ഇരിട്ടി:തില്ലങ്കേരി ആലാച്ചിയിൽ നിന്നും ബോംബ് നിർമാണ സാമഗ്രികൾ കണ്ടെത്തി.ആലാച്ചി മുത്തപ്പൻ മടപ്പുരയ്ക്ക് സമീപത്തുള്ള ആളൊഴിഞ്ഞ പറമ്പിൽ നിന്നാണ് ഇവ കണ്ടെടുത്തത്. ഷുഹൈബ് വധക്കേസിലെ പ്രതികളെ തിരയുന്നതിനിടെ മുഴക്കുന്നു എസ്‌ഐ പി.രാജേഷും സംഘവുമാണ് ബോംബ് നിർമാണ സാമഗ്രികൾ പിടികൂടിയത്.വെടിമരുന്ന്,കയർ, ചാക്കുനൂൽ, പശ,ഇരുമ്പു ചീളുകൾ എന്നിവയാണ് ഇതിൽ ഉണ്ടായിരുന്നത്.
കൂത്തുപറമ്പ്:കൂത്തുപറമ്പിൽ ലോറിയിൽ കടത്തുകയായിരുന്ന അഞ്ചു ക്വിന്റൽ നിരോധിത പുകയില ഉൽപ്പന്നങ്ങൾ പിടികൂടി.സംഭവത്തിൽ മൂന്നുപേർ പിടിയിലായി.ഇരിട്ടി സ്വദേശികളായ പുതിയപുരയിൽ മുഹമ്മദലി,കെ.വി ഹൗസിൽ ശംസുദ്ധീൻ,കെ.പി ബഷീർ എന്നിവരാണ് പിടിയിലായത്.എക്സൈസ് കമ്മീഷണറുടെ സ്പെഷ്യൽ സ്‌ക്വാഡിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ ശനിയാഴ്ച്ച പുലർച്ചെ കൂത്തുപറമ്പ് എക്സൈസ് ഇൻസ്പെക്റ്റർ സി.രജിത്തിന്റെ നേതൃത്വത്തിലുള്ള സംഘം നിർമ്മലഗിരി കോളേജിന് സമീപം റോഡിൽ നടത്തിയ പരിശോധനയ്ക്കിടെയാണ് ഇവർ പിടിയിലാകുന്നത്.26 ചാക്കുകളിലാക്കി പ്ലാസ്റ്റിക്ക് ഷീറ്റുകൊണ്ട് മറച്ച നിലയിലായിരുന്നു ഉൽപ്പന്നങ്ങൾ.ഇവർ ലഹരി ഉൽപ്പന്നങ്ങൾ കടത്താൻ ഉപയോഗിച്ച ലോറിയും കസ്റ്റഡിയിലെടുത്തിട്ടുണ്ട്.അസിസ്റ്റന്‍റ് എക്സൈസ് ഇൻസ്പെക്ടർ പി.കെ. ചിദംബരം, സിവിൽ ഓഫീസർമാരായ കെ. ബിജു, കെ.കെ. സാജൻ, കെ. ഇസ്മയിൽ എന്നിവരും പരിശോധനാസംഘത്തിലുണ്ടായിരുന്നു.
