February 2018

തിരുവനന്തപുരം:സംസ്ഥാനത്ത് ഇന്ത്യന്‍ നിര്‍മിത വിദേശമദ്യത്തിന് വില കൂടുമെന്നു മന്ത്രി തോമസ് ഐസക്.ഇന്ത്യൻ നിർമിത വിദേശ മദ്യത്തിന്‍റെ വിൽപ്പന നികുതി വർധിപ്പിച്ചാതായി ബജറ്റിൽ വ്യക്തമാക്കിയ മന്ത്രി സർച്ചാർജുകൾ ഒഴിവാക്കിയതിനാൽ നികുതിവർധന നാമമാത്രമാണെന്നും അറിയിച്ചു.ബിയറിന് 100 ശതമാനം വില കൂട്ടി. 400 രൂപക്ക് മുകളിലുള്ളവക്ക് മദ്യവില 200 ശതമാനം കൂട്ടിയപ്പോള്‍ 400 രൂപയില്‍ താഴെയുള്ളവക്ക് 210 ശതമാനമാണ് കൂട്ടിയത്.ഒപ്പം വിദേശ നിർമിത മദ്യത്തിന്‍റെ വിൽപന സർക്കാർ ഏറ്റെടുക്കുമെന്നും മന്ത്രി വ്യക്തമാക്കി.

തിരുവനന്തപുരം:സംസ്ഥാനത്തെ ഭൂനികുതി വർധിപ്പിച്ചു.2015ലെ ഭൂനികുതി പുനഃസ്ഥാപിക്കുകയാണെന്ന് ധനമന്ത്രി തോമസ് ഐസക്ക് ബജറ്റിൽ പ്രഖ്യാപിച്ചു. ഇതുവഴി 100 കോടിയുടെ അധിക വരുമാനം സംസ്ഥാനം പ്രതീക്ഷിക്കുന്നുവെന്നും അദ്ദേഹം അറിയിച്ചു.ഭൂമിയുടെ ന്യായവില 10% വർധിപ്പിച്ചതോടെ രജിസ്ട്രേഷൻ ഫീസും സ്റ്റാമ്പ് ഫീസും കൂടും. ഭൂ നികുതി വർധനയിലൂടെ 100 കോടി രൂപയുടെ അധിക വരുമാനമാണ് പ്രതീക്ഷിക്കുന്നത്. ഭാഗപത്രം രജിസ്ട്രേഷൻ നികുതി .2 ശതമാനമാക്കി ഉയർത്തിയിട്ടുണ്ട്. കെട്ടിടങ്ങളുടെ മൂല്യ നിർണയത്തിന് നിയമനിർമാണം നടത്തും. ഇതോടെ കെട്ടിട നികുതിയും വർധിക്കും.സർക്കാർ ചിലവുകൾക്കും നിയന്ത്രണമുണ്ട്. പുതിയ തസ്തികക്ക് നിയന്ത്രണം, പുതിയ വാഹനങ്ങൾ വാങ്ങാൻ വിലക്ക്,അനിവാര്യ സാഹചര്യങ്ങളിലേ വിദേശ യാത്ര അനുവദിക്കൂ, യോഗങ്ങൾ പരമാവധി വീഡിയോ കോൺഫറൻസിലൂടെ ആകണം, ഫോൺ ഉപയോഗം ചെലവുകുറഞ്ഞ മൊബൈൽ പാക്കേജ് ആക്കണം  എന്നിങ്ങനെയാണ് സർക്കാർ ചെലവിലെ നിയന്ത്രണങ്ങൾ.

