December 2017

കണ്ണൂർ:പേരാവൂരിൽ ഡിഫ്തീരിയ ബാധിച്ച് വിദ്യാർത്ഥിനി മരിച്ച സംഭവത്തെ തുടർന്ന് ആരോഗ്യ വകുപ്പ് ബോധവൽക്കരണവും പ്രതിരോധ പ്രവർത്തനങ്ങളും ശക്തമാക്കുന്നു.ജില്ലയിൽ ഇതുവരെ മറ്റാർക്കും ഡിഫ്തീരിയ ബാധ റിപ്പോർട്ട് ചെയ്തിട്ടില്ലാത്തതിനാൽ ആശങ്ക വേണ്ടെന്നും കുട്ടികളുടെ ആരോഗ്യ കാര്യങ്ങളിൽ അല്പം കൂടി ശ്രദ്ധവെച്ചാൽ മതിയെന്നുമാണ് ആരോഗ്യവകുപ്പ് നൽകുന്ന മുന്നറിയിപ്പ്.കുട്ടികൾക്ക് യഥാസമയം പെന്റാവാലന്റ് വാക്‌സിനേഷൻ നൽകുന്നതാണ് ഡിഫ്തീരിയ ബാധ തടയുന്നതിനുള്ള  ഏക മാർഗം.തൊണ്ട വേദനയും പനിയുമാണ് ഇതിന്റെ രോഗ ലക്ഷണങ്ങൾ.തൊണ്ടയിൽ വെളുത്ത നിറത്തിലുള്ള പാടുകളും കാണാം. രോഗലക്ഷണങ്ങൾ കണ്ടാലുടൻ തന്നെ ചികിത്സ തേടണം.വായുവിലൂടെയാണ് ഇത് പകരുന്നത്.അതിനാൽ രോഗി തുമ്മുകയോ ചുമയ്ക്കുകയോ ചെയ്യുമ്പോൾ വായും മൂക്കും തൂവാല ഉപയോഗിച്ച് മൂടണം.അതുപോലെ തന്നെ രോഗി ഉപയോഗിക്കുന്ന തൂവാല,പത്രം,ഗ്ലാസ് എന്നിവയും ഉപയോഗിക്കരുത്.രോഗം മൂർച്ഛിച്ചാൽ ശ്വാസം മുട്ടലുണ്ടാകുകയും അത് ചിലപ്പോൾ ഹൃദയത്തെ ബാധിക്കുകയും ചെയ്യും ഇവയാണ് മരണകാരണമാകുന്നത്.

കണ്ണൂർ:കണ്ണൂർ ജില്ലാ ആശുപത്രിയിൽ ഗൈനക്കോളജി ഒപിയുടെ സീലിംഗ് അടർന്നു വീണു. സീലിങ്ങിന്റെ പേൾസ്റ്ററിങ്ങും,ഫാൻ,ട്യൂബ് എന്നിവയുമാണ് അടർന്നു വീണത്.ഇന്നലെ പുലർച്ചെയായിരുന്നു സംഭവം.ഒപിയുടെ പ്രവർത്തനം തുടങ്ങുന്നതിനു മുൻപായതിനാൽ വൻ അപകടമാണ് ഒഴിവായത്.ജില്ലാ ആശുപത്രിയിൽ ഏറ്റവും കൂടുതൽ തിരക്കനുഭവപ്പെടുന്ന ഒപികളിൽ ഒന്നാണ് ഗൈനക്കോളജി വിഭാഗം.അപകടം നടന്നതിനെ തുടർന്ന് ഗൈനക്കോളജി വിഭാഗം ഒപി താൽക്കാലികമായി മെഡിക്കൽ ഒപി വിഭാഗത്തിലേക്ക് മാറ്റി.ഗൈനക്കോളജി വിഭാഗം കൂടാതെ,ഇഎൻടി,മെഡിക്കൽ ഒപി,പനി ക്ലിനിക്ക് എന്നിവയും കാലപ്പഴക്കം ചെന്ന കെട്ടിടങ്ങളിലാണ് പ്രവർത്തിക്കുന്നത്.പുതിയ കെട്ടിടത്തിന്റെ നിർമാണത്തിന് ഫണ്ട് അനുവദിച്ചിട്ടുണ്ടെങ്കിലും നിർമാണം ഇതുവരെയും തുടങ്ങിയിട്ടില്ല.