ഇരിട്ടി:ഉളിക്കൽ-പയ്യാവൂർ മലയോര ഹൈവെ നിർമാണത്തിനിടെ കോൺക്രീറ്റ് മിക്സർ മെഷീൻ മറിഞ്ഞ് ഏഴുപേർക്ക് പരിക്ക് .കോക്കാട്ട് പുതുതായി നിർമിക്കുന്ന പാലത്തിന്റെ കോൺക്രീറ്റ് പ്രവൃത്തിക്കിടെ മെഷീൻ തോട്ടിലേക്ക് മറിയുകയായിരുന്നു.തോട്ടിൽ കോൺക്രീറ്റ് ഉറപ്പിക്കുന്ന തൊഴിലാളികൾക്ക് മുകളിലേക്ക് മെഷീൻ വീഴുകയായിരുന്നു. അപകടത്തിൽ ഗുരുതരമായി പരിക്കേറ്റ പശ്ചിമ ബംഗാൾ സ്വദേശിയായ ഷമീം അൻസാരിയെ പരിയാരം മെഡിക്കൽ കോളേജിൽ പ്രവേശിപ്പിച്ചു.പരിക്കേറ്റ ബീഹാർ സ്വദേശികളായ ഗുർഷിത് ആലം,മജുബുൾ അൻസാരി,വടകര സ്വദേശികളായ മോഹനൻ കക്കട്ടിൽ,മിഥുൻ,സജീഷ് പയ്യോളി,അബ്ദുൽ മുത്തലീബ് എന്നിവരെ തലശ്ശേരി,ഇരിട്ടി എന്നിവിടങ്ങളിലെ സ്വകാര്യ ആശുപത്രികളിൽ പ്രവേശിപ്പിച്ചു. ഊരാളുങ്കൽ ലേബർ കോൺട്രാക്ടർസ് സൊസൈറ്റിയുടെ തൊഴിലാളികളാണ് ഇവർ.ഇരിട്ടിയിൽ നിന്നെത്തിയ അഗ്‌നിശമനസേനയും ഉളിക്കൽ പോലീസും നാട്ടുകാരും ചേർന്ന് നടത്തിയ രണ്ടുമണിക്കൂറോളം നീണ്ടു നിന്ന രക്ഷാപ്രവർത്തനത്തിനൊടുവിലാണ് ഇവരെ രക്ഷപ്പെടുത്തിയത്.ഇതിനിടെ പരിക്കേറ്റവരെ രക്ഷിക്കുന്നതിനിടെ ഒരു പോലീസുകാരനും പരിക്കേറ്റു.
പാലക്കാട്:അട്ടപ്പാടിയിൽ ആൾക്കൂട്ടത്തിന്റെ മർദനത്തിനിരയായി ആദിവാസി യുവാവ് മധു കൊല്ലപ്പെട്ട കേസിലെ പ്രതികളെ ഇന്ന് കോടതിയിൽ ഹാജരാക്കും.ഇന്ന് കോടതി അവധിയായായതിനാൽ മണ്ണാർക്കാട് പട്ടികജാതി-പട്ടികവർഗ പ്രത്യേക കോടതി മജിസ്‌ട്രേറ്റ് ജഡ്ജ് അനിൽ.കെ.ഭാസ്ക്കറിന്റെ വസതിയിലായിരിക്കും പ്രതികളെ ഹാജരാക്കുക.പ്രതികളെ റിമാൻഡ് ചെയ്തതിനു ശേഷം കസ്റ്റഡിയിൽ വിട്ടുകിട്ടുന്നതിനുള്ള അപേക്ഷ പോലീസ് സമർപ്പിക്കും. മധുവിന്റെ മരണവുമായി ബന്ധപ്പെട്ട് പതിനാറുപേരുടെ അറസ്റ്റ് ഇന്നലെ പോലീസ് രേഖപ്പെടുത്തിയിരുന്നു.ഇവർക്കെതിരെ കൊലപാതകക്കുറ്റം, പട്ടിക വർഗ പീഡന വിരുദ്ധ നിയമപ്രകാരമുള്ള വകുപ്പുകൾ,വനത്തിൽ അതിക്രമിച്ചു കയറിയതിനുള്ള പ്രത്യേക വകുപ്പുകൾ എന്നിവ ചുമത്തിയാണ് കേസെടുത്തിരിക്കുന്നത്.
