സാക്ഷികളുടെ സുരക്ഷ പരിഗണിച്ചു പോലീസ് വാഹനം ജയിലിനുള്ളിലേക്കു കയറ്റിയാണ് ഇവരെ പുറത്തിറക്കിയത്.രണ്ടുപ്രതികളെയും സാക്ഷികൾ തിരിച്ചറിഞ്ഞതിനാൽ അറസ്റ്റിലായത് യഥാർത്ഥ പ്രതികളാണെന്ന് വിശ്വസിക്കുന്നതായി കെ.സുധാകരൻ പറഞ്ഞു.സംഭവത്തിൽ‌ പരിക്കേറ്റവരും സാക്ഷികളുമായവർ ആദ്യം അറസ്റ്റിലായവരെക്കുറിച്ചു സംശയം ഉന്നയിച്ചതിനാലാണ്  ഇവർ മുഖ്യപ്രതികളല്ലെന്ന സംശയം പാർട്ടി ഉന്നയിച്ചതെന്നും സുധാകരൻ വ്യക്തമാക്കി.

അട്ടപ്പാടി:മുക്കാലിയിൽ മർദനമേറ്റ് ആദിവാസി യുവാവ് മധു മരിച്ച സംഭവത്തിൽ വനം വകുപ്പിനെതിരെ രൂക്ഷ വിമർശനവുമായി മധുവിന്റെ സഹോദരി ചന്ദ്രിക.മധുവിനെ ആക്രമിക്കാൻ ഒത്താശ ചെയ്തത് വനംവകുപ്പ് ഉദ്യോഗസ്ഥരാണെന്ന് ചന്ദ്രിക പറഞ്ഞു. തിരിച്ചറിയിൽ രേഖകൾ ഇല്ലാതെ നാട്ടുകാരെ വനത്തിനുള്ളിലേക്ക് കയറ്റിവിട്ടുവെന്നും മധുവിനെ ആക്രമിച്ചപ്പോൾ ഉദ്യോഗസ്ഥർ നോക്കിനിന്നുവെന്നും ചന്ദ്രിക പറഞ്ഞു.ഭക്ഷണം ഉണ്ടാകുമ്പോഴാണ് മധുവിനെ വനംവകുപ്പ് ഉദ്യോഗസ്ഥരുടെ സഹായത്തോടെ നാട്ടുകാർ പിടികൂടിയത്.തുടർന്ന് മാരകമായി മർദിക്കുകയും ഗുഹയിൽ നിന്നും നാല് കിലോമീറ്റർ നടത്തി കാട്ടിൽ നിന്നും പുറത്തേക്ക് കൊണ്ടുവരികയും ചെയ്തു.ഈ സമയം ആൾക്കൂട്ടത്തോടൊപ്പം വനം വകുപ്പിന്റെ ജീപ്പും ഉണ്ടായിരുന്നു.വെള്ളം ചോദിച്ച മധുവിനെ ആളുകൾ മർദിക്കുകയും തുടർന്ന് തലയിലൂടെ വെള്ളമൊഴിക്കുകയും ചെയ്തു.കടകളിൽ നിന്നും ഭക്ഷണസാധനങ്ങൾ മോഷ്ടിച്ചു എന്നാണ് മധുവിനെതിരെയുള്ള ആരോപണം.എന്നാൽ വിലപിടിപ്പുള്ള ഒന്നും അവൻ എടുക്കില്ലെന്നും ചന്ദ്രിക വ്യക്തമാക്കി.