കൊച്ചി:അങ്കമാലി: നടിയെ ആക്രമിച്ച കേസിൽ നടൻ ദിലീപ് ഉൾപ്പടെയുള്ള പ്രതികൾക്കെതിരേ പോലീസ് സമർപ്പിച്ച അനുബന്ധ കുറ്റപത്രം അങ്കമാലി മജിസ്ട്രേറ്റ് കോടതി സ്വീകരിച്ചു. കുറ്റപത്രത്തിന്റെ പകർപ്പ് പ്രതികൾക്ക് നൽകാനും കോടതി ഉത്തരവിട്ടിട്ടുണ്ട്.കഴിഞ്ഞ മാസം 22 നാണ് അന്വേഷണ സംഘം കോടതിയിൽ കുറ്റപത്രം സമർപ്പിച്ചത്.കുറ്റപത്രത്തിലെ സാങ്കേതിക പിഴവുകൾ തിരുത്താൻ തിങ്കളാഴ്ച അന്വേഷണ സംഘത്തോട് കോടതി നിർദ്ദേശിച്ചിരുന്നു. ഇതുപ്രകാരം പിഴവുകൾ തിരുത്തി അന്വേഷണ സംഘം തിങ്കളാഴ്ച വൈകിട്ട് കുറ്റപത്രം കോടതിക്ക് കൈമാറി. പിന്നാലെ കോടതി കുറ്റപത്രം അംഗീകരിക്കുകയായിരുന്നു.നടൻ ദിലീപ് ഉൾപ്പടെ 12 പ്രതികളാണ് അനുബന്ധ കുറ്റപത്രത്തിൽ ഉൾപ്പെട്ടിരിക്കുന്നത്.അതേസമയം കുറ്റപത്രത്തിലെ വിവരങ്ങൾ ചോർന്നതിനെതിരേ നടൻ ദിലീപ് സമർപ്പിച്ച ഹർജി വ്യാഴാഴ്ച കോടതിയുടെ പരിഗണനയ്ക്ക് വരുന്നുണ്ട്.കുറ്റപത്രത്തിലെ വിവരങ്ങൾ കോടതി പരിശോധിക്കുന്നതിനിടെ മാധ്യമങ്ങളിൽ വരുന്നത് ചോദ്യം ചെയ്താണ് ദിലീപ് ഹർജി നൽകിയിരിക്കുന്നത്.

പേരാവൂർ:ഡിഫ്തീരിയ ബാധയെ തുടർന്ന് കോഴിക്കോട് സ്വകാര്യ ആശുപത്രിയിൽ ചികിത്സയിലായിരുന്ന ഒൻപതാം ക്ലാസ് വിദ്യാർത്ഥിനി മരിച്ചു.മണത്തണ വളയങ്ങാട്ടെ കുന്നത്ത് കൂലോത്ത് ഉദയന്റെയും തങ്കമണിയുടെയും മകൾ ശ്രീപാർവ്വതി(14) ആണ് മരിച്ചത്.കഴിഞ്ഞ മാസം പത്താം തീയതി ശ്രീപാർവ്വതി സ്കൂളിൽ നിന്നും ബംഗളൂരുവിലേക്ക് വിനോദയാത്ര പോയിരുന്നു.തിരികെ വന്നതിനു ശേഷം പനിയും ചുമയും അനുഭവപ്പെട്ടതിനെ തുടർന്ന് പേരാവൂരിലെ സ്വകാര്യ ആശുപത്രിയിലും പിന്നീട് പരിയാരം മെഡിക്കൽ കോളേജ് ആശുപത്രിയിലും പ്രവേശിപ്പിച്ചിരുന്നു.എന്നാൽ ഗുരുതരാവസ്ഥയിലായതിനെ തുടർന്ന് കോഴിക്കോട് മെഡിക്കൽ കോളേജിലേക്ക് മാറ്റുകയായിരുന്നു.ഇവിടെ നടത്തിയ വിദഗ്ദ്ധ പരിശോധനയിൽ ഡിഫ്തീരിയ സ്ഥിതീകരിക്കുകയായിരുന്നു.സംഭവത്തെ തുടർന്ന് വിദ്യാർത്ഥിനിയുടെ സമീപത്തുള്ളവർക്കും സ്കൂളിലെ വിദ്യാർഥികൾക്കുമടക്കം നാനൂറിലേറെ പേർക്ക് പ്രതിരോധ ഗുളികകൾ വിതരണം ചെയ്യുകയും വാക്‌സിനേഷൻ നൽകുകയും ചെയ്തിരുന്നു.ഒരുപാടു വർഷങ്ങൾക്കു ശേഷം ആദ്യമായാണ് ഡിഫ്തീരിയ ബാധിച്ചു മരണം റിപ്പോർട്ട് ചെയ്തിരിക്കുന്നത്.