കണ്ണൂർ:ജില്ലയിൽ പുഴാതി പ്രാഥമികാരോഗ്യ കേന്ദത്തിനു കീഴിൽ 13 വയസ്സുകാരിക്ക് ഡിഫ്തീരിയ ബാധ സ്ഥിതീകരിച്ചു.ഈ സാഹചര്യത്തിൽ ജില്ലയിൽ പ്രതിരോധ പ്രവർത്തനങ്ങൾ ഊർജിതമാക്കിയതായി കലക്റ്റർ മിർ മുഹമ്മദലി പറഞ്ഞു.ഡിഫ്തീരിയ ബാധയുള്ള രോഗി ചുമയ്ക്കുകയോ തുമ്മുകയോ ചെയ്യുമ്പോൾ തെറിക്കുന്ന സ്രവങ്ങളിലൂടെയാണ് രോഗം പകരുന്നത്.രോഗി ഉപയോഗിച്ച തൂവാലകൾ,ഗ്ലാസ്സുകൾ തുടങ്ങിയവ ഉപയോഗിക്കുന്നതിലൂടെയും രോഗം പകരാം.രോഗാണുബാധയുണ്ടായി രണ്ടു മുതൽ അഞ്ചു ദിവസങ്ങൾക്കുള്ളിൽ രോഗലക്ഷങ്ങൾ കണ്ടുതുടങ്ങും.പനി,ശരീര വേദന,വിറ,തൊണ്ടയിലെ ലിംഫ് ഗ്രന്ഥികളുടെ വീക്കം,കടുത്ത ശബ്ദത്തോടുകൂടിയുള്ള ചുമ,തൊണ്ടവേദന തുടങ്ങിയവയാണ് ലക്ഷണങ്ങൾ. ഇതോടൊപ്പം തൊണ്ടയിൽ കാണുന്ന തുകൽ പോലെയുള്ള പാടയാണ് രോഗത്തിന്റെ ഏറ്റവും പ്രകടമായ ലക്ഷണം.ഡിഫ്തീരിയ ബാക്ടീരിയ പുറപ്പെടുവിക്കുന്ന വിഷസമാനമായ ടോക്സിനുകളാണ് രോഗത്തിന്റെ കാഠിന്യം വർധിപ്പിക്കുന്നത്.ഈ ടോക്സിൻ മറ്റ് അവയവങ്ങളെയും ബാധിച്ച് ഹൃദയ സ്തംഭനം,പക്ഷാഘാതം,വൃക്കരോഗം എന്നിവയ്ക്കും കാരണമാകും.പ്രതിരോധ കുത്തിവെയ്പ്പിലൂടെ തടയാവുന്ന രോഗമാണ് ഡിഫ്തീരിയ. അതുകൊണ്ടു തന്നെ ഇതുവരെ കുത്തിവെയ്പ്പ് എടുക്കാത്തവരും ഭാഗികമായി എടുത്തിട്ടുള്ളതുമായ ഏഴുവയസ്സിൽ താഴെയുള്ള മുഴുവൻ കുട്ടികൾക്കും പ്രതിരോധ കുത്തിവെയ്പ്പ് നൽകുന്നതിനായി രക്ഷിതാക്കൾ പ്രത്യേകം ശ്രദ്ധിക്കണം.

പേരാവൂർ:കാക്കയങ്ങാട്ട് എബിവിപി പ്രവർത്തകൻ കൊല്ലപ്പെട്ട കേസിലെ പ്രതികളെ ഇന്ന് കോടതിയിൽ ഹാജരാക്കും.കേസിൽ ഉന്നതതല ഗൂഢാലോചന നടന്നതായി പ്രതികൾ അന്വേഷണ സംഘത്തിന് മുൻപാകെ മൊഴി നൽകി.ശ്യാമപ്രസാദിന്റെ വധിക്കുന്നതിന് ദിവസങ്ങൾക്ക് മുൻപ് പ്രതികളിൽ മൂന്നുപേർ രഹസ്യ സങ്കേതത്തിൽ ഗൂഢാലോചന നടത്തിയതും ഉന്നതരായ മറ്റു ചിലർ കൂടി ഇവരുടെ ഒപ്പം ഉണ്ടായിരുന്നതായും ചോദ്യം ചെയ്യലിൽ പ്രതികൾ സമ്മതിച്ചിട്ടുണ്ട്. ഗൂഢാലോചനയിൽ പങ്കെടുത്തവരെ കുറിച്ച് പൊലീസിന് വ്യക്തമായ വിവരം ലഭിച്ചിട്ടുണ്ടെങ്കിലും കേസന്വേഷണത്തെ ബാധിക്കുമെന്നതിനാൽ ഇത് പുറത്തുവിട്ടിട്ടില്ല. കണ്ണൂർ എസ്പി ശിവവിക്രമിന്റെ നേതൃത്വത്തിലുള്ള സ്പെഷ്യൽ സ്ക്വാർഡും പ്രതികളിൽ നിന്നും മൊഴിയെടുത്തിട്ടുണ്ട്.ഇരിട്ടി ഡിവൈഎസ്പി പ്രജീഷ് തോട്ടത്തിലിന്റെ നേതൃത്വത്തിലുള്ള പോലീസ് സംഘത്തിന്റെ സൂക്ഷ്മതയായ അന്വേഷണമാണ്‌ കേസിൽ മുഴുവൻ പ്രതികളെയും തെളിവുകളും ഉടൻ ശേഖരിക്കാൻ സഹായകമായത്.കേസിലെ തൊണ്ടിമുതലുകളും മുഴുവൻ തെളിവുകളും പോലീസ് ശേഖരിച്ചു കഴിഞ്ഞു.ഫോറൻസിക് ഫലം കൂടി കിട്ടുന്നതോടെ കുറ്റപത്രം പൂർത്തിയാക്കി കോടതിയിൽ സമർപ്പിക്കാനാണ് പോലീസിന്റെ തീരുമാനം.