കണ്ണൂർ:ശുഹൈബ് വധക്കേസിൽ നിർണായക വഴിത്തിരിവ്.കൊലയാളികൾ സഞ്ചരിച്ച വാഹനം കണ്ടെത്തി.അരോളി പാലോട്ടുകാവിനു സമീപം യു. പ്രശോഭിന്‍റെ ഉടമസ്ഥതയിലുള്ള വെളുത്ത വാഗണ്‍ ആർ കാറാണു പ്രതികൾ കൊലയ്ക്ക് ഉപയോഗിച്ചത്.ശനിയാഴ്ച പോലീസ് പിടിയിലായ അഖിലാണു കാർ വാടകയ്ക്കെടുത്തത്.കൊല നടത്തിയ ശേഷം കാർ 14നു തിരികെ നൽകുകയും ചെയ്തു.വാഗൺആർ കാറിലെത്തിയ പ്രതികളാണ് ബോംബെറിഞ്ഞ ശേഷം ശുഹൈബിനെ വെട്ടിക്കൊലപ്പെടുത്തിയതെന്ന് ശുഹൈബിനൊപ്പമുണ്ടായിരുന്ന സുഹൃത്തുക്കൾ വ്യക്തമാക്കിയിരുന്നു.ശുഹൈബ് വധക്കേസിൽ അഞ്ചുപ്രതികളെ കൂടി അറസ്റ്റ് ചെയ്തതായി അറിയിച്ച കണ്ണൂർ എസ്പി ശിവവിക്രം പ്രതികൾ ഉപയോഗിച്ച കാറും കസ്റ്റഡിയിലെടുത്തതായി പറഞ്ഞിരുന്നു.ഈ കാറിനെ കുറിച്ച് നടത്തിയ അന്വേഷണത്തിലാണ് ഇത് പാപ്പിനിശ്ശേരി അരോളി സ്വദേശിയുടേതാണെന്ന് കണ്ടെത്തിയത്.അതേസമയം കേസിൽ നേരത്തെ അറസ്റ്റിലായ ആകാശ് തില്ലങ്കേരിയെയും റിജിൻ രാജിനെയും നാല് ദിവസത്തേക്ക് പോലീസ് കസ്റ്റഡിയിൽ വിട്ടിരിക്കുകയാണ്.
ഹൈദരാബാദ്:കൊച്ചി പീസ് സ്കൂൾ മാനേജിങ് ഡയറക്റ്ററും മത പ്രബോധകനുമായ എം.എം അക്ബർ അറസ്റ്റിൽ.ഹൈദരാബാദ് പൊലീസാണ് എം.എം അക്ബറിനെ അറസ്റ്റ് ചെയ്തത്. മതസ്പർധ വളർത്തുന്ന സിലബസ് പഠിപ്പിച്ചതുമായി ബന്ധപ്പെട്ട കേസിലാണ് അറസ്റ്റ്. അക്ബറിന്റെ നേതൃത്വത്തിലുള്ള പീസ് സ്‌കൂളുമായി ബന്ധപ്പെട്ട വിവാദത്തെ തുടർന്ന് കേരള പൊലീസാണ് എം.എം അക്ബറിനെതിരെ കേസെടുത്തത്.ഇയാളെ ഉടന്നെത്തന്നെ കേരളാപോലീസിന് കൈമാറുമെന്ന് ഹൈദരാബാദ് പോലീസ് അറിയിച്ചു.നേരത്തെ സ്കൂളിലെ പാഠപുസ്തകങ്ങളിൽ തീവ്ര മതചിന്തയും മത സ്പർധ വളർത്തുന്ന ഉള്ളടക്കങ്ങളും കണ്ടെത്തിയതിനെ തുടർന്ന് പീസ് ഇന്റർനാഷണൽ സ്കൂൾ അടച്ചുപൂട്ടാൻ സർക്കാർ ഉത്തരവിട്ടിരുന്നു.മതം മാറിയ ശേഷം സിറിയയിലെക്ക് കടന്നതായി പറയപ്പെടുന്ന പെൺകുട്ടി എം.എം അക്ബറിന്റെ സ്‌കൂളിൽ ജോലി ചെയ്തിരുന്നുവെന്നതടക്കമുള്ള കാര്യങ്ങളാണ് അക്ബറിനെതിരെ കേസെടുക്കാൻ കേരള പോലീസിനെ പ്രേരിപ്പിച്ചത്.ആഗോളതലത്തിൽ തന്നെ ഭീകരവാദ പ്രവർത്തനത്തിന്റെ കരിനിഴലിൽ ഉള്ള മതപ്രഭാഷകൻ സാക്കിർ നായിക്കുമായി സ്കൂളിന് ബന്ധമുള്ളതായും അന്വേഷണ ഏജൻസികൾ സംശയിക്കുന്നു.
