കണ്ണൂർ:ബെംഗളൂരുവിൽ നിന്നും പയ്യന്നൂരിലേക്ക് വരികയായിരുന്ന ബസിൽ നാടകീയ രംഗങ്ങൾ.ഡ്രൈവർ മദ്യപിച്ച് ലക്ക് കെട്ടതിനെ തുടർന്ന് യാത്രക്കാർ ഡ്രൈവറെ പിടിച്ചുമാറ്റി.പകരം യാത്രക്കാരിലൊരാൾ ബസ്സിന്റെ നിയന്ത്രണം ഏറ്റെടുത്തു.ബുധനാഴ്ച്ച രാത്രി ബെംഗളൂരുവിൽ നിന്നും പയ്യന്നൂരെക്ക് പുറപ്പെട്ട ബസ്സിലാണ് സംഭവം നടന്നത്.യാത്രക്കാർ ഭക്ഷണം കഴിക്കുന്നതിനായി ബസ് വീരാജ്പേട്ടയ്ക്കപ്പുറം നിർത്തിയിരുന്നു.ഇവിടെ നിന്നും ഡ്രൈവർ വിനയൻ അമിതമായി മദ്യപിച്ചു.ഇതോടെ ഇയാൾക്ക് ബസ് ഓടിക്കാൻ പറ്റാതെയായി.മൂന്നിടത്ത് വെച്ച് അപകടവും ഉണ്ടായി.ഇതേ തുടർന്ന് വീരാജ്പേട്ടയിലെത്തിയപ്പോൾ യാത്രക്കാരിലൊരാൾ ബസ്സിന്റെ നിയന്ത്രണം ഏറ്റെടുത്തു. എന്നാൽ വളപട്ടണത്തെത്തിയപ്പോൾ ഇയാൾക്ക് ഇറങ്ങേണ്ടതിനാൽ റോഡരികിൽ ബസ് നിർത്തി ഇയാൾ ഇറങ്ങി.ഇതോടെ യാത്രക്കാർ വളപട്ടണം എസ് ഐ യുടെ നമ്പറിൽ വിളിച്ചു സഹായം തേടി.തുടർന്ന് എസ്‌ഐ ശ്രീജിത്ത് കോടേരി ഒരു ഡ്രൈവറുമായി സ്ഥലത്തെത്തി.ഈ ഡ്രൈവർ ബസ്സ് പയ്യന്നൂരിലെത്തിച്ചു.പിന്നീട് മദ്യപിച്ച് വാഹനമോടിച്ചതിനും അപകടകരമായ രീതിയിൽ ബസ്സോടിച്ചതിനും പോലീസ് ഡ്രൈവർ വിനയന്റെ പേരിൽ വളപട്ടണം പോലീസ് കേസെടുത്തു.
