February 2018

അടിമാലി:സഹപാഠികളായ വിദ്യാർത്ഥിനികൾ ക്ലാസ് മുറിയിൽ ജീവനൊടുക്കാൻ ശ്രമിച്ചു.അടിമാലിയിൽ മാനേജ്‌മന്റ് സ്കൂളിലെ ഒൻപതാം ക്ലാസ് വിദ്യാർത്ഥിനികളാണ് വിഷം കഴിച്ചു ആത്മഹത്യയ്ക്ക് ശ്രമിച്ചത്.ബുധനാഴ്ച ഉച്ചകഴിഞ്ഞാണ്‌ സംഭവം.ഉച്ച വിശ്രമം കഴിഞ്ഞ് ക്ലാസ്സിലെത്തിയ വിദ്യാർത്ഥിനികൾ പലവട്ടം ഛർദിച്ചു.കാരണം അന്വേഷിച്ച അധ്യാപകരോടും സഹപാഠികളോടും തലവേദനയും ഛർദിയുമാണെന്നാണ് ഇവർ പറഞ്ഞത്.തുടർന്ന് അദ്ധ്യാപകർ വിവരമറിയിച്ചതിനെ തുടർന്ന് ഇവരുടെ രക്ഷിതാക്കളെത്തി അടിമാലി താലൂക്ക് ആശുപത്രിയിൽ പ്രവേശിപ്പിച്ചു.ഇവിടെ നടത്തിയ പരിശോധനയിലാണ് ഇരുവരുടെയും ഉള്ളിൽ വിഷം ചെന്നതായി ഡോക്റ്റർമാർ കണ്ടെത്തിയത്.അപ്പോഴേക്കും അവശനിലയിലായ ഇവരെ കോട്ടയം മെഡിക്കൽ കോളേജിലേക്ക് മാറ്റി.അടിമാലി പോലീസ് മെഡിക്കൽ കോളേജിലെത്തി കുട്ടികളുടെ മൊഴി രേഖപ്പെടുത്തി.ചൊവ്വാഴ്ച രാത്രി ഇതിൽ ഒരു പെൺകുട്ടിയുടെ വീട്ടിൽ സഹോദരനുമായി വഴക്കുണ്ടാകുകയും ഇതേ തുടർന്ന് ഈ കുട്ടി പിറ്റേദിവസം വാഴയ്ക്ക്  തളിക്കുവാൻ വീട്ടിൽ സൂക്ഷിച്ചിരുന്ന വിഷം എടുത്തുകൊണ്ടാണ് സ്കൂളിലെത്തിയത്.സ്കൂളിൽ വെച്ച് രണ്ടാമത്തെ കുട്ടിയോട് വീട്ടിൽ നടന്ന പ്രശ്നങ്ങൾ വിവരിക്കുകയും താൻ ജീവനൊടുക്കുവാൻ പോവുകയാണെന്ന് പറയുകയും ചെയ്തു.ഇതോടെ മനോവിഷമത്തിലായ പെൺകുട്ടിയും കൂട്ടുകാരി കൊണ്ടുവന്ന വിഷം ക്ലാസ് മുറിയിൽ വെച്ച് കഴിക്കുകയായിരുന്നു എന്നാണ് വിവരം.

കണ്ണൂർ:താവക്കര പുതിയ ബസ് സ്റ്റാൻഡിൽ നിർത്തിയിട്ടിരുന്ന ഓട്ടോറിക്ഷകൾക്ക് തീപിടിച്ചു.ബുധനാഴ്ച രാത്രിയാണ് സംഭവം.ഒരു ഓട്ടോ പൂർണ്ണമായും മറ്റൊന്ന് ഭാഗികമായും കത്തി നശിച്ചു.പ്രശാന്ത് കുമാറിന്റെ ഉടമസ്ഥതയിലുള്ള ഓട്ടോയാണ് പൂർണ്ണമായും കത്തിയത്.പി.പി സുജാതയുടെ പേരിലുള്ള ഓട്ടോയാണ് ഭാഗികമായി കത്തിയത്. ബസ്സ്റാൻഡിലുണ്ടായിരുന്നവരുടെയും  സമീപത്തെ ബ്രോഡ് ബീൻ ഹോട്ടലിലെ ജീവനക്കാരുടെയും സമയോചിതമായ  ഇടപെടലിനെ തുടർന്നാണ് വൻ ദുരന്തം ഒഴിവായത്.ഓട്ടോയ്ക്ക് തീപിടിക്കുന്നതു കണ്ട ഇവർ പെട്ടെന്ന് തന്നെ സമീപത്തുള്ള മറ്റ് ഓട്ടോകളും ഇരുചക്ര വാഹനങ്ങളും തള്ളിമാറ്റുകയായിരുന്നു.ഹോട്ടലിലെ തീയണയ്ക്കാനുള്ള ഉപകരണങ്ങൾ ഉപയോഗിച്ച് തീയണയ്ക്കാനുള്ള ശ്രമവും നടത്തി.അഗ്നിശമനസേന എത്തിയാണ് തീ പൂർണ്ണമായും നിയന്ത്രണ  വിധേയമാക്കിയത്.തീപിടുത്തത്തിന്റെ കാരണം വ്യക്തമല്ല.