കണ്ണൂർ:ഇരിക്കൂർ ഊരത്തൂർ പബ്ലിക് ഹെൽത്ത് സെന്ററിന് സമീപത്തു നിന്നും മനുഷ്യന്റെ തലയോട്ടി കണ്ടെത്തി.നായ്ക്കൾ തലയോട്ടി കടിച്ചെടുത്തു പോകുന്നത് കണ്ട നാട്ടുകാർ പോലീസിൽ വിവരമറിയിക്കുകയായിരുന്നു.ഇരിക്കൂർ പോലീസും കണ്ണൂരിൽ നിന്നും ഡോഗ് സ്ക്വാർഡും ഫോറൻസിക് വിദഗ്ദ്ധരും സ്ഥലത്തെത്തി പരിശോധന നടത്തി. തലയോട്ടിയിൽനിന്നും നേരിയ തോതിൽ ദുർഗന്ധം വമിക്കുന്നതിനാൽ ഇതിനു കാര്യമായ കാലപ്പഴക്കം ഇല്ലെന്നാണ് പോലീസിന്റെ കണക്കുകൂട്ടൽ.പോലീസ് നായ മണം പിടിച്ച് ആ പരിസരത്ത് ഓടിയെങ്കിലും ഒന്നും കണ്ടെത്താനായില്ല.പോലീസ് അന്വേഷണം ആരംഭിച്ചിട്ടുണ്ട്.
മുംബൈ:പ്രമുഖ ചലച്ചിത്ര താരം ശ്രീദേവി(54) അന്തരിച്ചു.ഹൃദയാഘാതം മൂലം ദുബായിൽ വച്ചാണ് അന്ത്യം.ബോളിവുഡ് നടൻ മോഹിത് മർവയുടെ വിവാഹത്തിൽ പങ്കെടുക്കുന്നതിനായാണ് ശ്രീദേവിയും കുടുംബവും ദുബായിലെത്തിയത്.പ്രമുഖ നിർമാതാവ് ബോണി കപൂർ ഭർത്താവാണ്.ജാന്‍വി, ഖുഷി എന്നിവർ മക്കളാണ്.ബോണി കപൂറിന്‍റെ സഹോദരന്‍ സഞ്ജയ് കപൂര്‍ മരണ വിവരം സ്ഥിരീകരിച്ചിട്ടുണ്ട്. മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിലായി മുന്നൂറിലധികം ചിത്രങ്ങളിൽ ശ്രീദേവി അഭിനയിച്ചിട്ടുണ്ട്.2013ൽ പത്മശ്രീ ലഭിച്ചു.രണ്ട് സംസ്ഥാന ചലച്ചിത്ര പുരസ്കാരങ്ങളും ആറ് ഫിലിം ഫെയർ അവാർഡുകളും കിട്ടിയിട്ടുണ്ട്. ആലിംഗനം, തുലാവർഷം, സത്യവാൻ സാവിത്രി, നാല് മണി പൂക്കൾ, ദേവരാഗം കുമാര സംഭവം ഉള്‍പ്പെടെ 26 മലയാള സിനിമകളിലും താരം അഭിനയിച്ചിട്ടുണ്ട്.1963 ഓഗസ്റ്റ് 13 ന് തമിഴ്നാട്ടിലെ ശിവകാശിയിലാണ് ശ്രീദേവി ജനിച്ചത്.1967ൽ നാലാം വയസിൽ തുണൈവൻ എന്ന തമിഴ് ചിത്രത്തിൽ ബാലതാരമായി ശ്രീദേവി സിനിമ അരങ്ങേറ്റം കുറിച്ചു.1971ൽ പൂമ്പാറ്റ എന്ന മലയാള ചിത്രത്തിലെ അഭിനയത്തിന് മികച്ച ബാലതാരത്തിനുള്ള കേരളാ സംസ്ഥാന പുരസ്കാരം നേടി.1976ൽ കെ. ബാലചന്ദറിന്‍റെ സംവിധാനത്തിൽ ഒരുങ്ങിയ മുണ്ട്ര് മുടിച്ച് എന്ന തമിഴ് ചിത്രത്തിലൂടെയാണ് ആദ്യമായി നായികയായി എത്തിയത്.ഗായത്രി, പതിനാറ് വയതിനിലെ, സിഗപ്പ് റോജാക്കൾ, പ്രിയ, നിന്തും കോകില, മുണ്ട്രാം പിരൈ തുടങ്ങിയ തമിഴ് ചിത്രങ്ങളിൽ അഭിനയിച്ചു. 979-ൽ സോൾവ സവാൻ എന്ന ചിത്രത്തിലൂടെ ബോളിവുഡിൽ അരങ്ങേറ്റം കുറിച്ചു.1997-ല്‍ സിനിമാ രംഗത്ത് നിന്ന് ശ്രീദേവി താത്കാലികമായി വിടപറഞ്ഞെങ്കിലും 2012ൽ ഇംഗ്ലീഷ് വിഗ്ലീഷ് എന്ന ചിത്രത്തിലൂടെ താരം തിരിച്ചുവരവ് നടത്തി. കഴിഞ്ഞ വർഷം റിലീസായ മോം ആണ് അവസാനം പുറത്തിറങ്ങിയ ചിത്രം.