മലപ്പുറം:കുട്ടികളെ തട്ടിക്കൊണ്ടുപോകാനെത്തിയതാണെന്നാരോപിച്ച് പൊന്നാനിയിൽ ആൾക്കൂട്ടം വയോധികനായ യാചകനെ കെട്ടിയിട്ട് നഗ്നനാക്കി മർദിച്ചു.മർദനത്തിൽ തലയ്ക്കും വാരിയെല്ലിനും ഗുരുതരമായി പരിക്കേറ്റ ആന്ധ്രാസ്വദേശിയായ വൃദ്ധനെ പൊന്നാനി താലൂക്ക് ആശുപത്രിയിൽ പ്രവേശിപ്പിച്ചു.സംവത്തിൽ നാലുപേരെ പോലീസ് കസ്റ്റഡിയിൽ എടുത്തിട്ടുണ്ട്.കണ്ടാലറിയാവുന്ന 20 പേർക്കെതിരെയും കേസെടുത്തു.പൊന്നാനി നഴ്സിംഗ് ഹോമിന് സമീപത്തുവെച്ച് ഇന്നലെ രാവിലെ പത്തുമണിയോടെയാണ് സംഭവം.വൃദ്ധനെ ആൾക്കൂട്ടം നിലത്തിട്ടു ചവിട്ടുകയും നഗ്‌നനാക്കി കെട്ടിയിട്ട് മർദിക്കുകയും ചെയ്തു.മർദന വിവരമറിഞ്ഞെത്തിയ പോലീസുകാർ ഇയാളെ രക്ഷിക്കാൻ ശ്രമിച്ചെങ്കിലും നാട്ടുകാർ പോലീസുകാരെയും മർദിക്കുകയായിരുന്നു. ഇതോടെ കൂടുതൽ പോലീസുകാർ സ്ഥലത്തെത്തി ലാത്തിവീശിയാണ് അക്രമികളെ തുരത്തിയത്.യാചകന്റെ പക്കൽ നിന്നും മിട്ടായിയും ക്ലോറോഫോമും കണ്ടെത്തിയെന്നായിരുന്നു നാട്ടുകാരുടെ പ്രചാരണം.എന്നാൽ പോലീസ് അന്വേഷണത്തിൽ ഇത് നുണയാണെന്ന് തെളിഞ്ഞു.കുട്ടികളെ തട്ടിക്കൊണ്ടുപോകുന്നതായി സോഷ്യൽ മീഡിയകളിലൂടെ നടക്കുന്ന പ്രചരണങ്ങളുടെ പ്രതിഫലനമാണ് നാട്ടുകാരുടെ കയ്യേറ്റത്തിന് പിന്നിലെന്നാണ് ചൂണ്ടിക്കാട്ടുന്നത്.