കണ്ണൂർ:കണ്ണൂരിലെ പ്രമുഖ ജ്വല്ലറിയിൽ നിന്നും സ്വർണ്ണം വായ്പ്പയായി വാങ്ങി പണം നൽകാതെ മുങ്ങി നടന്ന സ്ത്രീ പോലീസ് പിടിയിലായി.അഴീക്കോട് മൂന്നുനിരത്ത് മുക്രി ഹൗസിൽ റീത്ത ശിവകുമാറിനെയാണ്(54) പിലാത്തറയിൽ നിന്നും വളപട്ടണം എസ്‌ഐ ശ്രീജിത്ത് കോടേരിയും സംഘവും അറസ്റ്റ് ചെയ്തത്.ആറു മാസം മുൻപ് മകളുടെ വിവാഹ ആവശ്യങ്ങൾക്കായി കണ്ണൂരിലെ പ്രമുഖ ജ്വല്ലറിയിൽ നിന്നും നാല് ലക്ഷത്തിലധികം രൂപയുടെ സ്വർണ്ണം കടമായി വാങ്ങി പണം നൽകാതെ മുങ്ങി നടക്കുകയായിരുന്നു ഇവർ.ബാങ്ക് വായ്‌പ്പാ കിട്ടിയാലുടൻ പണം നൽകാമെന്ന് പറഞ്ഞാണ് സ്വർണ്ണം വാങ്ങിയത്.ഇതിനു പുറമെ കാഞ്ഞങ്ങാട് സ്ഥലമുണ്ടെന്നു പറഞ്ഞ് സ്വത്തു തട്ടിപ്പും ഇവർ നടത്തിയിരുന്നു.നാലുപേരിൽ നിന്നായി 70 ലക്ഷം രൂപയാണ് ഇവർ ഇത്തരത്തിൽ തട്ടിയെടുത്തത്. തട്ടിപ്പ് നടത്തിയ ഇവർ മുംബൈയിലും ബെഗളൂരുവിലും ഒളിച്ചു താമസിക്കുന്നുണ്ടെന്ന രഹസ്യ വിവരം ലഭിച്ചതിനെ തുടർന്ന് നടത്തിയ അന്വേഷണത്തിലാണ് പിടിയിലാകുന്നത്.

കണ്ണൂർ:ആകാശത്ത് വിസ്മയം തീർത്ത് സൂപ്പർ ബ്ലൂ ബ്ലഡ് മൂൺ ദൃശ്യമായി.എന്നാൽ ആകാശം മേഘാവൃതമായതു കാരണം 152 വർഷങ്ങൾക്കു ശേഷം ദൃശ്യമായ ഈ പ്രതിഭാസം ജില്ലയിൽ ദൃശ്യമായത് ഭാഗികമായി മാത്രം.പലയിടത്തും ആകാശം  മേഘാവൃതമായതിനാൽ ചന്ദ്രന്റെ ഓറഞ്ച് ചന്തം പൂർണ്ണമായും കാണാനായില്ല. അപൂർവ പ്രതിഭാസം കാണുന്നതിനായി ജനങ്ങൾ വൈകിട്ടോടെ തന്നെ തുറസായ സ്ഥലങ്ങൾ,കടൽത്തീരം  എന്നിവിടങ്ങളിൽ സ്ഥാനം പിടിച്ചു.കണ്ണൂർ സയൻസ് പാർക്കിലെ ഒബ്‌സർവേറ്ററി ടവറിലെ ടെലിസ്കോപ്പിലൂടെയും അല്ലാതെയും കുട്ടികളടക്കം നിരവധി ആളുകൾ കാഴ്ച കണ്ടു.പയ്യാമ്പലം ബീച്ചിലും കാഴ്ച കാണാൻ നിരവധി ആളുകൾ എത്തിയിരുന്നു.വൈകുന്നേരം മുതൽ ആകാശത്തെ അപൂർവ ദൃശ്യം കാണാൻ എത്തിയവരുടെ മുൻപിൽ 7.10 ഓടെയാണ് ചുവന്ന നിറമുള്ള ചന്ദ്രൻ തെളിയാൻ തുടങ്ങിയത്.ഇടയ്ക്ക് കാർമേഘം ചന്ദ്രനെ മറച്ചെങ്കിലും കാത്തു നിന്നവരെ നിരാശരാക്കാതെ പൂർണ്ണചന്ദ്രൻ ഉദിച്ചു.എന്നാൽ അപ്പോഴേക്കും ഓറഞ്ച് രാശി മാഞ്ഞിരുന്നു.മൂന്നു അപൂർവതകളോടെ ആകാശത്തുദിച്ച ചന്ദ്രനെ കാണാൻ കഴിഞ്ഞതിന്റെ സന്തോഷത്തിലാണ് കാണികൾ മടങ്ങിയത്.