കോഴിക്കോട്:കോഴിക്കോട് മുക്കത്ത് ലോറിയില്‍ കടത്തുകയായിരുന്ന 1000 കിലോ സ്ഫോടക വസ്തു പോലീസ് പിടികൂടി.ലോറിയില്‍ ഉണ്ടായിരുന്ന സേലം സ്വദേശി മാതേഷിനെ പൊലീസ് കസ്റ്റഡിയിലെടുത്തു.1000 കിലോ ജലാറ്റിന്‍ സ്റ്റിക്കായിരുന്നു ലോറിയില്‍ ഉണ്ടായിരുന്നത്. രഹസ്യ വിവരത്തിന്റെ അടിസ്ഥാനത്തിലായിരുന്നു പൊലീസ് പരിശോധന. തമിഴ്നാട്ടില്‍ നിന്ന് വയനാട്ടിലേക്കാണ് സ്ഫോടക വസ്തുക്കള്‍ കടത്താന്‍ ശ്രമിച്ചതെന്നാണ് വിവരം ലഭിച്ചത്. സ്ഫോടക വസ്തുകളുമായി ബന്ധപ്പെട്ട രേഖകളൊന്നും ഡ്രൈവറുടെ കൈവശം ഉണ്ടായിരുന്നില്ല. പെട്ടികളിലാക്കി ടാർപോളിൻ കൊണ്ട് മൂടിയാണ് സ്ഫോടക വസ്തുക്കള്‍ ലോറിയില്‍ സൂക്ഷിച്ചിരുന്നത്. ലോറി മുക്കം പൊലീസ് സ്റ്റേഷനിലേക്ക് മാറ്റി.
പാറ്റ്ന:ബീഹാറിലെ മുസാഫർപൂരിൽ സ്കൂൾ കെട്ടിടത്തിലേക്ക് കാർ പാഞ്ഞുകയറി ഒൻപതു കുട്ടികൾ മരിച്ചു.24 പേർക്ക് പരിക്കേറ്റു.സ്കൂൾ വിട്ട് വീട്ടിലേക്ക് മടങ്ങുകയായിരുന്ന കുട്ടികളാണ് അപകടത്തിൽപ്പെട്ടത്.അമിത വേഗതയിൽ വന്ന കാർ നിയന്ത്രണം നഷ്ട്ടപ്പെട്ട് സ്കൂൾ വളപ്പിനകത്തേക്ക് പാഞ്ഞു കയറുകയായിരുന്നു.പരിക്കേറ്റവരെ അടുത്തുള്ള ആശുപത്രിയിൽ പ്രവേശിപ്പിച്ചു.സംഭവത്തിൽ മുഖ്യമന്ത്രി നിതീഷ് കുമാർ അനുശോചിച്ചു.മരിച്ച കുട്ടികളുടെ കുടുംബത്തിന് നാലുലക്ഷം രൂപ വീതം ധനസഹായം പ്രഖ്യാപിച്ചു.